ۇلتتىق قور بالالارعا: 2024-جىلى قانشا اقشا بولىنەدى؟
ۇلتتىق بانك ۇلتتىق قوردىڭ 2023-جىلعا ارنالعان ينۆەستيتسيالىق كىرىسىنىڭ كولەمىن جاريالادى، ونىڭ جارتىسى قازاقستاندىق بالالارعا اۋدارىلادى، - دەپ حابارلايدى Massaget.kz ءتىلشىسى.
ۇلتتىق بانك Tengrinews.kz رەسمي ساۋالىنا بەرگەن جاۋابىندا ۇلتتىق قوردىڭ 2023-جىلدىڭ 11 ايىنداعى ينۆەستيتسيالىق كىرىسى الدىن الا مالىمەتتەر بويىنشا 7,92 پايىز نەمەسە شامامەن 4,4 ميلليارد دوللار بولعانىن حابارلادى.
ۇلتتىق قوردىڭ اكتيۆتەرىن باسقارۋ پروتسەسى ۇزاق مەرزىمدى ينۆەستيتسيالاۋ قاعيداتى بويىنشا قۇرىلعانى اتاپ وتىلگەن. سوندىقتان ۇلتتىق قور كىرىسىندەگى بالالاردىڭ شوتتارىنا تۇراقتى جىل سايىنعى تولەمدەردى قامتاماسىز ەتۋ ماقساتىنداعى ەسەپتەۋدە 18 جىلداعى ورتاشا ينۆەستيتسيالىق كىرىستى پايدالانۋ تۋرالى شەشىم قابىلداندى.
«2005-2022-جىلدار ارالىعىنداعى تابىس جىلدىق ماندە 2,6 پايىز نەمەسە 1,4 ميلليارد دوللار بولدى. سايكەسىنشە، 2024-جىلى «ۇلتتىق قور – بالالارعا» باعدارلاماسى اياسىندا 2024-جىلى 18 جاسقا تولعانداردى قوسا العاندا، بارلىق الۋشىعا شامامەن 695,5 ميلليون دوللار بولىنەدى»، - دەپ حابارلادى ۇلتتىق بانك.
تولەمدەرگە سومالاردى ەسەپتەۋ ءۇشىن جىلجىمالى نەگىزدە ەسەپتەلەتىن ۇلتتىق قوردىڭ كەيىنگى 18 جىلداعى ورتاشا جىلدىق تابىسى پايدالانىلاتىنى، بالالاردىڭ ارنايى جيناقتاۋ شوتتارىنا ەسەپتەلەتىن ينۆەستيتسيالىق تابىستىڭ جىل سايىنعى سوماسى ۇلتتىق قوردىڭ تابىسىنا بايلانىستى وزگەرىپ وتىراتىنى تۇسىندىرىلەدى.
«تولەمدەردى جۇزەگە اسىرۋ ءتارتىبى، تولەنەتىن سومانى ەسەپتەۋ ادىستەمەسى جانە الۋشىلاردىڭ سانى ۇكىمەت 2024 -جىلعى قاڭتاردا بەكىتەتىن ەرەجەلەرگە سايكەس ايقىندالادى»، - دەپ قورىتىندىلادى ۇلتتىق بانك وكىلدەرى.
بۇعان دەيىن قارجى مينيسترلىگى ۇلتتىق قوردان قاراجات 2024-جىلعى 1- اقپاننان باستاپ بالالارعا تولەنە باستايتىنىن حابارلاعان بولاتىن.
