ۇلتتىق ەكونوميكا ءمينيسترىنىڭ ەكس-ورىنباسارىنا سوت ۇكىمى شىقتى

مەدەۋ اۋدانىنىڭ 2№ سوتىندا ۇلتتىق ەكونوميكا ەكس-ۆيتسە-ءمينيسترى ءىلياس وسەروۆكە (الماتى قالاسى اكىمىنىڭ بۇرىنعى ورىنباسارى)، ۇلتتىق قاۋىپسىزدىك كوميتەتى دەپارتامەنتى باستىعىنىڭ بۇرىنعى ورىنباسارى تالعات مۇحانوۆقا جانە الماتى قالاسى قارجى باسقارماسىنىڭ ەكس-باسشىسى اينۇر قۇدايبەرگەنوۆاعا قاتىستى سوت پروتسەسى اياقتالدى، دەپ حابارلايدى قازاقپارات ءتىلشىسى.

Мухтор Холдорбеков/ МИА «Казинформ»
Фото: Мухтор Холдорбеков/ МИА «Казинформ»

«سوتتا انىقتالعانىنداي، ۇ ق ك د ورىنباسارى الداۋ جولىمەن الماتى قالاسى اكىمىنىڭ ورىنباسارى ءو. جانە مەملەكەتتىك اكتيۆتەر باسقارماسىنىڭ باسشىسى ق. ارقىلى سوت ۇكىمى بويىنشا تاركىلەنگەن 5 مۇلىك نىسانىن كورىنەۋ تومەندەتىلگەن باعامەن يەلەنگەن»، - دەپ ءمالىم ەتتى قالالىق سوتتان.

ايىپتالۋشىلار ءوز كىنالارىن مويىندامادى. سوتتان وزدەرىن اقتاۋدى سۇرادى. ⠀

ولاردىڭ كىناسى ءىس بويىنشا جينالعان ايعاقتار، كۋاگەرلەردىڭ جاۋاپتارى، سوت ساراپتامالارىنىڭ جانە اۋديتورلىق قورىتىندى ارقىلى دالەلدەندى.

سوت ايىپتالۋشىلاردى كىنالى دەپ تانىپ، كەلەسىدەي جازا تاعايىندادى:

ۇلتتىق قاۋىپسىزدىك كوميتەتىنىڭ الماتى قالاسى بويىنشا دەپارتامەنتى باستىعىنىڭ بۇرىنعى ورىنباسارى تالعات مۇحانوۆقا - مەملەكەتتىك قىزمەتتە لاۋازىمداردى اتقارۋ قۇقىعىنان جانە ۇلتتىق قاۋىپسىزدىك كوميتەتىنىڭ پولكوۆنيگى اتاعىنان ءومىر بويىنا ايىرا وتىرىپ، 8 جىلعا باس بوستاندىعىنان ايىرۋ؛

ۇلتتىق ەكونوميكا ەكس-ۆيتسە-ءمينيسترى ءىلياس وسەروۆكە - مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 5 جىلعا باس بوستاندىعىنان ايىرۋ؛

الماتى قالاسى قارجى باسقارماسىنىڭ بۇرىنعى باسشىسى اينۇر قۇدايبەرگەنوۆاعا - مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 5 جىلعا باس بوستاندىعىنان ايىرۋ.

«جازا تاعايىنداۋ كەزىندە سوت جاۋاپكەرشىلىكتى جەڭىلدەتەتىن ءمان-جايلاردى - سوتتالۋشىلاردا سوتتىلىقتىڭ جوقتىعىن، كامەلەتكە تولماعان جانە كىشكەنتاي بالالارىنىڭ بولۋىن، سونداي-اق ءبىر سوتتالۋشى م. - ءنىڭ (ت. مۇقانوۆتىڭ) زالالدى وتەۋىن ەسكەردى»، - دەپ اتاپ ءوتتى قالالىق سوتتان.

سوتتالعاندار جازانى قاۋىپسىزدىگى ورتاشا مەكەمەدە وتەيدى.

ۇكىم زاڭدى كۇشىنە ەنگەن جوق.

سوڭعى جاڭالىقتار