ۇلتتىق عىلىم اكادەمياسى جوعارى عىلىمي ۇيىم رەتىندە قايتا فورماتتالادى

ғылым
فوتو: Wikipedia

استانا. KAZINFORM - بۇگىن ءماجىلىستىڭ جالپى وتىرىسىندا «عىلىم جانە تەحنولوگيالىق ساياسات تۋرالى» زاڭ جوباسى مەن ىلىسپە قۇجات جوباسى ءبىرىنشى وقىلىمدا ماقۇلداندى.

زاڭ جوباسىندا عىلىمدى باسقارۋ مودەلىن جەتىلدىرۋگە، عىلىم قورىنىڭ قىزمەتىن رەگلامەنتتەۋگە، قازاقستان رەسپۋبليكاسى ۇلتتىق عىلىم اكادەمياسىنىڭ قۇقىقتىق مارتەبەسىن ايقىنداۋعا باعىتتالعان قۇقىقتىق نورمالار قامتىلعان.

«زاڭ جوباسى مەملەكەت باسشىسىنىڭ 2023 -جىلعى 1-قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس- شارالار جوسپارىنىڭ 51-تارماعىن جانە قازاقستان رەسپۋبليكاسى پرەزيدەنتىنىڭ سايلاۋالدى باعدارلاماسىن ىسكە اسىرۋ جونىندەگى ءىس-قيمىل جوسپارىنىڭ 69-تارماعىن ورىنداۋ ءۇشىن ازىرلەنگەن. زاڭ جوباسى اياسىندا «عىلىم تۋرالى» جانە «عىلىمي جانە (نەمەسە) عىلىمي- تەحنيكالىق قىزمەت ناتيجەلەرىن كوممەرتسيالاندىرۋ تۋرالى» ق ر زاڭدارىنىڭ قولدانىستاعى نورمالارى قامتىلعان جانە ءتيىستى نوۆەللالار قاراستىرىلعان. بىرىنشىدەن، عىلىمدى باسقارۋ جۇيەسىنىڭ قۇرىلىمىن جەتىلدىرۋ ەسكەرىلگەن. ەكىنشىدەن، ءتيىستى قولداۋ باعدارلامالارىمەن (گرانتتىق جانە نىسانالى قارجىلاندىرۋ) ولاردى قارجىلاندىرۋدىڭ نەگىزدىلىگى ءۇشىن عىلىمي زەرتتەۋلەر مەن ازىرلەمەلەردىڭ دايىندىعى دارەجەسىن ايقىنداۋ تەتىكتەرىن ەنگىزۋ ەسكەرىلگەن»، - دەدى ق ر عىلىم جانە جوعارى ءبىلىم ءمينيسترى ساياسات نۇربەك.

ۇشىنشىدەن، عىلىمي- تەحنيكالىق ناتيجەلەرىن كوممەرتسيالاندىرۋ، بيزنەس- اكسەلەراتسيا، تەحنولوگيالىق بيزنەس- ينكۋباتسيالاۋ، تەحنولوگيالىق بروكەرلىك باعدارلامالاردى ىسكە اسىرۋعا جاردەمدەسۋ جونىندەگى عىلىم قورىنىڭ فۋنكسيونالىن كۇشەيتۋ، سونداي-اق ۆەنچۋرلىك قارجىلاندىرۋ تەتىكتەرى مەن ينفراقۇرىلىمىن قالىپتاستىرۋ قاراستىرىلعان.

«وسى زاڭ قابىلدانسا، عىلىم قورى ۆەنچۋرلىك قور رەتىندە قىزمەت ەتەدى. سونىمەن قاتار، قۇجات اياسىندا باسقا دا ۆەنچۋرلىق ينۆەستورلاردى، ينۆەستيتسيالىق قورلاردى سەرىكتەستىك نەگىزىندە عىلىمدى قارجىلاندىرۋعا، عىلىمي ۇجىمدارمەن جۇمىس ىستەۋگە قاتىستى ءتيىستى تەتىكتەر پىسىقتالادى»، - دەدى مينيستر.

ونىڭ ايتۋىنشا، زاڭ جوباسىندا ۇلتتىق عىلىم اكادەمياسىنىڭ مارتەبەسىنە قاتىستى نورمالار ەسكەرىلگەن. قۇجات اياسىندا جوعارى عىلىمي ۇيىم دەگەن ارنايى مارتەبە بەرىلمەك.

تاراتىلعان مالىمەتكە قاراعاندا، زاڭنامالىق دەڭگەيدە عىلىمي جەتىستىكتەردى، عىلىمي يننوۆاتسيالار مەن جاڭا تەحنولوگيالار نارىعىن قاداعالاۋ، ولاردىڭ ونەركاسىپ سالالارى، ونەركاسىپ سۋبەكتىلەرى جانە عىلىمي ۇيىمداردىڭ تەحنولوگيالىق ازىرلىگى دەڭگەيى بولىنىسىندە سىني تەحنولوگيالارعا بەيىمدەلۋ جانە ولارمەن اراقاتىناس الەۋەتىن باعالاۋ ماقساتىندا جۇزەگە اسىرىلاتىن عىلىمي-تەحنيكالىق اقپاراتتى جيناۋ، وڭدەۋ ءارى تالداۋ جونىندەگى تەتىكتى قاراستىرۋ ۇسىنىلدى. اتالعان نورمانى ىسكە اسىرۋ ءۇشىن وسى قىزمەتتى جۇزەگە اسىراتىن عىلىمي-تەحنيكالىق اقپارات ورتالىعىن قۇرۋ جوسپارلانعان.

سونىمەن قاتار، قۇجاتتا عىلىمي قىزمەتكەرلەردى، ونىڭ ىشىندە جاس عالىمداردى الەۋمەتتىك قولداۋ پاكەتىن كەڭەيتۋ قامتىلعان.

عالىمداردى ىنتالاندىرۋ ماقساتىندا قازاقستاندىق عالىمدارعا تۇرعىن ءۇي ساتىپ الۋعا نەمەسە تۇرعىن ءۇي جاعدايلارىن جاقسارتۋعا قۇقىق بەرۋ بولىگىندە، قازاقستاندىق عالىمداردىڭ عىلىمي جانە عىلىمي- تەحنيكالىق قىزمەت ناتيجەلەرىن كوممەرتسيالاندىرۋدى قامتاماسىز ەتەتىن سۋبەكتىلەرگە سالىق جەڭىلدىگىن بەرۋ بولىگىندە ءبىرقاتار تۇزەتۋلەر كوزدەلگەن.

 

اۆتور

رۋسلان عابباسوۆ

سوڭعى جاڭالىقتار