ۇلتتىق وليمپيادا كوميتەتىنىڭ جاڭا قۇرامىنا كىمدەر كىردى

استانا. KAZINFORM - بۇگىن قازاقستان ۇلتتىق وليمپيادا كوميتەتىنىڭ باس اسسامبلەياسى وتىرىسى ءوتىپ، ونىڭ بارىسىندا ۇيىمدا ءبىرقاتار كادرلىق اۋىس-ءتۇيىس بولدى. اتاپ ايتقاندا، ۇيىم مۇشەلەرىنىڭ قولداۋىمەن كوميتەت پرەزيدەنتى لاۋازىمىنا داڭقتى بوكسشى گەننادي گولوۆكين سايلاندى.

سونىمەن قاتار ۇ و ك- تىڭ ءبىرقاتار لاۋازىمدى تۇلعاسى دا سايلانعان ەدى.

اسسامبلەيانىڭ كەزەكتەن تىس وتىرىسىندا جاس وسپىرىمدەر قۇراماسىنىڭ 2024-جىلعى وڭتۇستىك كورەيادا وتكەن IV قىسقى جاس وسپىرىمدەر وليمپياداسىنداعى ناتيجەسى قورىتىندىلانىپ، شىلدە ايىندا پاريجدە وتەتىن جازعى وليمپيادا ويىندارىنا دايىندىعى تالقىلاندى.

باس اسسامبلەيا مۇشەلەرىنىڭ داۋىس بەرۋ قورىتىندىسىندا ۇلتتىق وليمپيادا كوميتەتىنىڭ پرەزيدەنتى لاۋازىمىنا گەننادي گولوۆكين سايلاندى.

«جاڭا لاۋازىمدا ەلىمىزدىڭ اتىنان ارەكەت ەتۋ - مەن ءۇشىن زور مارتەبە. ماعان قازاقستان ۇلتتىق وليمپيادا كوميتەتىن باسقارۋدى ايتقاندا قازاقستان سپورتىن دامىتۋعا ءوز ۇلەسىمدى قوسۋعا مۇمكىندىك بەرسە عانا، كانديداتۋرامدى ۇسىناتىنىمدى ايتتىم. وزدەرىڭىز بىلەتىندەي، مەن ساياساتكەر دە، شەنەۋنىك تە ەمەسپىن. ءوز ارەكەتىمدى سوزبەن ەمەس، ىسپەن دالەلدەپ ۇيرەنگەنمىن. ءبىزدىڭ الدىمىزدا تۇرعان ەڭ ماڭىزدى مىندەتتەردىڭ ءبىرى حالىقارالىق قارىم-قاتىناستى رەتتەۋ دەپ بىلەمىن. وسى ورايدا، مەنىڭ ءوز كوزقاراسىم، جىلدار بويى جينالعان حالىقارالىق تاجىريبەم بارىن، كوماندا بارىن ايتقىم كەلەدى. ال ەڭ باستىسى جانە مەنىڭ كوپتەن بەرگى قالاۋىم - بۇل بارلىعىن دا ءوزىمنىڭ تۋعان ەلىمدە جۇزەگە اسىرۋ»، - دەدى جيىندا ءسوز العان گەننادي گولوۆكين.

ول 1982-جىلدىڭ 28 اقپانىندا قاراعاندى قالاسىندا دۇنيەگە كەلگەن. ول اۋەسقوي بوكستا 350 جەكپە-جەك وتكىزىپ، ونىڭ 345 ىندە جەڭىسكە جەتتى. ەش ۋاقىتتا نوكاۋت تۇرماق نوكداۋنعا دا ءتۇسىپ كورگەن جوق. گەننادي اۋەسقوي بوكستا ازيا، الەم چەمپيوناتتارىندا توپ جاردى. الايدا، وليمپيادا چەمپيونى بولا المادى، كۇمىس مەدالدى قاناعات تۇتتى. WBA نۇسقاسى بويىنشا ورتاشا سالماقتا الەم چەمپيونى اتاعىن 8 مارتە، IBO نۇسقاسى بويىنشا ورتاشا سالماقتا الەم چەمپيونى اتاعىن 5 رەت قورعادى. كاسىپقوي بوكس تاريحىندا ورتاشا سالماق بويىنشا نوكاۋت بويىنشا 89 پايىزدىق ۇلەسپەن ءبىرىنشى ورىنعا دا شىقتى.

ۇلتتىق وليمپيادا كوميتەتىنىڭ قىسقى سپورت تۇرلەرى بويىنشا ۆيتسە-پرەزيدەنتى - مامين اسقار ۇزاقباي ۇلى.

ول 1965-جىلى 23- قازاندا قازىرگى استانا قالاسىندا دۇنيەگە كەلگەن. ءار جىلدارى استانا قالاسىنىڭ اكىمى، كولىك جانە كوممۋنيكاتسيالار ءمينيسترى، پرەمەر-ءمينيستردىڭ ورىنباسارى، ۇكىمەت باسشىسى بولعان.

