ۇلتتىق سالت-ءداستۇر، ادەت-عۇرىپتى ناسيحاتتاۋشىلاردىڭ مارتەبەسى قانداي بولۋى كەرەك - دەپۋتات
استانا. KAZINFORM - ءماجىلىس دەپۋتاتى ەربولات ساتىبالدين ۇلتتىق سالت-ءداستۇر مەن ادەت-عۇرىپتى ۇستانۋدى ناسيحاتتاۋشىلاردىڭ مارتەبەسىن انىقتاۋ ماسەلەسىن كوتەردى.
ءماجىلىستىڭ الەۋمەتتىك-مادەني دامۋ كوميتەتىندە «ماتەريالدىق ەمەس مادەني مۇرانى قورعاۋدى زاڭنامالىق قامتاماسىز ەتۋ تۋرالى» تاقىرىبىندا دوڭگەلەك ۇستەل ءوتتى.
«زاڭ پايدالانۋعا ىڭعايلى بولۋى كەرەك، سوندىقتان نەگىزگى ماتەريالدىق ەمەس مادەني مۇرانىڭ اۋقىمىن بەلگىلەپ الۋىمىز كەرەك دەپ ويلايمىن. تىزىمدەرى بار شىعار، ءبىراق ءبارىن بىرىكتىرىپ ونى قاي جەردە پايدالانادى وسى زاڭدا تولىق كورىنۋى كەرەك. زاڭدى مىندەتتى تۇردە وكىلەتتى ورگان جۇرگىزىپ وتىرادى، بىرنەشە مينيسترلىك بولاتىن بولسا، ولاردىڭ اراسىنداعى مىندەتتەردى تولىق، ايقىن جازىلۋى ءتيىس، سەبەبى ەرتەڭ «اتقا جەمدى كىم سالادى» دەگەن وسى جەردەن تۋىنداپ قالۋى مۇمكىن. ودان كەيىن بۇل سالت-ءداستۇر، ادەت-عۇرىپقا قاتىستى بولعاننان كەيىن ونى ناسيحاتتاۋشىنىڭ مارتەبەسىن انىقتاپ، قوعامداعى بەلگىلى ءبىر ءرولىن بەلگىلەپ الۋىمىز كەرەك»، - دەدى ەربولات ساتىبالدين ءىس-شارا بارىسىندا.
ودان ءارى حالىق قالاۋلىسى مادەني مۇرانى قورعاۋ ماسەلەسىن كوتەردى.
«مىسالى، جارتىلاي جالاڭاش ءبىزدىڭ ۇلتتىق كيىمىمىزدى كيىپ الىپ، كيىز ۇيدە بيلەگەن قىزدارعا ءبىز ەشتەڭە ىستەگەن جوقپىز عوي، ويتكەنى زاڭ بويىنشا ءبىز ولارعا ەشتەڭە ىستەي المايمىز. سوندىقتان بۇل جەردە قورعاۋ ماسەلەسى جانە ءبىز ونى قاي دەڭگەيدە قورعايمىز، اكىمشىلىك بولماسا قىلمىستىق دەڭگەيگە دەيىن اپارامىز با، وسى ماسەلەلەردىڭ ءبارىن وسى زاڭدا ەگجەي-تەگجەيلى قاراپ الۋىمىز كەرەك»، - دەيدى ول.
ەسكە سالساق، بيىل كيىز ۇيدە قىزداردىڭ جارتىلاي جالاڭاش بيلەگەن ۆيدەوسى الەۋمەتتىك جەلىدە تاراعان ەدى. قازاقتىڭ كيىز ۇيىندە بەيادەپ قىلىعىمەن ماسقارالاعانداردىڭ ارەكەتى جەلى قولدانۋشىلارىنىڭ اشۋىن كەلتىردى.
وسى ورايدا ءماجىلىس دەپۋتاتى سامات مۇسابايەۆ باس پروكۋراتۋرا مەن ۇلتتىق قاۋىپسىزدىك كوميتەتىنەن اتالعان بەينەروليككە قۇقىقتىق باعا بەرىپ، ناقتى شارا قولدانۋدى سۇرادى.
سونداي-اق مادەنيەت جانە اقپارات ءمينيسترى ايدا بالايەۆا كيىز ۇيدە جارتىلاي جالاڭاش بيلەگەندەردىڭ ۆيدەوسىنا قاتىستى پىكىر ءبىلدىردى.
كەيىن باس پروكۋراتۋرا اتالعان جايتقا قاتىستى قىلمىستىق ءىس قوزعالعانىن حابارلادى.
