ۇلتتىق قۇرىلتاي مۇشەلەرى ۇسىنىستارىنىڭ ورىندالۋى ۇدايى باقىلاۋدا - ەرلان قارين
اتىراۋ. KAZINFORM - اتىراۋدا ۇلتتىق قۇرىلتايدىڭ ءۇشىنشى جيىنى ءوتىپ جاتىر. وعان پرەزيدەنت قاسىم- جومارت توقايەۆ، قۇرىلتاي مۇشەلەرى قاتىسىپ وتىر.
ۇلتتىق قۇرىلتايدىڭ جيىنىن ءتوراعا ورىنباسارى، مەملەكەتتىك كەڭەسشى ەرلان قارين اشىپ، اتقارىلعان جۇمىستارعا شولۋ جاسادى.
ونىڭ ايتۋىنشا، كەشە اتىراۋدا ۇلتتىق قۇرىلتايدىڭ ءۇشىنشى وتىرىسى اياسىندا جۇمىس سەكتسيالارىنىڭ ەل دامۋىنىڭ باسىم باعىتتارىن تالقىلادى.
«ۇلتتىق قۇرىلتاي مۇشەلەرى بەرگەن ۇسىنىستاردىڭ ورىندالۋى ۇدايى باقىلاۋدا. ماسەلەن ۇلىتاۋدا وتكەن ءبىرىنشى وتىرىس قورىتىندىسى بويىنشا 42 باستاما جۇمىسقا الىنسا، تۇركىستانداعى ەكىنشى وتىرىس ناتيجەسىنە سايكەس 100 دەن اسا ۇسىنىس نازارعا الىندى. ونىڭ ىشىندە مەملەكەت باسشىسىنىڭ قازىرگى ۋاقىتتا جۇزەگە اسقان كەيبىر باستامالارىن اتاپ وتكىم كەلەدى. ناشاقورلىققا جانە ەسىرتكى بيزنەسىنە قارسى كۇرەستىڭ كەشەندى جوسپارى بەكىتىلدى. وقۋشىلار مەن جاستار اراسىنداعى ەلەكتروندى تەمەكى مەن ۆەيپ قولدانۋ الدىن الۋعا باعىتتالعان جول كارتاسى قابىلداندى. «اۋىل - ەل بەسىگى» جوباسى قارقىندى ىسكە اسىرىلىپ جاتىر. شىعىس قازاقستان جانە اباي وبلىستارىندا جاڭا اۋداندار قۇرىلدى. «بالالار كىتاپحاناسى» جوباسى ىسكە استى. ءتىل ساياساتىن دامىتۋ تۇجىرىمداماسى بەكىتىلدى. ازىرەت سۇلتان تاريحي- مادەني قورىق مۋزەيىنە ۇلتتىق مارتەبە بەرىلدى»، - دەدى ەرلان قارين.
ونىڭ ايتۋىنشا، تۇركىستاندا وتكەن ەكىنشى وتىرىستان باستاپ، ۇلتتىق قۇرىلتاي جۇمىسى سەكتسيالار اياسىندا جۇرگىزىلەتىن بولدى. ءتورت سەكتسيانىڭ جۇمىس وتىرىستارى وسىدان ءبىر اي بۇرىن جانە كەشە ارنايى ۇيىمداستىرىلدى.
كەشە وتكەن سەكسيا جۇمىستارىنا ۇلتتىق قۇرىلتايدىڭ 76 مۇشەسى قاتىسىپ، ءوز ويلارىن ورتاعا سالدى. ناتيجەسىندە 100 دەن اسا ناقتى ۇسىنىس ايتىلىپ، بايىپتى باستامالار كوتەرىلدى. مۇنىڭ ءبارى قوعام بەلسەندىلەرى مەن مەملەكتەتتىك ورگاندار اراسىندا ءتيىمدى جانە اشىق ورناعانىن كورسەتەدى.
«سەكسيالاردا ايتىلعان ۇسىنىستاردىڭ باسىم بولىگى قوعام بىرلىگىن ودان ءارى نىعايتۋ، جالپىۇلتتىق قۇندىلىقتاردى دارىپتەۋ، ەلدىڭ عىلىمي الەۋەتىن كوتەرۋ، مادەنيەت سالاسىن قولداۋ، جەرگىلىكتى ءوزىن- ءوزى باسقارۋ جۇيەسىن دامىتۋ، كوشى- قون ماسەلەسىن رەتتەۋ جانە قوعامداعى وزگە دە وزەكتى ماسەلەلەرگە قاتىستى جاسالدى. ۇلتتىق قۇرىلتاي مۇشەلەرىنىڭ مۇنداي بەلسەندى قىزمەتى اتالعان ازاماتتىق ينستيتۋتتىڭ قوعام مەن مەملەكەت اراسىندا ءتيىمدى ديالوگ الاڭىنا اينالعانىن كورسەتەدى»، - دەدى ەرلان قارين.
قۇرىلتاي مۇشەلەرى وتاندىق ءوندىرىستى ۇلعايتۋ، ونىڭ ىشىندە ينفراقۇرىلىمدى دامىتىپ، تابىستى كاسىپورىندار اشۋ ىسىنە ەرەكشە توقتالدى.
سونداي- اق مەديتسينالىق- الەۋمەتتىك سالانى قارجىلاندىرۋ، ىشكى ميگراتسيانى جۇيەلەۋ جانە ەلدەگى باسپانا ماسەلەسىن جەتىلدىرۋ ءىسىن تالقىلاپ، ەكونوميكالىق كورسەتكىشتەردىڭ نەگىزگى فاكتورى - ادام كاپيتالىن دامىتۋ جايىن سارالادى.
