ۇلتتىق بانك جالعان نەسيەلىك شوتتاردى پايدالانۋ ارقىلى جاسالاتىن الاياقتىق سحەما تۋرالى ەسكەرتتى

استانا. KAZINFORM - قازاقستان ۇلتتىق بانكى الاياقتاردىڭ ق ۇ ب- تىڭ رەسمي بلانكىسىن قولدانىپ، جالعان قۇجات ۇسىنعان جاعدايلار جيىلەپ كەتكەنىن ەسكەرتتى.

- ۇلتتىق بانكتىڭ اتىنان بايلانىسقا شىققاندا ولار ازاماتتارعا «كرەديتتىك شوتى» بارىن نەمەسە كرەديت قارىزىن وتەۋ كەرەك ەكەنىن حابارلاپ، جالعان حات جىبەرەدى. سەنىمگە كىرۋ ءۇشىن جالعان قۇجاتتارعا ۇلتتىق بانكتىڭ «ۋاكىلەتتى تۇلعاسى» قويعان قولىن، اتى- ءجونى مەن ءمورىن باسادى. قاسكويلەر مۇنداي جالعان مالىمەتتەردى ازاماتتارعا اقشا اۋدارتىپ، قاراجاتىن ۇرلاۋ ءۇشىن دە ۇسىنادى، - دەپ حابارلادى بانكتەن.

سونداي-اق، ولار ۇلتتىق بانك قىزمەتكەرىنىڭ بەت-بەينەسىن قولدانا وتىرىپ، جالعان بەينەروليكتەر جاساۋ ءۇشىن جاساندى ينتەللەكت تەحنولوگيالارىن پايدالانادى. بۇل رەتتە الاياقتار الەۋمەتتىك جەلىلەردە جالعان ينۆەستيتسيالىق كومپانيالار تۋرالى جانە ۇرلانعان اقشالاردى قايتارۋ جونىندە تەگىن زاڭگەرلىك كومەك كورسەتەمىز دەپ جارناما ورنالاستىرىپ ءجۇر.

وسىعان بايلانىستى ۇلتتىق بانك ازاماتتاردى قىراعى بولۋعا، كۇماندى شوتتارعا اقشا جىبەرمەۋگە، دايەكسىز حابارلامالار مەن تەكسەرىلمەگەن قۇجاتتارعا سەنبەۋگە شاقىرادى.

- ۇلتتىق بانك جەكە تۇلعالاردىڭ شوتىنا قىزمەت كورسەتپەيتىنىن، ازاماتتارعا كرەديت بەرۋمەن اينالىسپايتىنىن، زاڭگەرلىك قىزمەت كورسەتپەيتىنىن، سونداي-اق حالىقپەن اقشالاي ەسەپ ايىرىسۋ جۇرگىزبەيتىنىن ەسكە سالامىز، - دەلىنگەن حابارلامادا.

قازاقستان ۇلتتىق بانكى ءۇشىنشى تۇلعالار تاراپىنان جاسالاتىن الاياقتىق ارەكەتتەرگە جول برەمەس ءۇشىن مەملەكەتتىك ورگانداردىڭ نەمەسە ۇلتتىق بانك قىزمەتكەرلەرىنىڭ اتىنان بەيتانىس ادام قوڭىراۋ شالعان كەزدە اڭگىمەنى توقتاتىپ، قاجەت بولعان جاعدايدا مەملەكەتتىك ورگاننىڭ رەسمي نومىرىنە ءوز بەتىنشە حابارلاسۋدى ۇسىنادى.

ەسكە سالا كەتەيىك، قىزىلوردادا جىل باسىنان بەرى 118 ينتەرنەت الاياقتىق دەرەگى تىركەلدى.