ۇلتتىق قورعا مۇناي سەكتورىنان تۇسەتىن سالىق تولەمدەرى 30 پايىزعا جۋىق قىسقارعان
استانا. KAZINFORM - ۇلتتىق قورعا مۇناي سەكتورىنان تۇسەتىن سالىق تولەمدەرى 30 پايىزعا جۋىق قىسقارعان. بۇل جايىندا جوعارى اۋديتورلىق پالاتانىڭ 2023-جىلعى رەسپۋبليكالىق بيۋجەتتىڭ اتقارىلۋى تۋرالى ۇكىمەت ەسەبىنىڭ قورىتىندىسىندا ايتىلعان.
«ەسەپتى كەزەڭدە مۇناي سەكتورى ۇيىمدارىنان تىكەلەي سالىقتاردىڭ ءتۇسىمى 1 840,9 ميلليارد تەڭگەگە (%29,8) تومەندەپ، 4 557,4 ميلليارد تەڭگەنى قۇرادى. ونىڭ ىشىندە كورپوراتيۆتىك تابىس سالىعى بويىنشا تولەمدەر - 32، ۇستەمە پايداعا سالىناتىن سالىق - 42، پايدالى قازبالاردى وندىرۋگە سالىناتىن سالىق - 19، ەكسپورتقا رەنتا سالىعى بويىنشا - 40، جاسالعان كەلىسىمشارتتار شەڭبەرىندە ءونىمدى بولۋگە قاتىستى ەلدىڭ ۇلەسى بويىنشا - 30، جەر قويناۋىن پايدالانۋشىنىڭ قوسىمشا تولەمدەرى بويىنشا 85 پايىزا قىسقاردى»، - دەلىنگەن قۇجاتتا.
دەگەنمەن، تولەنگەن بونۋستاردىڭ مولشەرى ەكى ەسەگە جۋىق 15,9 ميلليارد تەڭگەگە دەيىن ءوستى. ۇلتتىق قورعا سالىق تولەمدەرىنىڭ 30 پايىزعا جۋىق ازايۋى مۇناي باعاسىنىڭ تومەندەۋىنە بايلانىستى.
سالىقتىق ەمەس تۇسىمدەر (اكىمشىلىك ايىپپۇلدار، ءوسىمپۇلدار، سانكسيالار، ءوندىرىپ الۋلار، تابيعات پايدالانۋشىلاردان مۇناي سەكتورى ۇيىمدارىنىڭ زياندى وتەۋ تۋرالى تالاپ-ارىزدارى بويىنشا الىنعان قاراجات جانە ت. ب.) 2 ەسە ءوسىپ، 8,5 ميلليارد تەڭگەنى قۇرادى. رەسپۋبليكالىق مەنشىكتى جەكەشەلەندىرۋدەن تۇسكەن تۇسىمدەر كولەمى 1,2 ميلليارد تەڭگەنى قۇرادى. ۇلتتىق قوردى باسقارۋدان تۇسكەن ينۆەستيتسيالىق تابىس وتكەن جىلدىڭ تەرىس مانىنەن (826,5 ميلليارد تەڭگە) 2023 -جىلدىڭ قورىتىندىسى بويىنشا 1 819,7 ميلليارد تەڭگەنى قۇراپ، وسكەنىن كورسەتتى. 2023 -جىلى كەپىلدەندىرىلگەن ترانسفەرت سوماسى %45 عا تومەندەپ، 2200 ميلليارد تەڭگەنى قۇرادى. بۇل رەتتە قوسىمشا 1800 ميلليارد تەڭگە كولەمىندە نىسانالى ترانسفەرت ءبولىندى.
قوردى باسقارۋعا جانە جىل سايىنعى سىرتقى ءاۋديتتى جۇرگىزۋگە بايلانىستى شىعىستار 69,9 ميلليارد تەڭگەنى قۇرادى (48,3 ميلليارد تەڭگەگە ۇلعايعان) . اتالعان شىعىستاردىڭ ءوسۋى وتكەن جىلمەن سالىستىرعاندا ۇستەمە كىرىستىلىك العان سىرتقى باسقارۋشىلاردىڭ بۇرىنعى سىياقىلارى مەن كوميسسيالار بويىنشا تولەمدەرگە بايلانىستى ءۇش ەسە كوپ بولدى.
باسقارۋ شىعىستارى اكتيۆتەردى باسقارۋ ءۇشىن بازالىق كوميسسيالاردى جانە باسقارۋ ناتيجەلەرى بويىنشا كوميسسيالاردى (performance fee) تولەۋدى، كاستوديالدىق قىزمەتتەردى، جىل سايىنعى سىرتقى اۋديت جۇرگىزۋ قىزمەتتەرىن، سونداي-اق اقپاراتتىق قىزمەتتەردى تولەۋدى قامتيدى. اۋديتكە تىكەلەي جۇمسالعان شىعىستار: 2022-جىلى - 74,5 ميلليون تەڭگە، 2023-جىلى - 84,3 ميلليون تەڭگە.
ۇلتتىق قوردىڭ تازا جيناقتارى 2023-جىلى 1,2 ەسەدەن استام ءوسىپ، 2339,9 ميلليارد تەڭگەنى قۇرادى. 2022-جىلدىڭ قورىتىندىسى بويىنشا، بۇل كورسەتكىش 1987,3 ميلليارد تەڭگە بولدى. ناتيجەسىندە ۇلتتىق قوردىڭ جالپى كولەمى 29114,8 ميلليارد تەڭگەنى (60 ميلليارد ا ق ش دوللارى) قۇرادى.
