ۇلتتىق قوردان 2024-جىلى 3,6 تريلليون تەڭگە ترانسفەرت تارتامىز - قارجى ءمينيسترى

ءماجىلىستىڭ جالپى وتىرىسىندا رەسپۋبليكالىق بيۋجەت بويىنشا الداعى جىلدارعا ارنالعان بولجامدار ايتىلدى.

تولىعىراق ۇكىمەت باسشىسىنىڭ ورىنباسارى، قارجى ءمينيسترى ەرۇلان جاماۋبايەۆ ايتىپ بەردى، دەپ حابارلايدى Kazinform.

«زاڭ جوباسى ەلدىڭ 2028-جىلعا دەيىنگى الەۋمەتتىك-ەكونوميكالىق دامۋ بولجامى نەگىزىندە ازىرلەندى. 2024-جىلعا ارنالعان تۇسىمدەر 20,4 تريلليون تەڭگەگە بولجانىپ وتىر. ترانسفەرتتەردى ەسەپكە الماعاندا، كىرىستىڭ كولەمى 16,1 تريلليون تەڭگە نەمەسە تۇسىمدەردىڭ جالپى سوماسىنىڭ %80. كەلەسى جىلى ۇلتتىق قوردان 3,6 تريلليون تەڭگە كولەمىندە ترانسفەرت تارتۋ جوسپارلانۋدا، ونىڭ ىشىندە نىسانالى ترانسفەرت - 1,6 تريلليون تەڭگە. اتالعان قاراجاتتار الەۋمەتتىك ماڭىزى بار جانە ستراتەگيالىق ينفراقۇرىلىمدىق جوبالاردى قارجىلاندىرۋعا باعىتتالادى»، - دەدى ۇكىمەت باسشىسىنىڭ ورىنباسارى، قارجى ءمينيسترى ەرۇلان جاماۋبايەۆ ءماجىلىستىڭ جالپى وتىرىسىندا.

سونداي-اق، مينيستر رەسپۋبليكالىق بيۋجەتتىڭ شىعىسى بويىنشا جاعدايدى ءتۇسىندىردى.

«جالپى، بيۋجەتتىڭ 2024-جىلعا ارنالعان شىعىستارى بيىلمەن سالىستىرعاندا 1,5 تريلليون تەڭگەگە ۇلعايىپ، شامامەن 24 تريلليون تەڭگەگە بولجانىپ وتىر. بيۋجەت تاپشىلىعى جالپى ىشكى ونىمگە %2,6 عا بولجانادى. دەگەنمەن 2026-جىلعا قاراي %2,3 كە دەيىن بىرتىندەپ تومەندەيدى. جالپى، رەسپۋبليكالىق بيۋجەتتىڭ باسىم بولىگى مەملەكەتتىك جانە الەۋمەتتىك مىندەتتەمەلەردى تولىققاندى ورىنداۋعا، وڭىرلەردى دامىتۋعا باعىتتالعان»، - دەيدى ول.

بۇعان دەيىن ءماجىلىس رەسپۋبليكالىق بيۋجەت تۋرالى زاڭدى قابىلدانعان بولاتىن.