ۇلتتىق ۇلان قىزمەتكەرلەرى تۇزەۋ مەكەمەلەرىنە 140 ۇيالى تەلەفوندى وتكىزۋ ارەكەتتەرىن توقتاتتى
استانا. KAZINFORM - ق ر ءى ءى م ۇلتتىق ۇلاننىڭ اسكەري قىزمەتشىلەرى قىلمىستىق-اتقارۋ جۇيەسى قىزمەتكەرلەرىمەن بىرلەسىپ، جازالاۋ ورىندارىنا جانە تىيىم سالىنعان زاتتاردى وتكىزۋ مەن تاسىمالداۋدىڭ جولىن كەسۋ بويىنشا جۇمىستارىن جالعاستىرىپ جاتىر.
قازىرگى ۋاقىتتا ۇلتتىق ۇلاننىڭ قاراۋىلداۋ جانە اسكەري جاساق باقىلاۋشىلارى قازاقستاننىڭ قىلمىستىق-اتقارۋ مەكەمەلەرىن قورعاپ جاتىر. كۇن سايىن وسى مەكەمەلەردىڭ قاۋىپسىزدىگىن قامتاماسىز ەتۋ جانە جازاسىن وتەۋشىلەردىڭ ءتارتىبىن باقىلاۋ ءۇشىن 2000 عا جۋىق اسكەري قىزمەتشى كەزەكشىلىك اتقارادى.
بيىل كۇزەت قىزمەتى مەن اسكەري جاساق باقىلاۋشىلارى تىيىم سالىنعان زاتتاردى وتكىزۋدىڭ 20 وقيعاسىن بولدىرمادى. 140 ۇيالى تەلەفون، 152 دانا SIM- كارتا، 45 پىشاق پەن وتكىر قۇرال، 420 گرامنان استام ماريحۋانا، 20 ليتر سپيرتتىك سۋسىندار تاركىلەندى.
17 زاڭ بۇزۋشى ۇستالىپ، تەرگەۋ-جەدەل توپقا تاپسىرىلدى.
ايتا كەتەيىك، قىلمىستىق-اتقارۋ جۇيەسىندە زاڭدىلىق پەن ءتارتىپتى ساقتاۋ ۇلتتىق ۇلاننىڭ ماڭىزدى مىندەتتەرىنىڭ ءبىرى سانالادى.
ۇلتتىق ۇلاننىڭ اسكەري قالاشىقتارىندا مىڭعا جۋىق كامەرا ورناتىلاتىنىن جازعان بولاتىنبىز.
اۆتور
ەلميرا ورالبايەۆا
