ۇلتتىق وليمپيادا كوميتەتىنە سپورتشىلاردى دايىنداۋعا اقشا بولىنبەيتىن بولدى

  تۋريزم جانە سپورت ۆيتسە- ءمينيسترى سەرىك جاراسبايەۆ ماجىلىستەگى الەۋمەتتىك- مادەني دامۋ كوميتەتىنىڭ وتىرىسىنان كەيىن جۋرناليستەر سۇراعىنا بەرگەن جاۋابىندا ۇلتتىق وليمپيادا كوميتەتىنىڭ كەلەشەكتەگى مارتەبەسى جونىندە پىكىر ءبىلدىردى، دەپ حابارلايدى Kazinform.

«ۇلتتىق وليمپيادا كوميتەتى نەگىزىنەن حالىقارالىق وليمپيادا كوميتەتىنىڭ ستاتۋسىمەن بەكىتىلگەن. ءار ەلدە حالىقارالىق سپورت ۇيىمدارىمەن بايلانىس ورناتاتىن ۇلتتىق وليمپيادا كوميتەتتەرى بار. بىزدە دە ەندى سولاي ءوزىنىڭ تىكەلەي جۇمىسىمەن عانا اينالىسادى. ءوزىڭىز بىلەسىز، كەيىنگى التى جىلدىڭ بەس جىلىندا ۇلتتىق وليمپيادا كوميتەتى سپورتشىلاردى دايىنداۋمەن دە اينالىستى. ءقازىر ول فۋنكتسيالاردى زاڭ ارقىلى الىپ تاستايمىز. وسىدان كەيىن تەك قانا حالىقارالىق ۇيىمدارمەن بايلانىس باعىتىندا جۇمىس ىستەيتىن بولادى»، - دەدى ول.

ۆيتسە- مينيستر وليمپياداعا سپورتشىلاردى دايىنداۋ ءۇشىن اتالعان 5 جىلدا ۇلتتىق وليمپيادا كوميتەتىنە قانشا قاراجات بولىنگەنىن ناقتى اتاي المايتىنىن ايتتى.

«ونى قازىر ناقتى ايتا المايمىن. سەبەبى مەنىڭ بۇل قىزمەتكە كەلگەنىمە ءبىر اي بولدى. بىلتىردان بەرى ۇلتتىق وليمپيادا كوميتەتى وليمپ ويىندارىنا سپورتشى دايىنداۋ بيۋدجەتىنەن شەتتەتىلگەن. ول فۋنكتسيانى قازىر ءبىزدىڭ مينيسترلىك قۇرىلىمىنداعى سپورتتى دامىتۋ ديرەكتسياسى اتقارادى. ەندى سونى زاڭ اياسىندا بەكىتىپ تاستاساق دەپ وتىرمىز» ، - دەدى سەرىك جاراسبايەۆ.

اۆتور

ەسىمجان ناقتىباي