ۇلتتىق جاساندى ينتەللەكت ورتالىعى قانداي پايدا بەرمەك
كەلەر جىلدان باستاپ قازاقستاندا جاساندى ينتەللەكتىنى كەڭىنەن قولداناتىن جانە سيفرلىق تەحنولوگيالاردى دامىتۋعا نەگىزدەلگەن ءىرى ۇلتتىق ورتالىق قۇرىلادى. بۇنى مەملەكەت باسشىسى قازاقستان حالقىنا جولداۋىندا ايتقان بولاتىن. ەندىگى ماسەلە - ورتالىق قۇرىلعان جاعدايدا ەلىمىزگە قانداي ارتىقشىلىقتار بەرۋى مۇمكىن؟ Kazinform ءتىلشىسى وسى ساۋالدى حالىقارالىق جوبالاردا تاجىريبەلى IT مامان تالعات بەكقاليەۆكە قويىپ كوردى.
جاساندى ينتەللەكتىنىڭ كەلەشەگىنە قاتىستى بولجامدار جەتەرلىك. ءتىپتى، وتكەن اپتادا استانادا ورتا دەرجاۆالار تاقىرىبىنا ارنالعان ەكى كۇندىك حالىقارالىق فورۋمدا ەرەكشە تاپسىرمالار جونىندەگى قازاقستاندىق ەلشى اسقار تاجيەۆ «كەلەشەكتە جاساندى ينتەللەكت تە وزىنشە ءبىر دەرجاۆاعا اينالىپ، بارلىق سالاعا دەندەپ ەنەدى» دەگەن توسىن پىكىرىن ايتقان بولاتىن. جالپى، كەيىنگى جىلدارى ەلىمىز وسى سالاعا كوبىرەك كوڭىل ءبولىپ جاتقانى اڭعارىلادى.
- ەگەر ۇلتتىق ورتالىق قۇرىلسا، بىرنەشە ماڭىزدى جۇمىستار اتقارماق. بىرىنشىدەن، جاساندى ينتەللەكت سالاسىنداعى وتاندىق جانە حالىقارالىق تالانتتاردى قىزمەتكە الىپ، ينۆەستيتسيا تارتۋعا كومەكتەسەدى. ەكىنشىدەن، ءار ءتۇرلى سەكتورلاردا جاساندى ينتەللەكتتىڭ ەنگىزىلۋى ەكونوميكالىق وسىمگە ىقپال ەتپەي قويمايدى. ياعني، ەلدىڭ ءال-اۋقاتىن كوتەرۋگە سەپتەسەدى. ۇشىنشىدەن، زەرتتەۋشىلەردى، كاسىپكەرلەردى جانە ونەركاسىپ ماماندارىن ءبىر جەرگە جيناۋ ارقىلى اكادەميالىق زەرتتەۋلەر جاسالىپ، جاساندى ينتەللەكتىنى پراكتيكا جۇزىندە قولدانا باستايمىز، - دەدى تالعات بەكقاليەۆ.
بۇعان قوسا، ماماننىڭ ايتۋىنشا، ورتالىقتىڭ ءتيىمدى جۇمىس ىستەۋى ءۇشىن جاۋاپكەرشىلىك كەرەك.
- مەنىڭ ويىمشا، بۇل باستاما ەلىمىزدىڭ جاھاندىق جاساندى ينتەللەكت سالاسىنداعى پوزيتسياسىن جاقسارتا الادى، بۇعان پوتەنسيالىمىز جەتكىلىكتى. الايدا ونىڭ تابىستى جۇمىس ىستەۋى ءۇشىن ءتيىمدى باسقارىپ، بىلىكتى كادرلاردى تارتىپ، ولاردى ۇستاپ تۇرا الۋىمىز قاجەت، - دەپ تۇيىندەدى ول.
ۇلتتىق ورتالىق 2025 -جىلى استانادا قۇرىلماق. وقۋشىلاردان باستاپ، ستۋدەنتتەرگە، عالىمدار مەن كاسىپكەرلەرگە ءاردايىم اشىق بولاتىنى ايتىلعان. سونداي- اق ورتالىق سيفرلىق اكتيۆتەر مەن ماينينگتى زاڭمەن رەتتەۋگە، كريپتوبيرجالاردى ودان ءارى دامىتۋ ىسىنە ۇلەس قوسادى.
اۆتور
ماديار تولەۋوۆ
