ۇلتتىق عىلىمي كەڭەستەردە مۇددەلەر قاقتىعىسى بار - سمايىلوۆ

- جوبالاردى ىرىكتەۋ جۇيەسىندەگى كەمشىلىكتەر قاراجاتتىڭ ۋاقىتىلى جانە وبەكتيۆتى ءبولىنۋىن قامتاماسىز ەتپەيدى. عىلىم سۋبەكتىلەرىن اككرەديتتەۋ ءبىرىڭعاي جۇيەسىز ىسكە اسىرىلعان. 212 زاڭدى تۇلعاعا اككرەديتتەۋ ولاردىڭ زەرتتەۋلەردى جۇرگىزۋگە تەحنولوگيالىق قابىلەتتىلىگىن ايقىنداماي بەرىلگەن. 2025-جىلعى كونكۋرستار 208 كۇنگە دەيىن كەشىكتىرىلىپ جاريالانعان. بۇل زەرتتەۋلەردىڭ باستالۋى مەن بۇكىل ىسكە اسىرۋ سيكلىنا كەرى اسەر ەتتى،-دەدى ول.

ونىڭ سوزىنە قاراعاندا، ساراپتاما جۇرگىزۋ دە ۋاقىتىلى ىسكە اسىرىلماي، ارتىق جۇكتەمەمەن جۇرگىزىلگەن. ماتەريالدار ۇلتتىق عىلىمي كەڭەستەرگە 93 جۇمىس كۇنىنە دەيىن كەشىكتىرىلىپ بەرىلگەن. ەكونوميكالىق ساراپتاۋ بيۋدجەتتىك فيلتر قۇرالىنا اينالماعان.

- ۇلتتىق عىلىمي كەڭەستەر 545 جوبا بويىنشا قارجىلاندىرۋدى 12 ميلليارد تەڭگەگە ازايتۋ جونىندەگى ۇسىنىستاردى ەسكەرمەگەن. مۇددەلەر قاقتىعىسىنىڭ تاۋەكەلى دە ساقتالىپ وتىر. ۇلتتىق عىلىمي كەڭەستەردىڭ 225 مۇشەسىنىڭ 84 ءى 52 ميلليارد تەڭگەنى قۇرايتىن 127 جوبانىڭ زەرتتەۋ توپتارىنا كىرگەن، ال 27 مۇشەسى جوبالاردىڭ عىلىمي جەتەكشىلەرى بولعان، - دەدى ءاليحان سمايىلوۆ.

پالاتا ءتوراعاسىنىڭ ايتۋىنشا، عىلىم اكادەمياسىنىڭ فورسايتتىق زەرتتەۋلەردى مىندەتتى تۇردە قاراۋ جانە ىسكە اسىرۋ تەتىگى جوق.