ۇلتتىق بانك ءتوراعاسى پرەزيدەنتكە جىل باسىنان بەرى اتقارىلعان جۇمىستار تۋرالى ەسەپ بەردى
استانا. KAZINFORM - پرەزيدەنت قاسىم-جومارت توقايەۆ ۇلتتىق بانك ءتوراعاسى تيمۋر سۇلەيمەنوۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسىنا ۇلتتىق بانكتىڭ بىلتىر جانە بيىلعى قاڭتار-اقپان ايلارىندا جۇرگىزگەن اقشا-كرەديت ساياساتىنىڭ قورىتىندىسى تۋرالى ەسەپ بەرىلىپ، الداعى كەزەڭگە ارنالعان جۇمىس جوسپارى تانىستىرىلدى.
قاسىم-جومارت توقايەۆقا قازاقستانداعى جانە الەمدەگى ەكونوميكالىق جاعدايدىڭ دامۋ بارىسى، ينفلياتسيانىڭ قارقىنى مەن ونى تۇراقتاندىرۋ شارالارى جونىندە مالىمەت بەرىلدى.
اتاپ ايتقاندا، ۇلتتىق بانك ءتوراعاسى جىلدىق ينفلياتسيانىڭ باسەڭدەگەنىن جانە ىشكى ەكونوميكادا پروينفلياتسيالىق فاكتورلار ساقتالىپ وتىرعانىن جەتكىزدى. سونىمەن قاتار ب ج ز ق اكتيۆتەرى مەن التىن-ۆاليۋتا رەزەرۆتەرىنىڭ جاي-كۇيى، «ۇلتتىق قور-بالالارعا» باعدارلاماسىنىڭ جۇزەگە اسىرىلۋ بارىسى جايىندا باياندادى.
تيمۋر سۇلەيمەنوۆ مەملەكەت باسشىسىنىڭ بۇعان دەيىن ەكونوميكانىڭ ناقتى سەكتورىن قارجىلاندىرۋ ءىسىن كەڭەيتۋ جونىندە بەرگەن تاپسىرماسىنىڭ ورىندالۋ بارىسى، سونداي-اق ۇلتتىق تولەم جۇيەسىن دامىتۋعا، اشىق بانكينگ قاعيداتتارىن ەنگىزۋگە باعىتتالعان جوبالاردىڭ ىسكە اسىرىلۋى تۋرالى ايتتى.
بۇدان بولەك، پرەزيدەنتكە كليەنتتەردىڭ قاراجاتىن الاياقتاردان قورعاۋ ماقساتىندا انتيفرود-ورتالىق قۇرۋ، سونداي-اق مەملەكەتتىك ساتىپ الۋ جانە بيۋدجەت شىعىستارىنىڭ اشىقتىعى مەن تيىمدىلىگىن ارتتىرۋ ءۇشىن سيفرلىق تەڭگەنىڭ الەۋەتىن پايدالانۋ جايىندا مالىمەت بەرىلدى.
كەزدەسۋ سوڭىندا قاسىم-جومارت توقايەۆ ۇلتتىق بانك قىزمەتىنىڭ نەگىزگى باعىتتارىنا قاتىستى ءبىرقاتار مىندەت جۇكتەدى.
