ۇلتتىق قوردان 1,5 تريلليون تەڭگە: الماتىداعى ءىرى جوبالاردىڭ ساپاسى تەكسەرىلدى
استانا. KAZINFORM - الماتى قالاسىنا جانە الماتى وبلىسىنا جۇمىس ساپارىمەن بارعان پرەمەر-ءمينيستردىڭ ءبىرىنشى ورىنباسارى نۇرلىبەك نالىبايەۆ ۇلتتىق قور قارجىسى سالىنعان ءىرى ينفراقۇرىلىمدىق، الەۋمەتتىك جانە كوممۋنالدىق جوبالاردىڭ جۇزەگە اسىرىلۋ بارىسىمەن تانىستى. بۇل تۋرالى ۇكىمەتتىڭ باسپا ءسوز قىزمەتى ءمالىم ەتتى.
مەملەكەت باسشىسىنىڭ تىكەلەي قولداۋىمەن جوبالاردى ىسكە اسىرۋعا ۇلتتىق قوردان قوماقتى قاراجات بولىنۋدە. تەك بيىلدىڭ وزىنە قارالعان 1,5 تريلليون تەڭگە قارجىنىڭ شامامەن 60- 70 پايىزى دەنساۋلىق ساقتاۋ سالاسىنا باعىتتالعان.
سونىمەن قاتار مەملەكەت باسشىسى قازاقستان حالىق كەڭەسىنىڭ ءبىرىنشى سەسسياسىندا ايماقتارداعى تۇرعىن ۇيلەر، الەۋمەتتىك نىساندار، جول قۇرىلىسىن ساپالى ءارى ۋاقىتىلى جۇزەگە اسىرۋدىڭ ماڭىزىنا توقتالدى.
- كەيدە جاڭادان سالىنعان كەيبىر نىسانداردىڭ ساپاسى سىن كوتەرمەيدى، ءتىپتى، قوعام تالقىسىنا ءتۇسىپ جاتادى. بۇل تۇرعىدان العاندا، جول سالاسىنداعى احۋال دا ءماز ەمەس. سوندىقتان جول ساپاسىن باعالاۋ جۇيەسىن قايتا قاراۋ كەرەك. قۇرىلىس جۇمىسىن باسىنان اياعىنا دەيىن قاتاڭ قاداعالاۋ قاجەت. «جول اكتيۆتەرى ساپاسىنىڭ ۇلتتىق ورتالىعى» مەكەمەسىنىڭ قىزمەتىن كۇشەيتۋ كەرەك. جالپى، وسى سالاعا تۇبەگەيلى رەفورما جاساعان ءجون، - دەپ اتاپ ءوتتى ول.
جۇمىس ساپارى كەزىندە ۇكىمەت باسشىسىنىڭ ءبىرىنشى ورىنباسارىنا الماتى حالىقارالىق اۋەجايىنىڭ ينفراقۇرىلىمىن ودان ءارى دامىتۋ جوسپارى تانىستىرىلدى. جوسپاردا تەرمينال جانە ۇشۋ- قونۋ ينفراقۇرىلىمىن جاڭعىرتۋ، جاڭا رۋلدەۋ جولاعىن، جۇك پەررونىن سالۋ جانە سەرۆيستىك نىسانداردى دامىتۋ كوزدەلگەن.
مامىر ايىنداعى ساپارىندا ۇكىمەت باسشىسىنىڭ ءبىرىنشى ورىنباسارى الماتى قالاسىنىڭ اكىمىمەن بىرگە اۋەجايداعى جۇمىس ساپاسىن، ونىڭ تالاپتارعا ساي كەلمەيتىن كەمشىن تۇستارىن سىنعا الىپ، مەردىگەر مەكەمەگە ناقتى مىندەتتەر جۇكتەگەن بولاتىن. وسى جولى سول كەزدە بەرىلگەن تاپسىرمالاردىڭ ورىندالۋ دەڭگەيىنە باسا نازار اۋدارىلدى.
ودان كەيىن 8 شاقىرىمدىق P-17 «الماتى - تالعار - بايدىبەك بي» اۆتوجولىنىڭ ءتورت جولاققا دەيىن كەڭەيتىلۋى جوسپارلانعان اۋماقتى، «الماتى - بىشكەك» اۆتوجولىنىڭ 7 شاقىرىمىن قايتا جاڭعىرتۋ جوباسىن قاراپ شىقتى. مۇندا جول ءتورت جولاقتان سەگىز جولاققا دەيىن كەڭەيتىلىپ، ەكى جولايىرىق جانە توعىز جەرۇستى جۇرگىنشى وتكەلى سالىنادى. جوبا الماتى مەن قالا ماڭىنداعى نەگىزگى باعىتتاردىڭ ءبىرىنىڭ كولىك قوزعالىسىن جەڭىلدەتىپ، جول ينفراقۇرىلىمىنىڭ مۇمكىندىگىن كەڭەيتەدى.
