ۇلتتىق مارتەبە العان مۋزەيلەردە قانداي وزگەرىس بولادى
الماتى. KAZINFORM - الماتىدا ورنالاسقان مۋزەيلەردىڭ باسشىلارى ۇلتتىق مارتەبەگە بايلانىستى پىكىر ءبىلدىردى.

بىرنەشە كۇن بۇرىن پرەزيدەنت قاسىم-جومارت توقايەۆتىڭ جارلىعىمەن ەلىمىزدەگى ەكى مۋزەيگە ۇلتتىق مارتەبە بەرىلدى.
ولار - قازاقستان رەسپۋبليكاسىنىڭ مەملەكەتتىك ورتالىق مۋزەيى جانە ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيى. وسى ورايدا، Kazinform ءتىلشىسى مۋزەي باسشىلارىمەن تىلدەسىپ، جاڭا مارتەبە العان مۋزەيلەردە قانداي وزگەرىس بولاتىنىن سۇرادى.
قازاقستان رەسپۋبليكاسىنىڭ مەملەكەتتىك ورتالىق مۋزەيى ديرەكتورىنىڭ مىندەتىن اتقارۋشى عاليا تەمىرتوننىڭ ايتۋىنشا، ۇلتتىق مارتەبە مۋزەيگە جاڭا بيىكتەردى باعىندىرۋعا جول اشادى.
- 30-قاڭتار كۇنى مەملەكەت باسشىسى ءبىزدىڭ مۋزەيگە ۇلتتىق مارتەبە بەرۋ تۋرالى جارلىققا قول قويدى. بۇل جوعارى مارتەبەنىڭ بەرىلۋى - ەكى عاسىرداي تاريحى بار مۋزەيدىڭ وسى ۋاقىت ىشىندە تاريحىمىزدى ساقتاۋ، زەرتتەۋ مەن ناسيحاتتاۋدا اتقارعان ۇلكەن جۇمىسىنىڭ باعالانۋى دەپ تۇسىنەمىز. سونداي-اق بۇل مارتەبە الەۋمەتتىك ماسەلەلەردى دە شەشىپ جاتىر. ايتا كەتسەك، مۋزەي قىزمەتكەرلەرىنىڭ جالاقاسى كوتەرىلەدى. سوندىقتان قىزمەتكەرلەرىمىز دە بۇل جاڭالىققا قۋانىشتى. ارينە، جوعارى مارتەبە الۋىمىزعا بايلانىستى الدىعا قوياتىن ماقساتتارىمىز دا ۇلعايادى، - دەدى ول.
سونداي-اق عاليا تەمىرتون مۋزەيدىڭ الداعى جوسپارلارىمەن ءبولىسىپ، جاڭا مارتەبەگە بايلانىستى قانداي تالاپتار قويىلعانىن اتاپ ءوتتى.
- الداعى ۋاقىتتا جوسپارىمىز بويىنشا اۋقىمدى جۇمىستار جالعاسا بەرەدى. ونىڭ ىشىندە بۇگىنگى تالاپتارعا ساي تسيفرلاندىرۋ جۇمىستارى بار. مەملەكەتتىك رەەسترگە قانشاما زاتتاردىڭ عىلىمي اتريبۋتسياسىن ەنگىزىپ كەلەمىز. سونىمەن قاتار بىزگە شەتەلدە ساقتالىپ، ءبىراق بىزگە ءالى ءمالىم بولماعان ارحەوگرافيالىق جانە ەتنوگرافيالىق، سونىڭ ىشىندە ارحەولوگيالىق زاتتاردى زەرتتەپ، ىزدەۋ تالاپتارى قويىلىپ وتىر. ولاردى اكەلۋ مۇمكىن بولماعان جاعدايدا كوشىرمەسىن اكەلۋ دەگەن سەكىلدى پرەزيدەنت ۇلتتىق قۇرىلتايدا ايتقان تاپسىرمالارىن ورىنداي بەرەمىز، - دەدى مۋزەي باسشىسى.
ال ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىنىڭ ديرەكتورى گۇلايىم جۇمابەكوۆانىڭ ايتۋىنشا، ۇلتتىق مارتەبە مادەني مەكەمەگە ءبىرقاتار ارتىقشىلىقتار بەرەدى.
