ۇلتتىق بانك باسشىسى تەڭگە باعامىنا قاتىستى پىكىر ءبىلدىردى

استانا. KAZINFORM – ق ر ۇلتتىق بانكىنىڭ ءتوراعاسى تيمۋر سۇلەيمەنوۆ بيىلعى تەڭگە باعامىنا قاتىستى سۇراققا جاۋاپ بەردى.

«ءبىز ۆاليۋتا باعامىنا قاتىستى بولجام جاسامايمىز، ويتكەنى ۆاليۋتا باعامى نارىقتاعى سۇرانىس پەن ۇسىنىستىڭ ناتيجەسىندە قالىپتاسادى. سوندىقتان ەركىن ايىرباس باعامى جاعدايىندا بۇل ءىس-قيمىلدار مۇمكىن ەمەس. مەملەكەتتىك جوسپارلاۋ جۇيەسىنە كىرەتىن رەسمي قۇجاتتارعا، ياعني الەۋمەتتىك- ەكونوميكالىق دامۋ بولجامىنا جانە بيۋدجەت تۋرالى زاڭعا نازار اۋدارعىم كەلەدى. وندا 2024 -جىلعا ارنالعان ورتاشا جىلدىق باعام ءبىر دوللارعا 460 تەڭگە بولىپ بەلگىلەنگەن»، - دەدى ت. سۇلەيمەنوۆ ەلوردادا وتكەن باسپا ءسوز ءماسليحاتىندا.

ونىڭ ايتۋىنشا، ورتاشا جىلدىق كورسەتكىش جىل باسىنداعى دەڭگەيدەن اسپاۋى مۇمكىن.

«ءبىرىنشى جارتىجىلدىقتا بۇل كورسەتكىش 440 قا (تەڭگە) دەيىن تومەندەگەنىن كوردىك. قازىر ول شامامەن 480 گە كوتەرىلدى. ءبىراق جىلداعى ورتاشا دەڭگەي رەتىندە 460 بولادى دەپ پايىمداپ وتىرمىز»، - دەدى ۇب باسشىسى.

ايتا كەتەيىك، ۇلتتىق بانكتىڭ 29-تامىزعا ارنالعان رەسمي باعامى - 1 دوللارعا 481,22 تەڭگە. رەسەي ءرۋبلىنىڭ ورتاشا سارالانعان قۇنى - 5,27 تەڭگە. ەۋرو - 535,36.