ۇلتتىق ۇلان «بايتەرەك» عارىشتىق زىمىران كەشەنىن مەملەكەتتىك كۇزەتپەن قامتاماسىز ەتۋى مۇمكىن

استانا. KAZINFORM - «بايتەرەك» عارىشتىق زىمىران كەشەنىن قۇرۋ جۇمىستارى بەلسەندى جۇرگىزىلىپ جاتىر. بۇل جايىندا سەنات دەپۋتاتتارىنىڭ ساۋالىنا پرەمەر-مينيستر ولجاس بەكتەنوۆتىڭ جاۋابىندا ايتىلعان.

- «بايتەرەك» عارىشتىق زىمىران كەشەنى بويىنشا بۇگىنگى تاڭدا جۇمىستار بەلسەندى ساتىسىندا تۇر. «س ە ن ك ي» ا ق (باس ازىرلەۋشى ۇيىم) كونسترۋكتورلىق جانە پايدالانۋ قۇجاتتاماسىن ازىرلەۋدى، تەحنولوگيالىق جابدىقتاردى دايىنداۋدى جالعاستىرۋدا. 2024 -جىلدىڭ قىركۇيەگىندە «بايقوڭىر» عارىش ايلاعىنا زاۋىتتىق سىناقتان وتكەن العاشقى تەحنولوگيالىق جابدىق جەتكىزىلدى. قازاقستان تاراپىنان جوبا ءتيىستى ينفراقۇرىلىم قۇرىلىسىن قارجىلاندىرۋدىڭ قاجەتتى كولەمىمەن قامتاماسىز ەتىلگەن. 2025-2027 -جىلدارعا رەسپۋبليكالىق بيۋدجەتتە 63 ميلليارد تەڭگە قاراستىرىلعان، - دەپ اتاپ وتەدى ۇكىمەت باسشىسى جاۋابىندا.

ونىڭ دەرەگىنشە، 2024 -جىلعى 25-قاراشا مەن 8-جەلتوقسان ارالىعىندا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن «بايتەرەك» ب ك» ا ق وكىلدەرىنەن قۇرالعان بىرلەسكەن كوميسسيا «بايتەرەك» ع ز ك قۇرامداس بولىكتەرىنىڭ جابدىقتارىن دايىنداۋ جونىندەگى جۇمىستاردىڭ ناقتى ورىندالۋىن تەكسەرۋ ءۇشىن رەسەيلىك كاسىپورىندارعا باردى. تەكسەرۋ ناتيجەلەرى بويىنشا «بايتەرەك» ع ز ك قۇرۋ شارتىنىڭ تالاپتارىنا سايكەس ناقتى ورىندالعان جۇمىس كولەمى راستالدى. «بايتەرەك» ع ز ك وبەكتىلەرىن ۇستاۋ جانە پايدالانۋ كەزىندە قاۋىپسىزدىكتى قامتاماسىز ەتۋ ماقساتىندا «شەريف-ن» ج ش س جەكە مامانداندىرىلعان كۇزەت ۇيىمى تارتىلدى.

- «بايتەرەك» ع ز ك مەملەكەتتىك كۇزەتپەن قامتاماسىز ەتۋ ءۇشىن ۇلتتىق ۇلاندى تارتۋ ماسەلەسى قوسىمشا پىسىقتالىپ جاتىر. ول ءۇشىن ۇكىمەتتىڭ 2011 -جىلعى 7-قازانداعى № 1151 «مەملەكەتتىك كۇزەتىلۋى ءتيىس وبەكتىلەردىڭ كەيبىر ماسەلەلەرى» قاۋلىسىنا سايكەس كەشەندى مەملەكەتتىك قورعاۋعا جاتاتىن وبەكتىلەردى ينجەنەرلىك- تەحنيكالىق نىعايتۋ جونىندەگى تالاپتارعا سايكەس كەلتىرۋ بويىنشا جۇمىستار جۇرگىزىلىپ جاتىر، - دەدى ولجاس بەكتەنوۆ.

اۆتور

مارلان جيەمباي