ۇلتتىق قۇرىلتاي مەملەكەت پەن قوعام اراسىنداعى باستى ديالوگ الاڭىنا اينالدى - مەملەكەتتىك كەڭەسشى

  استانا. KAZINFORM - مەملەكەتتىك كەڭەسشى ەرلان قارين «24.kz» تەلەارناسىنا بەرگەن سۇحباتىندا ۇلتتىق قۇرىلتايدىڭ قىزمەتى جونىندە ايتىپ، ونىڭ مەملەكەت پەن قوعام اراسىندا تىكەلەي ديالوگ ءوتىپ جاتقان باستى الاڭ ەكەنىن اتاپ ءوتتى.

بۇل رەتتە ديالوگ تەك قۇرىلتاي وتىرىستارىندا عانا ەمەس، جىل بويى جۇرەدى. قۇرىلتاي مۇشەلەرى ايتىلاتىن باستامالاردى جىل بويى پىسىقتايدى.

مەملەكەتتىك كەڭەسشى ۇلتتىق قۇرىلتاي قىزمەتىنىڭ كەيبىر اسپەكتىلەرى تۋرالى ايتىپ بەردى.

«ءار وتىرىستان كەيىن جۇمىس جوسپارى قابىلدانادى. ماسەلەن بيىلعى ناۋرىز ايىندا اتىراۋ قالاسىندا وتكەن ۇلتتىق قۇرىلتاي وتىرىسىنىڭ قورىتىندىسى بويىنشا جوسپارلانعان 9 زاڭنىڭ بەسەۋى قابىلداندى»، - دەپ اتاپ ءوتتى ەرلان قارين.

قابىلدانعان بەس زاڭ:

— ايەل قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى جونىندەگى زاڭ؛

— ويىن بيزنەسى جانە ويىنعا تاۋەلدىلىكپەن كۇرەسۋ ماسەلەلەرى بويىنشا زاڭنامالىق تۇزەتۋلەر؛

— ەسىرتكى ءوندىرۋدى جانە ساتۋدى ۇيىمداستىرعانى ءۇشىن قىلمىستىق جاۋاپكەرشىلىكتى كۇشەيتۋگە باعىتتالعان تۇزەتۋلەر؛

— ەلەكتروندىق تۇتىنۋ جۇيەلەرىن (ۆەيپتەردى) اكەلۋگە، وندىرۋگە، ساتۋعا جانە تاراتۋعا زاڭنامالىق تىيىم سالۋ؛

— ونوماستيكا جانە گەرالديكا سالاسىنداعى جۇمىستى جەتىلدىرۋ جانە ورتالىقتاندىرۋ جونىندەگى تۇزەتۋلەر.

ولار اتالعان سالالارداعى راسىمدەردى ايتارلىقتاي ناقتىراق رەتتەيدى.

سونىمەن بىرگە، ەرلان قارين ۇلتتىق قۇرىلتايدىڭ جۇمىسى تەك زاڭ جوبالاۋ قىزمەتىمەن عانا شەكتەلمەيتىنىن جەتكىزدى.

ماسەلەن، بيىلعى ماۋسىم ايىندا 2024-2026-جىلدارعا ارنالعان زاڭسىز ويىن بيزنەسى مەن لۋدومانياعا قارسى ءىس-قيمىلدىڭ كەشەندى جوسپارى قابىلداندى.