ۇلتتىق بانك تەڭگە باعامىن ۇستاپ تۇرۋ ءۇشىن 10 كۇندە قانشا جۇمسادى؟

  ۇلتتىق بانك ءتوراعاسى تيمۋر سۇلەيمەنوۆ تەڭگە باعامىن ۇستاپ تۇرۋ ءۇشىن 10 كۇندە قانشا جۇمسالعانىن ايتتى.

«16-قاراشادان باستاپ ينتەرۆەنتسيا جۇرگىزىپ جاتىرمىز، سوعان 1 ميلليارد دوللار جۇمسالدى. بۇل ناقتى – سان»، - دەدى ول.

سونداي- اق، ۇلتتىق بانك ءتوراعاسىنا دوللار باعاسىنىڭ وسۋىنە كىمدەردىڭ اسەرى جوعارى دەگەن سۇراق قويىلدى.

«جەكە تۇلعالارعا اسەر ەتپەدى، كەشە بارلىق فيليالدان اقپارات جينالدى، ەشقانداي ارتىق سۇرانىس بولعان جوق. قازاقستان قور بيرجاسىندا جۇمىس ىستەپ جاتقان زاڭدى تۇلعالار وسى ۇسىنىستى قاراپ وتىر»، - دەدى ول.

ايتا كەتەيىك، كەشە ساعات 11:00 دە استاناداعى اقشا ايىرباستاۋ ورىندارىندا دوللار 513,20 تەڭگەگە ساتىلىپ، 505,10 تەڭگەگە ساتىپ الىندى. كەيبىر ايىرباستاۋشىلار اقش ۆاليۋتاسىن 515 تەڭگەدەن ساتتى.

الماتىدا امەريكالىق ۆاليۋتا 512,87 تەڭگەگە ساتىلىپ، 507,50 تەڭگەگە ساتىپ الىندى. كەيبىر اقشا ايىرباستاۋ ورىندارىندا دوللار 516-518 تەڭگە ارالىعىندا ساتىلىپ جاتىر.

ۇلتتىق بانك مالىمەتىنشە، ءبىرقاتار فاكتور اسەرىنەن تەڭگەنىڭ ايىرباس باعامى ا ق ش دوللارىنا شاققاندا 500 تەڭگەگە جەتكەن.

بۇگىن ۇلتتىق بانك بازالىق مولشەرلەمەنى +/- 1 پايىزدىق تارماقپەن جىلدىق 15,25 پايىز دەپ بەلگىلەۋ تۋرالى شەشىم قابىلدادى. شەشىم جاڭارتىلعان بولجامدار مەن ينفلياتسيا بالانسىن ەسكەرە وتىرىپ قابىلدانعان.

انىقتاما: بازالىق مولشەرلەمە - كوممەرتسيالىق بانكتەرگە ۇلتتىق بانك قىسقامەرزىمدى نەسيەلەر بەرەتىن جانە كوممەرتسيالىق بانكتەردەن دەپوزيتتەر قابىلدايتىن پايىزدىق مولشەرلەمە. ول ازاماتتارعا بەرىلەتىن نەسيەلەر بويىنشا مولشەرلەمەلەردى بەلگىلەۋدە ماڭىزدى ءرول اتقارادى، ەلدەگى ينفلياتسيا دەڭگەيىنە دە اسەر ەتەدى. قاراپايىم تىلمەن ايتقاندا، بازالىق مولشەرلەمە - ەل ەكونوميكاسى مەن بانك سەكتورى ءۇشىن نەگىزگى باعىت. ونىڭ مولشەرىن ۇلتتىق بانك بەلگىلەيدى: ارتتىرۋى نەمەسە تومەندەتۋى مۇمكىن. سونىمەن قاتار بازالىق مولشەرلەمە - ەلدىڭ اقشا- نەسيە ساياساتىنىڭ نەگىزگى قۇرالى.

Massaget.kz