«ۇلتتىق سەزىم» جوباسى ترەندكە اينالدى
استانا. KAZINFORM - ۇلتتىق كيىمدى دارىپتەۋدى ماقسات ەتكەن «ۇلتتىق سەزىم» جوباسىن قولداۋشىلاردىڭ قاتارى ارتىپ كەلەدى. بۇگىندە ەلىمىزدىڭ تۇكپىر-تۇكپىرىندەگى ەڭبەك ۇجىمدارى اپتانىڭ ءار جۇماسىندا جۇمىسقا ۇلتتىق كيىم كيىپ، قازاقى اشەكەي بۇيىمداردى تاعىپ كەلۋدى داستۇرگە اينالدىرعان.
2023-جىلدىڭ جەلتوقسان ايىنان باستاپ قازاقستان اۋماعىندا ۇلتتىق كيىمنىڭ ءسان-سالتاناتىنا ارنالىپ، قازاق مادەنيەتىن ناسيحاتتاۋدى ماقسات ەتكەن «ۇلتتىق سەزىم» جوباسى جالعاسىپ جاتىر.
العاشىندا فلەشموب رەتىندە قولعا الىنعان جاڭاشىلدىق بۇگىندە ۇلكەن جوباعا اينالدى.
- باستاما مادەني بايلىق پەن داستۇرگە باسا نازار اۋدارا وتىرىپ، ۇلتتىق بىرلىكتى نىعايتۋعا باعىتتالعان. كوپ ساياحاتتاپ، باسقا ەلدەردىڭ مادەنيەتى مەن داستۇرلەرىن تاماشالاپ، سول مەملەكەتتەردىڭ تۇرعىندارى تاريحي مۇرالارىن ەرەكشە قۇرمەتتەيتىنىنە تاڭ قالدىم! اسىرەسە، تايلاند پەن جاپونيا تۇرعىندارى وزدەرىنىڭ ۇلتتىق كيىمدەرىن ماقتانىشپەن بايقادىم. ۇلتتىق كيىم ارقىلى ادەت-عۇرىپ، سالت-ءداستۇر، تاريحقا دەگەن قۇرمەتتى اڭعاردىم. ءبىزدىڭ تاريحي جانە مادەني مۇرامىزدى ساقتاۋ ۇلتتىق بىرەگەيلىكتى قالىپتاستىرۋدا ماڭىزدى ءرول اتقاراتىنىنا سەنىمدىمىن. ءبىزدىڭ ماقساتىمىز - ءداستۇردى ساقتاپ قانا قويماي، بارشا قازاقستاندىقتاردى ءوز تاريحى مەن مادەنيەتىن ماقتان تۇتۋعا شابىتتاندىرۋ، - دەيدى «ۇلتتىق سەزىم» جوباسىنىڭ باستاماشىسى قانات كوپبايەۆ.
جوبا ەڭ العاش قولعا الىنعان ۋاقىتتا ەلىمىزدىڭ جەتەكشى ۇيىمدارىنىڭ 7200 دەن استام قىزمەتكەرى قولداۋ كورسەتكەن.
ولاردىڭ قاتارىندا Kusto Group ،Tas Group ،Chocofamily Holding ،BI Group ،Astana Group ،Invictus، Novopack ،Bilim Media Group ،Ordamed Group ،MYD Production ،SDC ،Freedom Holding Corp ۇلتتىق سپورت تۇرلەرى قاۋىمداستىقتارى مەن فەدەراتسيالار بار.
- بۇگىندە جوبانى قازاقستاننىڭ 100 دەن استام كومپانيا مەن ءبىلىم بەرۋ ۇيىمى بارىنشا قولداپ جاتىر. جالپى قاتىسۋشىلار سانى 20000 ادامنان استى. قۋانتارلىعى، قولداۋشىلاردىڭ سانى كۇن سايىن ارتىپ كەلەدى. تەك ناۋرىز مەيرامىندا عانا ەمەس، جىلدىڭ كەز كەلگەن كۇنىندە ۇلتتىق كيىمدى كيىپ ءجۇرۋ سانگە اينالىپ بارادى. مەملەكەت باسشىسى ۇلتتىق قۇرىلتايدىڭ ءۇشىنشى وتىرىسىندا ۇلتتىق بولمىسىمىزدى نىعايتۋ ەڭ ماڭىزدى مىندەت ەكەنىن اتاپ كورسەتتى: «كەيبىر ءىرى كومپانيالار، وقۋ ورىندارى ۇلتتىق ناقىشتاعى كيىمدەردى كيۋ تاجىريبەسىن ءقازىردىڭ وزىندە ەنگىزىپ جاتىر. بۇل - دۇرىس باستاما». ءبىزدىڭ كۇش-جىگەرىمىزدى پرەزيدەنتتىڭ اتاپ وتكەنىنە قۋانىشتىمىز، - دەيدى جوبا جەتەكشىسى وكسانا شكرىگۋنوۆا.
