ۇلتىم ورىس بولعانىمەن، مەن قازاقتىڭ كەلىنىمىن - ەلەنا سترەبكوۆا

تۇركىستان. KAZINFORM - تۇركىستاندا «ەل باقىتى - ەڭبەك پەن بىرلىكتە» تاقىرىبىندا تۇركىستان وبلىستىق قازاقستان حالقى اسسامبلەياسىنىڭ 26- سەسسياسى ءوتتى. وندا قازاق وتباسىنا كەلىن بولىپ تۇسكەن ورىس قىزى كوپشىلىك الدىندا سالەم سالىپ، اقساقالداردىڭ باتاسىن الدى.

سەسسياعا قازاقستان حالقى اسسامبلەياسى ءتوراعاسىنىڭ ورىنباسارى - اسسامبلەيا حاتشىلىعىنىڭ مەڭگەرۋشىسى مارات ءازىلحانوۆ، تۇركىستان وبلىستىق ءماسليحاتىنىڭ ءتوراعاسى نۇرالى ءابىشوۆ، سونداي-اق قازاقستان حالقى اسسامبلەياسى كەڭەسىنىڭ مۇشەلەرى مەن وبلىستىق ءماسليحات دەپۋتاتتارى جانە ەتنومادەني بىرلەستىكتەردىڭ جەتەكشىلەرى مەن مۇشەلەرى قاتىستى.

سەسسيا بارىسىندا تۇركىستان وبلىستىق سلاۆيان ەتنومادەني بىرلەستىگىنىڭ مۇشەسى ەلەنا سترەبكوۆا ءسوز سويلەپ، وڭىردە مەملەكەتتىك ءتىلدىڭ قولدانىس اياسىن كەڭەيتۋ بويىنشا مازمۇندى بايانداما جاسادى.

«ۇلتىم ورىس بولعانمەن، مەن قازاقتىڭ كەلىنىمىن. سوندىقتان قالىڭ ەلدىڭ الدىنا شىققان سوڭ قازاقتىڭ سالتى بويىنشا سالەم سالۋ - كەلىندىك مىندەتىم، قۇرمەتىم. ال ۇلكەندەردىڭ، حالىقتىڭ باتاسىن الۋ - مەن ءۇشىن مارتەبە»، - دەگەن ول ۇلكەن زالدا كوپشىلىككە ءيىلىپ سالەم بەرىپ، قوشەمەتكە بولەندى.

ەلەنا كەنتاۋ قالاسىندا تۇرادى. تالدىقورعان قالاسىندا تۋىلعانىمەن، كەنتاۋعا كەلىن بولىپ تۇسكەن. قازىر قالاداعى يۋ. گاگارين اتىنداعى №16-مەكتەپ-گيمنازياسىندا اعىلشىن ءتىلى ءپانىنىڭ مۇعالىمى. جولداسى نۇرسۇلتان - ءۇيدىڭ ەڭ كەنجەسى بولعاندىقتان، قاراشاڭىراقتا قالعان. بۇگىندە اتا-ەنەسىمەن بىرگە تۇراتىن ورىس قىزى كۇندەلىكتى كەلىندىك مىندەتىن ابىرويمەن اتقارىپ كەلەدى. تاڭەرتەڭمەن سالەمىن سالىپ، قاريالاردىڭ ءشايىن دايىندايدى. باۋىرساق ءپىسىرىپ، بەشمارماق جاسايدى. ءۇش قىز ءوسىرىپ وتىرعان جاس وتباسى سالت-ءداستۇر مەن ادەپ-عۇرىپتى دا بەرىك ۇستانادى.

«قازاق اۋلەتىنە كەلىن بولىپ تابالدىرىق اتتاعان كۇننەن باستاپ ەنەم ءوزى باس-كوز بولىپ، قازاق حالقىنىڭ سالت-ءداستۇرىن، ادەپ-عۇرپىن ۇيرەتتى، قازاقى تاربيەگە باۋلىدى. قازاق وتباسىنا كەلىن بولىپ ءتۇسۋىم دە قازاق ءتىلىن تەرەڭدەي مەڭگەرۋگە سەپتىگىن تيگىزدى. ەلىمىزدىڭ ءاربىر ازاماتى مەملەكەتتىك ءتىلدى مەڭگەرىپ، ەركىن سويلەي السا، ونىڭ ارتىقشىلىعى جوق دەپ ويلايمىن. بۇل - ءوزىڭ ءومىر سۇرەتىن ەلگە دەگەن قۇرمەتتىڭ بەلگىسى. سوندىقتان مەملەكەتتىك ءتىلدى ۇيرەنۋ - ءار قازاقستاندىقتىڭ ازاماتتىق پارىزى دەپ ەسەپتەيمىن»، - دەدى ەلەنا.

سەسسيا ماجىلىسىندە «احىسكا» تۇرىك ەتنومادەني ورتالىعى» قوعامدىق بىرلەستىگىنىڭ مۇشەسى ۆەنەرا ساراجوۆا، تولەبي اۋداندىق وزبەك ەتنومادەني بىرلەستىگىنىڭ مۇشەسى جامال كاديروۆ وبلىس كولەمىندە جۇزەگە اسىپ جاتقان قايىرىمدىلىق شارالارى، مەملەكەتتىك ءتىلدىڭ قولدانۋ اياسىن كەڭەيتۋ، مەدياتسيا جانە تاۋەلسىزدىك جىلدارىندا قازاقستاننىڭ دامۋىنا جاستاردىڭ قوسقان ۇلەسى جايىندا بايانداما جاسادى.

ال، تۇركىستان وبلىسى اكىمىنىڭ ورىنباسارى بەيسەنباي تاجىبايەۆ وڭىردە جۇزەگە اسىپ جاتقان جۇمىستار بويىنشا ايتىپ ءوتتى.

«قازاقستان حالقى اسسامبلەياسىنىڭ «جۇرەكتەن - جۇرەككە» اۋقىمدى اكسياسى اياسىندا تۇركىستان وبلىسى يگى ميسسيانىڭ كوشباسشىسى بولدى. سۋ تاسقىنىنان زارداپ شەككەن ايماقتارعا تۇركىستاندىق اسسامبلەيا قۇنى 150 ميلليون تەڭگەگە جۋىق 630 توننادان استام گۋمانيتارلىق كومەك جىبەردى. بۇل جۇمىس ءالى دە جالعاسۋدا»، - دەدى بەيسەنباي تاجىبايەۆ.

مارات ءازىلحانوۆ تاياۋدا مەملەكەت باسشىسى قاسىم-جومارت توقايەۆتىڭ توراعالىعىمەن وتكەن قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى 33- سەسسياسىندا جۇكتەلگەن ماقسات- مىندەتتەرگە توقتالدى. سونداي-اق، كۇردەلى كەزەڭدە تاسقىن سۋدان زارداپ شەككەندەرگە كومەك كورسەتكەن بارشا تۇركىستاندىقتارعا العىس ايتتى.

سەسسيا ءماجىلىسىنىڭ سوڭىندا ەتنوسارالىق تاتۋلىق پەن قوعامدىق كەلىسىمدى نىعايتۋعا قوسقان ەلەۋلى ۇلەسى ءۇشىن ءبىرقاتار ازاماتتار ارنايى ماراپاتقا يە بولدى.

اۆتور
قايرات زاينيشەۆ