ۇلتتىق وليمپيادا كوميتەتىنىڭ جازعى سپورت تۇرلەرى بويىنشا ۆيتسە-پرەزيدەنتى - ءابىلعازين دانيار رۇستەم ۇلى. 1969-جىلى الماتى قالاسىندا دۇنيەگە كەلگەن. ول - قازاقستاننىڭ سۋ سپورتى تۇرلەرى فەدەراتسياسىنىڭ پرەزيدەنتى، ۇستەل تەننيسى فەدەراتسياسىنىڭ پرەزيدەنتى، سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ ءتوراعاسى، «Almaty Triathlon Federation» ق ب قامقورشىلىق كەڭەسىنىڭ، «Fizmat Endowment Fund» قامقورشىلىق كەڭەسىنىڭ ءتوراعاسى.

ۇلتتىق وليمپيادا كوميتەتىنىڭ جالپى ماسەلەلەر بويىنشا ۆيتسە-پرەزيدەنتى - مىرزابوسىنوۆ ەربول قۋانتاي ۇلى.

ول 1984-جىلى شىعىس قازاقستان وبلىسىندا دۇنيەگە كەلگەن. سەمەي پەداگوگيكالىق يستيتۋتىن، قازاق گۋمانيتارلىق-زاڭ يننوۆاتسيالىق ۋنيۆەرسيتەتىن، قازاق سپورت جانە تۋريزم اكادەمياسىن بىتىرگەن. 2020-2021-جىلدارى Qazaq kuresi قاۋىمداستىعىنىڭ باسقارۋشى ديرەكتورى، 2021-2023-جىلدارى دەنە تاربيەسى جانە بۇقارالىق سپورت اكادەمياسىنىڭ رەكتورى بولعان. 2023-جىلدان بەرى مادەنيەت جانە سپورت مينيسترلىگى سپورت ىستەرى جانە دەنە تاربيەسى كوميتەتىنىڭ ءتوراعاسى قىزمەتىن اتقارادى.

ۇلتتىق وليمپيادا كوميتەتىنىڭ پاراوليمپيادالىق سپورت تۇرلەرى بويىنشا ۆيتسە-پرەزيدەنتى - ساپيەۆ سەرىك جۇمانعالي ۇلى.

1983-جىلى 16- قاراشادا قاراعاندى وبلىسىندا دۇنيەگە كەلگەن. مادەنيەت جانە سپورت مينيسترلىگى سپورت ىستەرى جانە دەنە تاربيەسى كوميتەتىنىڭ ءتوراعاسى قىزمەتىن اتقارعان. 2005 جانە 2007-جىلدارى بوكستان الەم چەمپيونى، 2012-جىلى وليمپيادا چەمپيونى بولعان. قازاقستاننىڭ ەڭبەك سىڭىرگەن سپورت شەبەرى، ەڭبەك سىڭىرگەن سپورت قايراتكەرى، ۆەل باركەر كۋبوگىنىڭ يەگەرى.

ۇلتتىق وليمپيادا كوميتەتىنىڭ باس حاتشىسى - وتەشەۆا جانار ازىرقان قىزى.

ول سوڭعى 2 جىل بويى گەننادي گولوۆكين كومانداسىنىڭ ب ا ق- پەن جۇمىس ماسەلەلەرىمەن اينالىسىپ كەلدى.

سپورتتىڭ وليمپيادالىق تۇرلەرى بويىنشا ۇلتتىق فەدەراتسيا وكىلدەرى ۇلتتىق وليمپيادا كوميتەتى اتقارۋشى كوميتەتىنىڭ دە مۇشەسى بولدى، ولار:

بالاندين دميتري يگوريەۆيچ 1995-جىلى 4- ساۋىردە الماتى قالاسىندا دۇنيەگە كەلگەن. 200 مەترگە براسس ادىسىمەن جۇزۋدەن 2016-جىلعى جازعى وليمپيادا ويىندارىنىڭ چەمپيونى، ازيا ويىندارىنىڭ ءۇش دۇركىن چەمپيونى، 2015-جىلى وتكەن ۋنيۆەرسيادا جەڭىمپازى؛

سۇلەيمەنوۆ دياس تولەۋتاي ۇلى 1972-جىلى 27 شىلدەدە تەمىرتاۋ قالاسىندا دۇنيەگە كەلگەن. «قامقور مەنەدجمەنت» ج ش س- ءنىڭ باس ديرەكتورى، قازاقستان ۇلتتىق شاڭعى قاۋىمداستىعىنىڭ پريزيدەنتى، ۇلتتىق پاراليمپيادالىق كوميتەتتىڭ ۆيتسە-پرەزيدەنتى؛

