ۇلتتىق عىلىم اكادەمياسى جۇمىسىنىڭ جاڭا پرينسيپىن ورناتۋ كەرەك - اسقار جۇمادىلدايەۆ

استانا. KAZINFORM - ۇلتتىق عىلىم اكادەمياسىنىڭ ۆيتسە-پرەزيدەنتى اسقار جۇمادىلدايەۆ ەلىمىزدەگى عىلىم سالاسىن دامىتۋعا قاتىستى ۇسىنىسىن ايتتى.

- مەن قاسىم-جومارت كەمەل ۇلىنىڭ ەكى ەرلىگىن ايتقىم كەلەدى. بىرىنشىدەن، 2022 -جىلى ۇلكەن سىن كەلدى. قازاق مەملەكەتىنىڭ شاڭىراعى شايقالدى، ءبىراق قۇلاعان جوق. الماتى ورتكە وراندى… توقايەۆ سەرتىنەن تايمادى. تۋدى قۇلاتپادى، بەرىك ۇستادى. بۇل - قاسىم-جومارت كەمەل ۇلىنىڭ ءبىرىنشى ەرلىگى. ەكىنشىدەن، ۇلتتىق عىلىم اكادەمياسى 1946 -جىلى قۇرىلعان، ياعني كەڭەس وداعىنىڭ قيىن كەزەڭىندە ىرگەسى قالاندى. اكادەميانىڭ تۇڭعىش پرەزيدەنتى قانىش يمانتاي ۇلى ساتبايەۆ وراسان جۇمىس اتقارعان. سول كەزدە اشىلعان كەن ورىندارى بۇگىنگى قازاق قازىناسىنا 90 پايىزىن بەرىپ تۇر. اتالعان كەزەڭدە سالىنعان ەلەكتر ستانسالارى ءالى كۇنگە دەيىن جۇمىس ىستەپ تۇر. بۇل ءوز كەزەگىندە عىلىم مەن ءبىلىمنىڭ نە ەكەنىن ادامزاتقا كورسەتىپ وتىر… وسى تۇرعىدان الىپ قاراساق، قاسىم-جومار كەمەل ۇلى قۇلاعان اكادەميانى قايتا تۇرعىزدى. اكادەميا كەزىندە «مەملەكەت ىشىندەگى مەملەكەت» بولعان، - دەدى ا. جۇمادىلدايەۆ پارلامەنت ماجىلىسىندە پرەزيدەنت قاسىم-جومارت توقايەۆتىڭ ساياسي رەفورمالارىن ىسكە اسىرۋ تاقىرىبىن تالقىلاۋ كەزىندە.

ونىڭ ايتۋىنشا، ەندى عىلىم اكادەمياسىنىڭ بۇرىنعى الەۋەتىن قالپىنا كەلتىرۋ كەرەك.

- العا ىلگەرىلەۋ قاجەت. اكادەميا جۇمىسىنىڭ جاڭا پرينسيپىن ورناتۋىمىز كەرەك. ول ءۇشىن قارجىلاندىرۋ مەن عىلىمي ينستيتۋتتار قۇرۋ ماسەلەسىن تولىققاندى شەشۋ ماڭىزدى، - دەدى اكادەميك.

ەسكە سالساق، بىلتىر تامىز ايىندا ق ر پرەزيدەنتى جانىنداعى ۇلتتىق عىلىم اكادەمياسىنىڭ قۇرامىنا جاڭادان 9 عالىم ەندى.

بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا پالاتا ءتوراعاسى ەرلان قوشانوۆ «پرەزيدەنت قاسىم-جومارت توقايەۆتىڭ ساياسي رەفورمالارىن ىسكە اسىرۋ - مەملەكەتتىك قۇرىلىستىڭ جاڭا تاريحي كەزەڭى» اتتى بايانداما جاسادى.

اۆتور

رۋسلان عابباسوۆ