ۇلتتىق كىتاپحانا تەرگەۋ يزولياتورىنا 400 گە جۋىق كىتاپ سىيلادى

кітап сыйлады
فوتو: Polisia.kz

الماتى. KAZINFORM - ۇلتتىق كىتاپحانا الماتىداعى تەرگەۋ يزولياتورىنا 400 گە جۋىق كىتاپ سىيلادى.

پوليتسيا دەپارتامەنتىنىڭ مالىمەتىنشە، الماتى جانە جەتىسۋ وبلىستارى بويىنشا قىلمىستىق-اتقارۋ جۇيەسى دەپارتامەنتىنىڭ №72-مەكەمەسىندەگى تەرگەۋ تۇتقىنىنداعىلار مەن شارۋاشىلىق جاساقتاعى سوتتالعاندار ءۇشىن كىتاپحانا جۇمىس ىستەيدى. وندا 6 مىڭنان استام كىتاپ قورى بار.

جۋىردا ۇلتتىق كىتاپحانا اتالعان تەرگەۋ يزولياتورىنىڭ كىتاپحاناسىنا 400 گە جۋىق قازاق تىلىندە باسىلعان كىتاپ تارتۋ ەتتى.

«تەرگەۋ تۇتقىنىنداعىلار مەن سوتتالعانداردىڭ قازاق تىلىندەگى كىتاپتارعا دەگەن سۇرانىسى جوعارى. ولار الدىن الا كەرەكتى كىتاپتارىنا تاپسىرىس بەرەدى، سول بويىنشا كىتاپحاناشى كامەرالارعا تاراتىپ شىعادى. ال، شارۋاشىلىق قىزمەتىندەگى سوتتالعاندار كىتاپحاناعا بارىپ وقيدى. كىتاپ وقۋ ارقىلى ادام ءوز ءبىلىمىن تولىقتىرىپ، ومىردەن ءوز ورنىن تابۋعا تىرىسادى»، - دەيدى تاربيە ءبولىمىنىڭ باستىعى قادىربەك تۇرلىبەكوۆ.

ۇلتتىق كىتاپحانا تارتۋ ەتكەن كىتاپتاردىڭ ىشىندە قازاق حالقىنىڭ عاسىرلار بويى جيناعان اسىل مۇراسى، تاريحى، مادەنيەتى، سالت-ساناسى، فيلوسوفياسى، پەداگوگيكاسى، ونەرى تۇگەل قامتىلعان «بابالار ءسوزى» جيناعى دا بار.

ەسكە سالا كەتەيىك، بۇعان دەيىن الماتىدا بىرنەشە كوشەگە تانىمال تۇلعالاردىڭ ەسىمدەرى بەرىلەتىنىن جازعان ەدىك.

اۆتور

الما مۇقانوۆا

سوڭعى جاڭالىقتار