ۇلتتىق قور اقشاسىن باقىلاۋعا ارنالعان تاعى ءبىر پرەزيدەنت جارلىعىنىڭ جوباسى جاريالاندى
استانا. KAZINFORM - جوعارى اۋديتورلىق پالاتا ۇلتتىق قوردان بولىنگەن قاراجاتتىڭ جۇمسالۋىنا مونيتورينگ جۇرگىزەتىن كوميسسيانىڭ جۇمىسىن جانداندىرۋدى كوزدەيتىن پرەزيدەنت جارلىعىنىڭ جوباسىن كوپشىلىك تالقىلاۋىنا شىعاردى.
ايتا كەتۋ كەرەك، بۇل كوميسسيا ەلىمىزدە 2014-جىلدان بەرى جۇمىس ىستەپ كەلەدى. ءبىراق ول كەزدە ۇلتتىق بانككە باعىنىشتى كونسۋلتاتيۆتىك-كەڭەسشى ورگان بولعان. 2020-جىلدان باستاپ قازىرگى جوعارى اۋديتورلىق پالاتاعا بەرىلگەن. ال بيىلعى 21-اقپاندا وسى كوميسسيانىڭ وتىرىسى جاڭا قۇراممەن، جاڭارتىلعان فورماتتا (بۇعان دەيىن كوميسسيا قاشىقتان جۇمىس ىستەپ كەلگەن) ءوتتى.
بۇدان بىلاي دا كوميسسيانىڭ وتىرىستارى وففلاين فورماتتا وتەدى دەپ جوسپارلانعان.
قۇرامى مەن جۇمىس فورماتى جاڭارتىلعان كوميسسيانىڭ نەگىزگى مىندەتتەرى مىنالار:
ۇلتتىق قوردان ەكونوميكانى جەڭىلدەتىلگەن شارتتارمەن قولداۋعا بولىنگەن قاراجاتقا تەكسەرىس جۇرگىزۋ؛
ۇلتتىق قور قاراجاتىن نەعۇرلىم باسىم باعىتتارعا قايتا ءبولۋ نەمەسە ولاردى قايتارۋ تۋرالى ۇسىنىستار بەرۋ.
كوميسسيانىڭ جاڭارتىلعان قۇرامى مىنانداي:
كوميسسيا ءتوراعاسى - جوعارى اۋديتورلىق پالاتاسىنىڭ ءتوراعاسى.
كوميسسيا مۇشەلەرى:
قارجى ءمينيسترى،
ۇلتتىق ەكونوميكا ءبىرىنشى ۆيتسە-ءمينيسترى،
ق ر پرەزيدەنتىنىڭ ەكونوميكالىق ماسەلەلەر جونىندەگى كومەكشىسى (بايقاۋشى رەتىندە)،
ۇلتتىق بانك ءتوراعاسىنىڭ ورىنباسارى،
باس پروكۋرورىنىڭ ورىنباسارى،
ستراتەگيالىق جوسپارلاۋ جانە رەفورمالار اگەنتتىگى ءتوراعاسىنىڭ ورىنباسارى،
قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى،
قارجىلىق مونيتورينگ اگەنتتىگى ءتوراعاسىنىڭ ورىنباسارى،
سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى،
پارلامەنت سەناتى قارجى جانە بيۋدجەت كوميتەتىنىڭ ءتوراعاسى (بايقاۋشى رەتىندە)
پارلامەنت ءماجىلىسى قارجى جانە بيۋدجەت كوميتەتىنىڭ ءتوراعاسى (بايقاۋشى رەتىندە)
مەملەكەتتىك كىرىستەر كوميتەتىنىڭ ءتوراعاسى،
ىشكى مەملەكەتتىك اۋديت كوميتەتىنىڭ ءتوراعاسى،
ۇلتتىق قاۋىپسىزدىك كوميتەتىنىڭ 4-قىزمەتى 4-دەپارتامەنتىنىڭ باستىعى،
«سامۇرىق-قازىنا» ۇ ءا ق» ا ق ەكونوميكا جانە قارجى جونىندەگى باسقارۋشى ديرەكتورى،
«بايتەرەك» ۇ ب ح» ا ق ءتوراعاسىنىڭ ورىنباسارى.
بۇعان دەيىن پرەزيدەنت جانىنداعى ۇلتتىق قوردى باسقارۋ كەڭەسىنىڭ مىندەتتەرى كەڭەيتىلەتىنىن جازعان ەدىك.