- ۇلتتىق مارتەبەنىڭ بەرىلۋى مۋزەيدىڭ جاڭا مۇمكىندىكتەرىن كەڭەيتەدى. اتاپ ايتقاندا، حالىقارالىق ىنتىماقتاستىقتى دامىتۋ - مارتەبە الەمدىك دەڭگەيدەگى تانىمال سۋرەتشىلەردى، كۋراتورلارمەن ساراپشىلاردى تارتۋعا ىقپال ەتەدى. ەكىنشى، كاسىبي كادرلار مەن مامانداردى تارتۋ. مارتەبەنىڭ جوعارىلاۋى مۋزەيدى ونەر، تاريح جانە مادەنيەت سالاسىنداعى بىلىكتى ماماندار ءۇشىن تارتىمدى مەكەمەگە اينالدىرادى. ءۇشىنشى، تۋريزمدى دامىتۋ. ۇلتتىق مارتەبە ىشكى جانە حالىقارالىق تۋريستەردى تارتۋعا ىقپال ەتىپ، قازاقستاندىق ونەردى الەمگە تانىتۋعا مۇمكىندىك بەرەدى. وسىلايشا، ۇلتتىق مارتەبەنىڭ بەرىلۋى مۋزەيدىڭ جاڭا دەڭگەيگە كوتەرىلۋىنە، سونداي-اق ەلدىڭ مادەني مۇراسىن ساقتاۋ مەن ناسيحاتتاۋداعى ءرولىن نىعايتۋعا جول اشادى، - دەدى گۇلايىم جۇمابەكوۆا.
ايتا كەتكەن ءجون، قازاقستان رەسپۋبليكاسىنىڭ مەملەكەتتىك ورتالىق مۋزەيىنىڭ تاريحي ⅩⅩ عاسىردىڭ باسىنان باستاۋ الادى. 1921-جىلعى ق ا ك س ر باسشىلىق قاۋلىسىمەن ورتالىق قازاق ولكەتانۋ مۋزەيى قۇرىلىپ، وعان ورىنبور ولكەسى مۋزەيىندەگى كوللەكتسيالاردىڭ ءبىر بولىگى بەرىلگەن. مۋزەي 1929-جىلى قازاق اۆتونوميالىق رەسپۋبليكاسىنىڭ جاڭا استاناسى - الماتىعا كوشىپ كەلىپ، ۆوزنەنسەنسكي كافەدارالدى شىركەۋىنىڭ عيماراتىنا ورنالاستى. 1944-جىلى قازاق ك س ر ورتالىق مەملەكەتتىك مۋزەيى دەپ اتالدى. مۋزەيدىڭ قازىرگى ورنالاسقان عيماراتى 1985-جىلى ارحيتەكتور يۋ. راتۋشنىي، ز. مۋستافينا جانە ب. رزاگاليەۆتىڭ ارنايى جوباسى بويىنشا سالىنىپ، بۇگىنگى كۇنى الماتى قالاسىنداعى كورىكتى ارحيتەكتۋرالىق عيماراتتاردىڭ ءبىرى سانالادى. 2006-جىلدان باستاپ مۋزەي عىلىمي-زەرتتەۋ مەكەمەسى ستاتۋسىن يەلەنگەن.
ال ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيى بيىل 90 -جىلدىق مەرەيتويىن تويلاپ وتىر. مۋزەي تاريحى قازاق ك س ر- دا كورمە وتكىزۋ تۋرالى قاۋلى شىققان 1935-جىلدان باستالادى. 1965-جىلى ارنايى جاڭا عيمارات سالىنعان. قازاق بەينەلەۋ ونەرىنىڭ نەگىزىن قالاۋشى، داڭقتى سۋرەتشىسى ءابىلحان قاستەيەۆتىڭ ەسىمى مۇراجايعا 1984-جىلى بەرىلىپ، گالەرەياعا ورتالىق كىرەبەرىستىڭ الدىندا ونىڭ ەسكەرتكىشى ورناتىلدى.
ەسكە سالايىق، بۇعان دەيىن الماتى مۋزەيلەرىنە 2024-جىلى 300 مىڭ ادام كەلگەنىن جازعانبىز.