وتەمۇراتوۆ بولات جاميت ۇلى 1957-جىلى 13- قاراشادا اتىراۋ قالاسىندا دۇنيەگە كەلگەن. قازاقستان تەننيس فەدەراتسياسىنىڭ پرەزيدەنتى، حالىقارالىق تەننيس فەدەراتسياسىنىڭ ۆيتسە-پرەزيدەنتى (International Tennis Federation)؛

يۋسۋپوۆا ءاليا ماقسۇت قىزى 1984-جىلى 15- مامىردا شىمكەنت قالاسىندا دۇنيەگە كەلگەن. قازاقستان سپورتشىسى. كوركەم گيمناستيكادان افينا مەن بەيجىڭ وليمپيادالارىنا قاتىسقان؛

ەسەكەيەۆ قۋانىشبەك باقىتبەك ۇلى 1975-جىلى 10- ماۋسىمدا الماتى قالاسىندا دۇنيەگە كەلگەن. «قازاق تەلەكوم» ا ق باسقارماسىنىڭ ءتوراعاسى جانە ديرەكتورلار كەڭەسىنىڭ مۇشەسى؛

گادجيەۆ گادجي شاپيەۆيچ 1974-جىلى 29- قىركۇيەكتە دۇنيەگە كەلگەن. بيزنەسمەن، قوعام قايراتكەرى. اۋىر اتلەتيكا فەدەراتسياسىنىڭ ءبىرىنشى ۆيتسە-پرەزيدەنتى، ق ر پەنچاك سيلات قاۋىمداستىعىنىڭ پرەزيدەنتى؛

احمەتوۆ دانيال كەنجەتاي ۇلى 1954-جىلى 15- ماۋسىمدا پاۆلودار قالاسىندا دۇنيەگە كەلگەن. شىعىس قازاقستان وبلىسىنىڭ اكىمى، قورعانىس ءمينيسترى، پرەمەر-مينيستر، ەۋرازيالىق ەكونوميكالىق كوميسسيانىڭ ەنەرگەتيكا جانە ينفراقۇرىلىم جونىندەگى القاسىنىڭ مۇشەسى (مينيستر) بولعان؛

قازاقستان ۇلتتىق وليمپيادا كوميتەتى تەكسەرۋ كوميسسياسىنىڭ ءتوراعاسى لاۋازىمىنا الپامىسوۆ اباي ابدىماسەت ۇلى سايلاندى.

ول 1969-جىلى 11- ماۋسىمدا دۇنيەگە كەلگەن. قازاقستان ۇلتتىق باسكەتبول فەدەراتسياسىنىڭ باس حاتشىسى، پرەزيدەنتى، قىزىلوردا وبلىسى اكىمىنىڭ ورىنباسارى قىزمەتتەرىن اتقارعان.

قازاقستان ۇلتتىق وليمپيادا كوميتەتى تەكسەرۋ كوميسسياسىنىڭ مۇشەسى بولعاندار:

اشىمبەكوۆ رابباني ابدىكامال ۇلى - قازاقستاننىڭ گيمناستيكا فەدەراتسياسىنىڭ باس حاتشىسى.

سەرىكوۆ روللان سەرىك ۇلى - تۋريزم جانە سپورت مينيسترلىگىنىڭ سپورت ىستەرى جانە دەنە تاربيەسى كوميتەتى ءتوراعاسىنىڭ ورىنباسارى.

سپورتشىلاردىڭ، سپورتشىلار سايلاعان كوميسسيانىڭ وكىلى بولىپ رىپاكوۆا ولگا سەرگەيەۆنا سايلاندى.

ول 1984-جىلى 30- قاراشادا وسكەمەن قالاسىندا دۇنيەگە كەلگەن. جەڭىل اتلەت. ول 2012 -جىلى لوندون وليمپياداسىندا التىن، بەيجىڭ وليمپياداسىندا كۇمىس جانە ريە-دە-جانەيرو وليمپياداسىنا قولا مەدال جەڭىپ العان.

ۇلتتىق وليمپيادا كوميتەتى 1990-جىلدىڭ 3- اقپانىندا قۇرىلىپ، 1993-جىلدىڭ قىركۇيەك ايىندا حالىقارالىق وليمپيادا كوميتەتى تاراپىنان رەسمي تۇردە تانىلعان. ول دەربەس، تاۋەلسىز قوعامدىق ۇيىم سانالادى. ءوز قىزمەتىن جۇزەگە اسىرۋ بارىسىندا وليمپيادا حارتياسى، قازاقستان رەسپۋبليكاسى زاڭدارى جانە ۇوك جارعىسىن نەگىزگە الادى. ۇ و ك ميسسياسى - قازاقستان اۋماعىندا وليمپيادالىق قوزعالىستى دامىتۋ جانە ونى قورعاۋ، وليمپيادالىق قۇندىلىقتاردى ناسيحاتتاۋ.