ۇلتتىق قۇرىلتاي ەل دامۋىنىڭ باعىتىن ايقىندايتىن بىرەگەي پلاتفورماعا اينالدى - بالايەۆا

اتىراۋ. KAZINFORM - ۇلتتىق قۇرىلتاي ەل دامۋىنىڭ باعىت- باعدارىن ايقىندايتىن بىرەگەي پلاتفورماعا اينالدى.

بۇل تۋرالى مادەنيەت جانە اقپارات ءمينيسترى ايدا بالايەۆا ۇلتتىق قۇرىلتايدىڭ «مادەنيەت. ونەر. رۋحانيات» جۇمىس سەكتسياسىنىڭ جيىنىندا ايتتى.

ەرتەڭ اتىراۋدا ۇلتتىق قۇرىلتايدىڭ ءۇشىنشى جيىنى وتەدى. بۇگىن قۇرىلتايدىڭ جۇمىس سەكسيالارىنىڭ جيىنى باستالدى.

«ۇلتتىق قۇرىلتاي ۇلت زيالىلارىنىڭ قوعامداعى قوردالانعان ماسەلەلەردى تالقىلايتىن، ەل دامۋىنىڭ باعىت-باعدارىن ايقىندايتىن بىرەگەي پلاتفورماعا اينالدى. تۇركىستاندا وتكەن ۇلتتىق قۇرىلتايدىڭ ەكىنشى وتىرىسىنان باستاپ جۇمىس فورماتى وزگەردى. قازىر «ازاماتتىق قوعام»، «مادەنيەت. ونەر. رۋحانيات»، «ءبىلىم جانە عىلىم»، «الەۋمەتتىك-ەكونوميكالىق دامۋ» دەپ اتالاتىن 4 سەكسيا جۇمىس ىستەيدى»، - دەدى ايدا بالايەۆا.

مينيستر ۇلتتىق قۇرىلتايدىڭ الدىڭعى وتىرىستارى مەن جۇمىس كەزدەسۋلەرىنىڭ قورىتىندىسى بويىنشا اتقارىلعان جۇمىستارعا توقتالدى.

«ەلىمىزدە «مەملەكەتتىك ناگرادالار تۋرالى» زاڭعا وزگەرىستەر ەنگىزىلىپ، «قازاقستاننىڭ حالىق جازۋشىسى» اتاعى قايتارىلدى. 2023-جىلى «قازاقستاننىڭ حالىق جازۋشىسى» اتاعىنا ت. ابدىك ۇلى، س. ەلۋبايەۆ، ب. نۇرجەكەيەۆ، س. سماتايەۆ، ا. اشيروۆ جانە ل. شاشكوۆا يە بولدى. پرەزيدەنت جارلىعىمەن «ازىرەت سۇلتان» مەملەكەتتىك تاريحي-مادەني مۇراجاي- قورىعىنا «ۇلتتىق» مارتەبەسى بەرىلدى. استانا، الماتى، شىمكەنت قالالارى مەن وبلىستاردىڭ وڭىرلىك رامىزدەرىن ازىرلەۋ جانە قولدانۋ تۋرالى ۇلگىلىك ەرەجەنىڭ جوباسى دايىندالدى. ياسساۋي تانۋ عىلىمي ورتالىعىنىڭ جۇمىس تۇجىرىمداماسى جانە 3 جىلدىق جۇمىس جوسپارى ازىرلەندى»، - دەدى مينيستر.