ۇلتتىق عىلىم اكادەمياسى وتاندىق عىلىمدى قالاي دامىتادى

استانا. KAZINFORM – ق ر پرەزيدەنتى جانىنداعى ق ر ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ استانا قالاسىنىڭ جەتەكشى عالىمدارىمەن كەزدەستى جانە اكادەميانىڭ الداعى جۇمىس جوسپارى تۋرالى ايتىپ بەردى.

2022-جىلى قازاقستاننىڭ ۇلتتىق عىلىم اكادەمياسىنىڭ 75 جىلدىق مەرەيتويلىق سەسسياسىندا پرەزيدەنت قاسىم-جومارت توقايەۆ اكادەمياعا مەملەكەتتىك مارتەبە بەرىپ، ءرولىن ارتتىرۋدى تاپسىرعان بولاتىن. وتكەن ايدا ق ر ۇلتتىق عىلىم اكادەمياسىنىڭ جاڭا باسشىسى لاۋازىمىنا اقىلبەك كۇرىشبايەۆ تاعايىندالدى.

«قازىر عىلىمي قوعامداستىقتا «قازاقستاندىق عىلىمدى دامىتۋدا پرەزيدەنت جانىنداعى جاڭادان قۇرىلعان ۇلتتىق عىلىم اكادەمياسى قانداي ءرول اتقارادى؟» دەگەن ساۋال ورىندى قويىلىپ وتىر. ءبىز ەڭ الدىمەن، ەجەلدەن قالىپتاسقان عىلىمدى باسقارۋ جۇيەسىن تەڭسەلتىپ الۋدان ساقتانۋىمىز كەرەگىن ءتۇسىنۋىمىز قاجەت. ياعني، بۇل ارادا اكادەميا عىلىمي مەكەمەلەردى ءبىر ۆەدومستۆودان ەكىنشىسىنە اۋىستىرىپ، تەك نۇسقاۋ بەرەتىن ەكىنشى مەملەكەتتىك ۋاكىلەتتى ورگانعا اينالماۋى كەرەك. قازىرگى جاڭارعان اكادەميانىڭ وزىندىك بىرەگەي ميسسياسى بار، ول عىلىمدى باسقارۋ سالاسىندا كەتكەن جۇيەلى ولقىلىقتاردىڭ ورنىن تولتىرۋدى كوزدەيدى»، - دەدى اقىلبەك كۇرىشبايەۆ Nazarbayev University عيماراتىندا وتكەن كەزدەسۋدە.

ونىڭ ايتۋىنشا، اكادەميانىڭ جاڭا ميسسياسىنىڭ نەگىزىن قۇرايتىن بىرنەشە العىشارتتار بار: وتاندىق جەتەكشى عالىمداردىڭ كۇش-جىگەرىن ءبىر ارناعا بىرىكتىرۋ، ق ر عىلىمي-تەحنيكالىق دامۋ باعىتتارىن بارلىق مۇددەلى تاراپتاردىڭ سىندارلى تالقىلاۋى ءۇشىن جاعداي جاساۋ.

«اكادەميا تالانتتى جاستاردى تارتۋمەن قاتار، ەكونوميكا مەن قوعامنىڭ دامۋىنا ەلەۋلى ينتەللەكتۋالدىق ۇلەس قوسۋعا قابىلەتتى، تاجىريبەلى عالىمداردىڭ باسىن قوساتىن عىلىمي ورتالىققا اينالۋى قاجەت. اكادەميانىڭ نەگىزگى مىندەتتەرىنىڭ ءبىرى - عىلىمي زەرتتەۋلەردىڭ باسىم باعىتتارىن انىقتاۋ. ەلدەگى عىلىمدى دامىتۋدىڭ باسىمدىقتارى قالاي انىقتالاتىنىن جانە تەحنولوگيالىق جاعىنان دامىعان ەلدەردىڭ تاجىريبەسىمەن سالىستىرساق، ءبىزدىڭ ەلدە عىلىم سالاسى قارجىلاندىرۋدى بولۋگە كوبىرەك تاۋەلدى ەكەنىن بايقايمىز، ءارى ونىڭ ناتيجەسى مەملەكەتتىڭ قاجەتتىلىكتەرىنە ەمەس، ەڭ الدىمەن عالىمداردىڭ مۇمكىندىكتەرىنە نەگىزدەلەدى»، - دەيدى اكادەميا پرەزيدەنتى.

ا. كۇرىشبايەۆ عىلىمنىڭ بارلىق سالالارىن كونكۋرستىق نەگىزدە قارجىلاندىرۋدىڭ ءۇش جىلدىق مەرزىمىنە سۇيەنگەن ءبىر ۇلگىدەگى ءتاسىل اسىرەسە ىرگەلى زەرتتەۋلەردىڭ تيىمدىلىگىنىڭ تومەندەۋىنە اكەپ سوققانىن ايتتى.

«قازاقستان - الەمدىك ەكونوميكانىڭ تۇتاس ءبىر بولىگى. حالىق سانىنىڭ جوعارى ءوسۋ قارقىنىن جانە ەل الدىندا تۇرعان اۋقىمدى مىندەتتەردى ەسكەرە وتىرىپ، قازىرگى قازاق عىلىمى ەڭ الدىمەن پراگماتيكالىق باعىتقا اينالۋى ءتيىس. بۇل باعىتتا اكادەميا جاڭا عىلىمي يننوۆاتسيالاردى ەكونوميكانىڭ ناقتى سەكتورىندا قولدانۋدىڭ ءتيىمدى تەتىكتەرى اياسىندا ۇسىنىستار ەنگىزەدى. الىپ تەرريتورياسى بار ەل ءۇشىن ايماقتىق عىلىمدى دامىتۋ وتە ماڭىزدى. ال بۇل جۇمىستى جەرگىلىكتى اتقارۋشى ورگاندارمەن بىرلەسىپ جۇرگىزۋىمىز كەرەك»، - دەدى اقىلبەك كۇرىشبايەۆ.