ۇلتتىق قۇرىلتايدا پرەزيدەنت ۇسىنعان باستامالار قالاي جۇزەگە اسادى

 استانا. KAZINFORM - مەملەكەتتىك كەڭەسشى ەرلان قارين اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا ايتىلعان پرەزيدەنت تاپسىرمالارى مەن باستامالارىن ورىنداۋ ماسەلەسى جونىندە كەڭەس وتكىزدى.

جيىنعا پرەمەر- ءمينيستردىڭ ورىنباسارى تامارا دۇيسەنوۆا، پرەزيدەنت اكىمشىلىگىنىڭ جاۋاپتى قىزمەتكەرلەرى مەن قۇرىلىمدىق بولىمشەلەرىنىڭ جەتەكشىلەرى، سونداي-اق مادەنيەت جانە اقپارات، عىلىم جانە جوعارى ءبىلىم، وقۋ-اعارتۋ، تۋريزم جانە سپورت، ىشكى ىستەر، سىرتقى ىستەر، قورعانىس مينيسترلىكتەرىنىڭ، قازاقستان حالقى اسسامبلەياسىنىڭ، قازاقستاننىڭ ستراتەگيالىق زەرتتەۋلەر ينستيتۋتىنىڭ جانە ق ر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ باسشىلارى قاتىستى.

كەڭەس بارىسىندا پرەزيدەنتتىڭ باستامالارى مەن تاپسىرمالارىن ورىنداۋ ءۇشىن ورتالىق جانە جەرگىلىكتى مەملەكەتتىك ورگانداردىڭ جۇمىسىن ۇيىمداستىرۋ ماسەلەسى ەگجەي-تەگجەيلى تالقىلاندى.

ەرلان قارين پرەزيدەنتتىڭ اتىراۋدا وتكەن قۇرىلتايداعى سوزىندە مادەني-گۋمانيتارلىق جانە يدەولوگيالىق سالاداعى مەملەكەتتىك ساياساتتىڭ تۇجىرىمدامالىق تىڭ تاسىلدەرى ايقىندالعانىن اتاپ ءوتتى.

مەملەكەت باسشىسىنىڭ باستامالارىن جۇزەگە اسىرۋ ءۇشىن ۋاكىلەتتى مەملەكەتتىك ورگاندارعا پارلامەنتپەن بىرلەسە وتىرىپ، ەسىرتكى وندىرەتىن ادامدارعا جاۋاپكەرشىلىكتى قاتاڭداتۋعا قاتىستى، سونداي-اق مەملەكەتتىك ناگرادالار، ونوماستيكا، ارحەولوگيالىق قىزمەت تۋرالى زاڭناماعا جانە باسقا دا زاڭ جوبالارىنا تۇزەتۋلەر ەنگىزۋ جونىندە تاپسىرما بەرىلدى.

سونىمەن قاتار لۋدومانيامەن كۇرەسۋ ءۇشىن كەشەندى باعدارلاما ازىرلەۋ تاسىلدەرى قاراستىرىلدى.

ۋاكىلەتتى مەملەكەتتىك ورگاندارعا پرەزيدەنت ۇسىنعان جالپى ۇلتتىق قۇندىلىقتاردى ارنايى كەشەندى جوسپارعا سايكەس ىلگەرىلەتۋ ءۇشىن جۇيەلى جۇمىس ۇيىمداستىرۋ مىندەتى جۇكتەلدى.

اۆتور

جانات قاپالبايەۆا