لوۋ چينجيان: قىتاي مەن ە و اراسىندا گەوساياسي قايشىلىق جوق

استانا. KAZINFORM - بۇكىل قىتايلىق حالىق وكىلدەرى جينالىسىنىڭ (ب ح ءو ج) باسپا ءسوز حاتشىسى لوۋ چينجيان قىتاي مەن ەۋروپالىق وداق (ە و) اراسىندا تۇبەگەيلى مۇددە قاقتىعىسى دا، بىتىسپەس گەوساياسي قايشىلىق تا جوق ەكەنىن مالىمدەدى، دەپ حابارلايدى Kazinform ءتىلشىسى ب ح ءو ج كەزەكتى سەسسياسىنىڭ باسپا ءسوز ورتالىعىنا سىلتەمە جاساپ.

XIV شاقىرىلىمداعى ب ح ءو ج-دىڭ ءۇشىنشى سەسسياسى 4-ناۋرىز كۇنى بەيجىڭدەگى حالىق سارايىندا باسپا ءسوز ءماسليحاتىن وتكىزدى.

يسپاندىق جۋرناليستىڭ قىتاي مەن ە و قارىم-قاتىناسى تۋرالى ساۋالىنا جاۋاپ بەرگەندە لوۋ چينجيان قىتايدىڭ بۇل ماسەلەگە توتەنشە ءمان بەرەتىنىن اتاپ ءوتتى. ونىڭ ايتۋىنشا، الەمدىك ارەناداعى بەيبىتسۇيگىش ءارى كونسترۋكتيۆتى كۇشتەر رەتىندە، قىتاي مەن ە و اراسىنداعى قارىم-قاتىناستىڭ تۇراقتى دامۋى قوس تاراپتىڭ تۇبەگەيلى جانە ۇزاق مەرزىمدى مۇددەسىنە، حالىقارالىق قاۋىمداستىقتىڭ ورتاق تىلەگىنە ساي كەلەدى.

ول قىتاي مەن ە و اراسىنداعى ساۋدا- ەكونوميكالىق بايلانىستاردىڭ جالپى العاندا تۇراقتى دامىپ كەلە جاتقانىن قاداپ ايتتى. ءوزارا ساۋدا- ەكونوميكالىق ىنتىماقتاستىق تاراپتاردىڭ ەكونوميكالىق دامۋىن ىنتالاندىرىپ قانا قويماي، جاھاندىق ءوندىرۋ-جەتكىزۋ تىزبەكتەرىنىڭ تۇراقتىلىعىنا جانە الەمدىك ەكونوميكانىڭ وسىمىنە وڭ اسەر ەتىپ كەلەدى. قازىرگى تاڭدا قىتاي مەن ە و كوپتەگەن سالادا ءبىرىن-ءبىرى تولىقتىراتىن جانە ءوزارا ءتيىمدى ىنتىماقتاستىق ورناتىپ وتىر.

لوۋ چينجيان 2025 -جىلى قىتاي مەن ە و اراسىنداعى ديپلوماتيالىق قاتىناستىڭ 50 جىلدىعى اتاپ وتىلەتىنىن ەسكە سالدى.

- وتكەن جارتى عاسىرداعى تاجىريبە كورسەتكەندەي، قىتاي مەن ە و اراسىندا تۇبەگەيلى مۇددە قاقتىعىسى دا، بىتىسپەس گەوساياسي قايشىلىق تا جوق، ءبىز ءبىر-بىرىمىزگە سۇيەۋ بولارلىق سەرىكتەستەرمىز، - دەدى ول.

سونداي-اق، ول قىتاي مەن ە و قارىم-قاتىناسىنىڭ ءۇشىنشى تاراپقا باعىتتالمايتىنىن، تاۋەلدى نەمەسە كىرىپتار بولمايتىنىن ەرەكشە اتاپ ءوتتى. ونىڭ ايتۋىنشا، قىتاي مەن ە و اراسىنداعى ىنتىماقتاستىقتى دامىتۋ ءۇشىن ەڭ الدىمەن ءوزارا سەنىم كەرەك. تاراپتار بارلىق قيىندىققا مويىماي، ستراتەگيالىق تۇراقتىلىقتى ساقتاۋى قاجەت.

- قىتاي تاراپى ە و-مەن جوعارى دەڭگەيدەگى كەلىسىمدەردى بىرلەسىپ جۇزەگە اسىرۋعا، جاھاندىق سىن-قاتەرلەردى تىزە قوسا ەڭسەرۋگە، ءبىرجاقتىلىق پەن پروتەكسيونيزمگە جۇمىلا قارسى تۇرۋعا دايىن. قىتاي ە و-مەن قارىم- قاتىناستى جاقسارتۋعا جانە العا قاراي دامىتۋعا نيەتتى، - دەدى ول.

بۇعان دەيىن حابارلانعانداي، قىتاي ا ق ش-تىڭ جاڭا باج سالىقتارىنا بايلانىستى د س ۇ-عا شاعىم ءتۇسىردى.

اۆتور

ەرلان مازان