ۇلتتىق بانكتىڭ تولەم جۇيەلەرى ارقىلى 9 ايدا كۆادريلليون تەڭگە وڭدەلدى
استانا. KAZINFORM - جىل باسىنان بەرى ۇلتتىق بانكتىڭ بانك ارالىق تولەم جۇيەلەرى 1 كۆادريلليون تەڭگە قاراجات وڭدەدى. بۇل - ەلدەگى بارلىق قولما-قول اقشاسىز اينالىمنىڭ شامامەن %88- ى.
ول جايىندا ق ۇ ب ءتوراعاسىنىڭ ورىنباسارى اقىلجان بايماعامبەتوۆ Central Asia Fintech Summit- ءتىڭ اشىلۋىندا ايتتى.
كەيىنگى 5 جىلدا قازاقستاندا حالىق اراسىندا قولما-قول اقشاسىز ترانزاكسيا كولەمى 10 ەسە ءوسىپ، ونىڭ بولشەك ساۋدا اينالىمىنداعى ۇلەسى %89- عا جەتكەن.
«كليەنتتىڭ «ونبوردينگى»، بانك شوتىن اشۋ، نەسيە راسىمدەۋ، اقشا تولەۋ مەن اۋدارۋ، سونداي-اق مەملەكەتتىك قىزمەتتەر سياقتى نەگىزگى قارجى قىزمەتىنىڭ بارلىعىنا سيفرلىق فورماتتا، قاشىقتان قول جەتكىزە الامىز. ۇلتتىق بانك بازاسىندا بيومەتريالىق سايكەستەندىرۋ سەرۆيسى ءساتتى جۇمىس ىستەپ تۇر، ونىڭ كومەگىمەن ايىنا 2,5 ميلليوننان استام ءوتىنىش وڭدەلەدى»، - دەدى اقىلجان بايماعامبەتوۆ.
سونداي-اق ءتوراعا ورىنباسارى ۇلتتىق بانكتىڭ بانك ارالىق تولەم جۇيەلەرى ەلدەگى بارلىق قولما-قول اقشاسىز اينالىمنىڭ شامامەن %88- ىن وڭدەيتىنىن، ال بيىلعى 9 ايدا ترانزاكسيا اينالىمىنىڭ جالپى كولەمى 1 كۆادريلليون تەڭگەدەن اسىپ تۇسكەنىن جەتكىزدى.
دەگەنمەن، يننوۆاتسيالاردىڭ ومىرىمىزگە تەز ەنۋىمەن قاتار كيبەرقاۋىپ پەن ونلاين-الاياقتىق تا كۇشەيىپ كەلەدى. اقىلجان بايماعامبەتوۆتىڭ ايتۋىنشا، بيىل ىسكە قوسىلعان انتيفرود-ورتالىق قازىردىڭ وزىندە 500 ميلليون تەڭگەدەن استام سومانى الاياقتاردىڭ يەمدەنىپ كەتۋىنەن ساقتاپ قالدى.
«بۇل باستاما قارجى قىزمەتتەرىنىڭ سيفرلىق فورماتقا ءساتتى كوشكەنىن بىلدىرەدى دەپ سەنىمدى تۇردە ايتۋعا بولادى. ءبىزدىڭ مىندەتىمىز - وسى باعىتتا ودان ءارى دامىپ، ايماقتا كوشباسشى پوزيتسياسىن ساقتاپ قالۋ»، - دەدى ول.
اۆتور
باقىتگۇل اباي قىزى