كەلەسى نىسان - قالقامان شاعىن اۋدانىنداعى № 7-قالالىق كلينيكالىق اۋرۋحانا. ول جاڭارتۋدان كەيىن 900 ورىندىق بولادى. جوبا اۋرۋحانا كورپۋستارى مەن ينجەنەرلىك جۇيەلەرىن جاڭارتۋدى، قۇرىلىمداردى كۇشەيتۋدى جانە زاماناۋي مەديتسينالىق جابدىقتارمەن جاراقتاندىرۋدى قامتيدى.
الماتىنىڭ دەنساۋلىق ساقتاۋ سالاسىن دامىتۋعا ۇلتتىق قوردان 66 ميلليارد تەڭگە، رەسپۋبليكالىق بيۋدجەت قاراجاتى مەن الداعى جىلعا جوسپارلانعان قارجىلاندىرۋدى قوسا ەسەپتەگەندە، 196 ميلليارد تەڭگە قاراستىرىلعان.
- مەملەكەت باسشىسى قاراجاتتىڭ 60- 70 پايىزىن ءدال وسى دەنساۋلىق ساقتاۋ نىساندارىن سالۋعا ءبولۋدى تاپسىردى، ويتكەنى حالىققا ءبىرىنشى كەزەكتە زاماناۋي مەديتسينالىق ينفراقۇرىلىم قاجەت. ەندى وسى قاراجاتتى يگەرىپ، بارلىق جۇمىستى دەر كەزىندە اياقتاپ، نىسانداردى حالىق يگىلىگىنە بەرۋ كەرەك. بۇل - ۇكىمەت باسشىسىنىڭ دا باقىلاۋىنداعى اسا ماڭىزدى جوبالار، - دەدى نۇرلىبەك نالىبايەۆ.
ساپار بارىسىندا ساين كوشەسىن الماتى قالاسىنىڭ شەكاراسىنان ۇلكەن الماتى اينالما اۆتوموبيل جولىنا دەيىن ۇزارتۋ جوباسى دا قارالدى. جاڭا اۋماقتىڭ ۇزىندىعى 6,6 شاقىرىم، جوبا بويىنشا جول، ينجەنەرلىك كوممۋنيكاتسيالار جانە تەمىرجول ۇستىنەن وتەتىن جول وتكەلى سالىنادى. بۇل قالانىڭ قاراساي اۋدانىمەن جانە ءۇ ا ا ا ج ارقىلى كولىك بايلانىسىن جاقسارتادى.
بۇكىل اگلومەراتسيا ءۇشىن ماڭىزى بار تاعى ءبىر جوبا - الماتىنىڭ باتىس كارىز كوللەكتورى. نەگىزگى ۋچاسكەنىڭ ۇزىندىعى 35 شاقىرىم، بۇگىندە 17,9 شاقىرىم قۇبىر تارتىلعان. جوبا اياقتالعاننان كەيىن الماتىنىڭ ناۋرىزباي جانە الاتاۋ اۋداندارىنىڭ، سونداي-اق الماتى وبلىسىنىڭ ىرگەلەس اۋماقتارىنىڭ شامامەن 200 مىڭ تۇرعىنى ورتالىقتاندىرىلعان سۋ بۇرۋ جۇيەسىنە قوسىلۋ مۇمكىندىگىنە يە بولادى.
بۇدان كەيىنگى نىسان - 3,4 شاقىرىم اباي داڭعىلىن ءۇ ا ا ا ج-عا دەيىن ۇزارتۋ جوباسى. ونىڭ ماقساتى - جول، اقساي وزەنى ارقىلى كوپىر جانە ءۇ ا ا ا ج ۇستىنەن جول وتكەلىن سالۋ. جاڭا اۋماق الماتىدان شىعاتىن قوسىمشا باعىت قالىپتاستىرىپ، قاراساي اۋدانىمەن كولىك بايلانىسىن ءتيىمدى ەتەدى.
الماتىنىڭ الەۋمەتتىك نىساندارىمەن تانىسۋ سەيفۋللين كوشەسىندەگى 155 ورىندىق № 1-قالالىق پەرزەنتحاناعا جانە ايتەكە ءبي كوشەسىندەگى ءبىر اۋىسىمدا 500 كەلۋشى قابىلداۋعا ەسەپتەلگەن ەمحاناعا بارۋمەن جالعاستى.
اتالعان نىسانداردا تەك قالا تۇرعىندارىنا عانا ەمەس، بۇكىل اگلومەراتسياعا قىزمەت كورسەتىلەدى.
بۇعان دەيىن ق ر پرەمەر-ءمينيسترىنىڭ ءبىرىنشى ورىنباسارى نۇرلىبەك نالىبايەۆ كولىك مينيسترلىگىندە ۇكىمەت باسشىسى ولجاس اباي ۇلىنىڭ تاپسىرماسىنا سايكەس ۇيىمداستىرىلعان «ساپالى جولدار: جوسپارلاۋدان پايدالانۋعا دەيىن» تاقىرىبىنداعى ءۇش كۇندىك رەسپۋبليكالىق سەمينار- كەڭەستىڭ قورىتىندى وتىرىسىنا قاتىسقانىن جازدىق.
