ۇلتتىق قور اكسيالار ەسەبىنەن 500 ميلليارد تەڭگەگە تولىقتى

استانا. KAZINFORM - ۇلتتىق قور قازمۇنايگاز جانە قازاتومونەركاسىپ كومپانيالاردىڭ اكسيالارىن ساتىپ الۋ ەسەبىنەن 500 ميلليارد تەڭگەدەن اسا تابىس تاپتى. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ءمالىم ەتتى.

ونىڭ ايتۋىنشا، 2023-جىلى ۇلتتىق قور قاراجاتى ەسەبىنەن 1,3 تريلليون تەڭگەگە قازمۇنايگاز اكسيالارى ساتىپ الىنعان.

«بۇل فيسكالدىق ماسەلەلەرمەن بايلانىستى بولدى. دەگەنمەن، بۇل ينۆەستيتسيا ەكەنىن اتاپ وتكىم كەلەدى. ءبىز 1,3 تريلليون تەڭگە ينۆەستيتسيا سالدىق، قازىر بۇل پاكەتتىڭ قۇنى شامامەن 1,7 تريلليون تەڭگە. بۇل ۇلتتىق قورعا شامامەن 400 ميلليارد تەڭگە قوسىمشا تابىس اكەلدى، جامان كورسەتكىش ەمەس»، - دەدى تيمۋر سۇلەيمەنوۆ ءماجىلىستىڭ جالپى وتىرىسى بارىسىندا.

ودان بولەك، بيىل شىلدەدە ۇلتتىق قور 467 ميلليارد تەڭگەگە قازاتومونەركاسىپ كومپانياسىنىڭ اكسياسىن ساتىپ العان.

«قازاتومونەركاسىپ كومپانياسى دا جاقسى جۇمىس ىستەيدى، ونىڭ اكسيالارى باعالانادى. قازىر بۇل ينۆەستيتسيا 600 ميلليارد تەڭگەگە تايادى. بالكىم، بۇل تۇراقتى قۇرال ەمەس، ونى پايدالانۋدىڭ قاجەتى جوق، سوعان قاراماستان اكسيالار بويىنشا جاسالعان وسى ەكى ينۆەستيتسيا ۇلتتىق قورعا تابىس اكەلدى. ءبىراق، جۇيەلى قۇرال رەتىندە قولدانۋدىڭ قاجەتى جوق، بۇل تۇرعىدا دەپۋتاتتارمەن كەلىسەمىن»، - دەيدى ول.

قازاندا ۇكىمەت ۇلتتىق قور اكتيۆتەرىن 100 ميلليارد دوللارعا ۇلعايتۋ جوسپارىمەن بولىسكەن ەدى.