ۇلتتىق بانك باسشىسى كوشەدەگى ۆاليۋتا باعامىنىڭ كەستەلەرىن انارحونيزم دەپ اتادى

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ كوشەدەگى ۆاليۋتا باعامىنىڭ كەستەلەرىن ىلۋگە نەگە تىيىم سالىپ جاتقاندارىن ءتۇسىندىردى.

- جالپى مۇنداي شەشىم بيزنەستىڭ قۇقىقتارىن شەكتەيدى دەگەن كوزقاراستار ورىنسىز دەپ ويلايمىن. ويتكەنى ءبارىمىز سيفرلىق داۋىردە ءومىر ءسۇرىپ جاتىرمىز. قولداعى ۇيالى تەلەفوننىڭ كومەگىمەن قازىر، ءتىپتى جاپوننىڭ يەنى قانشا تۇراتىنىن، ديرحام قانشادان ساتىلىپ جاتقانىن قاس قاعىمدا كورۋگە بولادى. باعامدى كورسەتىپ تۇراتىن بەلگىلەر - توقسانىنشى جىلداردان قالعان انارحونيزم، - دەدى ول.

ۇلتتىق بانك دامىعان ەلدەردىڭ ءىرى قالالارىندا ۆاليۋتا باعامىن كوشەدەگى تابلوعا ءىلىپ قويۋ ءداستۇرى قازىر جوق ەكەنىن ايتادى. مۇنداي ءتاسىل تۋريزمى دامىعان قالالاردا عانا ساقتالىپ وتىرعان كورىنەدى.

- بىزدە قانداي سەبەپتەرگە بايلانىستى ەكەنىن بىلمەيمىن، باعا تابلولارى قالىپ قويعان. ۆەتنامدا، تايلاندتا باي دەمالۋشىلار كەلگەن كەزدە قولما-قول اقشانى جەرگىلىكتى ۆاليۋتاعا ايىرباستايدى. ءبىزدىڭ ەكونوميكانىڭ تىرەگى، كەپىلى - تۋريزم ەمەس. ءبىزدىڭ ەكونوميكا قولما-قول اقشامەن كەلەتىن تۋريستەردى قاجەت ەتەدى دەپ ويلامايمىن. سوندىقتان، وسىنداي تەتىكتەردى وزگەرتۋىمىز كەرەك بولدى، - دەدى تيمۋر سۇلەيمەنوۆ.

ايتا كەتەيىك، بۇگىن ۇلتتىق بانك بازالىق مولشەرلەمە تۋرالى جاڭا شەشىم قابىلدادى.