ۇلتتىق قور-بالالارعا: 18 گە تولعان شوت يەسى اقشاسىن باسپانا الۋ ءۇشىن قالاي شەشەدى
استانا. KAZINFORM - ءبىرىڭعاي جيناقتاۋشى زەينەتاقى قورى باسقارما ءتوراعاسىنىڭ ورىنباسارى ساۋلە ەگەۋبايەۆا رەداكسيا ساۋالىنا جولداعان جاۋابىندا «ۇلتتىق قور - بالالارعا» جوباسىنىڭ اقشاسىن باسپانا الۋ ءۇشىن قالاي شەشۋگە بولاتىنىن ءتۇسىندىردى.
«باعدارلاماعا قاتىسۋشى بالا كامەلەتكە تولعان سوڭ اقشاسىن پايدالانۋ تۋرالى شەشىم قابىلداسا، ول ۋاكىلەتتى وپەراتورعا ءوتىنىش بەرەدى. ال ب ج ز ق ونىڭ جيناقتارىن ۋاكىلەتتى وپەراتوردا اشىلعان بالانىڭ بانكتىك شوتىنا ا ق ش دوللارىمەن اۋدارادى. ۋاكىلەتتى وپەراتور جيناقتاردى 18 گە تولعان قازاقستان ازاماتىنىڭ تۇرعىن ءۇي جاعدايىن جاقسارتۋ نەمەسە ءبىلىم الۋىنا سول ساتتە وزەكتى بولاتىن ۆاليۋتا باعامى بويىنشا تەڭگەمەن اۋدارادى»، - دەلىنگەن جاۋاپتا.
ونىڭ ايتۋىنشا، بيىل 18 گە تولاتىن بالالاردىڭ شوتىنا نەشە دوللاردان اۋدارىلاتىنى ءالى بەلگىسىز.
«جەكە تۇلعالاردىڭ مەملەكەتتىك دەرەكقورىنان الىنعان مالىمەتتەر بويىنشا، 2024 -جىلدىڭ باسىنا باعدارلاماعا قاتىسۋشى رەتىندە تىركەلگەن بالالار سانى - شامامەن 7 ميلليون. ال، ءار بالانىڭ شوتىنا قانشالىقتى مولشەردە قارجى اۋدارىلاتىنى تۋرالى ماسەلەگە كەلسەك، ول قازاقستان ازاماتى بولىپ ەسەپتەلەتىن بالالاردىڭ سانى بويىنشا دەرەكتەرگە (2023 -جىلعى 31-جەلتوقساننىڭ سوڭىنداعى جاعداي بويىنشا) جانە ۇلتتىق قوردا ەسەپتەلگەن بالالارعا ارنالعان نىسانالى تالاپتاردىڭ جالپى سوماسىنا قاتىستى ۇلتتىق بانكتەن الىنعان اقپاراتقا نەگىزدەلە وتىرىپ ەسەپتەلەدى. نىسانالى تالاپتاردىڭ (18 جاسقا دەيىنگى بالالار ءۇشىن) جانە نىسانالى جيناقتاردىڭ (18 جاسقا 2024 -جىلى تولاتىن بالالار ءۇشىن) ەسەپتەلگەن سومالارى تۋرالى مالىمەتتەر بارلىق ەسەپتەۋ مەن تەكسەرۋ راسىمدەرى اياقتالعاننان كەيىن، 2024 -جىلعى اقپان ايىندا قولجەتىمدى بولادى. ولاردى ب ج ز ق جانە eGOV رەسمي سايتتارىنان دەربەس (بالانىڭ دەرەكتەرى بويىنشا) كورە الاسىزدار»، - دەپ جازادى س. ەگەۋبايەۆا.
اۆتور
ەسىمجان ناقتىباي
