«ۇلتتىق قور - بالالارعا!»: شوتقا تۇسەتىن سوما وسە مە

 استانا. KAZINFORM - ۇكىمەت باسشىسىنىڭ ورىنباسارى تامارا دۇيسەنوۆا بالالاردىڭ شوتىنا تۇسە باستاعان 100 دوللارعا قاتىستى تۇسىنىك بەردى.

«ءار بالانىڭ شوتىنا 150 دوللار تۇسەدى دەپ كۇتىلگەن، ناتيجەسىندە 100 دوللاردان ءتۇستى. ءبىز باسىندا بالالار قورىنا ينۆەستيتسيالىق كىرىستەردىڭ %50 ى دەگەنبىز. بىرىنشىدەن، بۇل كىرىسكە بايلانىستى، ەكىنشىدەن بالالاردىڭ سانىنا قاتىستى. اللاعا شۇكىر، تۋۋ كورسەتكىشى ارتىپ كەلەدى. بالالاردىڭ شوتىنا اقشا اۋدارۋدىڭ ەسەبىن وتكەن جىلى مامىردا قارجى مينيسترلىگى جاسادى. ءيا، ينفلياتسيانى ەسەپكە العاندا بۇل سوما از، ءبىراق بالا كامەلەت جاسىنا تولعاندا كىرىس ايتارلىقتاي بولادى»، - دەدى تامارا دۇيسەنوۆا سەنات قابىرعاسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي- اق، ۆيتسە-پرەمەر بالالاردىڭ شوتىنا قارجىنىڭ جىل بويى ۇزبەي ءتۇسىپ تۇراتىنىن ەسكە سالدى.

«ەلدەگى باسقا دا الەۋمەتتىك اكتيۆتەرگە سۇيەنە وتىرىپ، ۇلتتىق بانك زەينەتاقى اكتيۆتەرىنە قاتىستى 2014 -جىلدان باستاپ ۇلكەن تابىس اكەلەدى دەپ ايتا الامىن. ەگەر ۇلتتىق بانك ۇلتتىق قوردى باسقاراتىن بولسا، وندا جيناقتاۋ ءتيىستى دەڭگەيدە جۇرەدى دەپ كۇتەمىز. ماسەلە ەلدىڭ بايلىعىن بارلىق ساناتتاعى ازاماتتار اراسىندا تەڭدەي ءبولۋ، ءبىرىنشى بولىپ ءبىز بالالاردان باستادىق»، - دەيدى ول.

بۇعان دەيىن تامارا دۇيسەنوۆا ەلىمىزدە اليمەنت قورىن قۇرۋ مۇمكىندىگىن تۋرالى ايتقان ەدى.

ودان بولەك، ۇكىمەت باسشىسىنىڭ ورىنباسارى قوسىلعان قۇن سالىعى قايتا قارالىپ جاتقانىن حابارلادى.