ۇلتتىق بانك باسشىسى «ءبولىپ تولەۋ» قۇرالىنىڭ نەسيە پايىزى قالاي جاسىرىلاتىنىن ايتتى

استانا. KAZINFORM — ۇلتتىق بانك ءتوراعاسى تيمۋر سۇلەيمەنوۆ بانكتەردىڭ «ءبولىپ تولەۋ» قۇرالى قارىز پايىزىن قالاي جاسىراتىنىن ءوز باسىنان وتكەن جاعدايدىڭ مىسالىمەن ءتۇسىندىردى.

- بىزدەگى تۇتىنۋ نەسيەسىنىڭ نارىعىندا ءبولىپ تولەۋ قۇرالىنىڭ دەڭگەيى جوعارى. بۇل جەردە نەسيەنىڭ باعاسى تاۋاردىڭ باعاسىنا جاسىرىلعان. ول مولشەرلەمەنى بىلايشا كورمەيسىڭ. مولشەرلەمە «0» دەپ كورسەتىلگەنىمەن، شىن مانىندە نەسيەنىڭ قۇنى تاۋار باعاسىندا جاسىرىنىپ جاتادى. جۋىقتا ءبىز تەلەديدار ساتىپ الدىق. دۇكەنگە باردىق تا، Sulpak-تىڭ نەسيە راسىمدەيتىن تەرەزەسىنە جاقىندادىق. نەسيە كەلىسىمشارتىنا قول قويدىق. مەن ول جەردە ءتىپتى نەسيەنىڭ پايىزدىق مولشەرلەمەسى قانداي ەكەنىنە قاراعان دا جوقپىن. تەلەديداردىڭ باعاسى مەن اي سايىن قانشا تولەيتىنىمە عانا قارادىم. ياعني، حالىققا 24 ايعا بولگەندە اي سايىن قانشادان كەلەتىنىن الدەقايدا ماڭىزدى. شارتتى تۇردە 500 مىڭ تەڭگە تۇرادى دەپ ەسەپتەسەك، اي سايىنعى تولەم 50 مىڭ تەڭگە بولادى. «تولەي الامىن» دەپ ويلادىم. ال استارىندا قانداي مولشەرلەمە جاتقانىنا، 20، 21 نەمەسە %22 بولا ما، ول جاعىنا قاراعان جوقپىن. ويتكەنى، اي سايىن قانشا تولەيتىنىمە ءمان بەردىم، - دەيدى ول.

ۇلتتىق بانك باسشىسى حالىقتىڭ كوبى وسىنداي شەشىم قابىلداۋعا بەيىم تۇراتىنىن ايتادى.

- وكىنىشكە قاراي، حالىقتىڭ كوبى وسىنداي فاكتورلارعا سۇيەنىپ شەشىم قابىلدايدى. باعاسى مەن ايلىق تولەمىنە قارايدى. سوندىقتان بازالىق مولشەرلەمە مەن تۇتىنۋ نەسيەسىنىڭ مولشەرلەمەسىنىڭ اراسىنداعى قۇبىلۋ سونشالىق ايقىن ەمەس. ءبىراق سونىڭ ءوزى ۇلتتىق بانك پەن قارجى نارىعىن رەتتەۋ جانە دامىتۋ اگەنتتىگىن تۇتىنۋ نەسيەسىنە پايىزدىق مولشەرلەمە ارقىلى ەمەس، ماكروپايىزدىق شارالار ارقىلى اسەر ەتۋگە ماجبۇرلەيدى، - دەدى ول.

بۇگىن ۇلتتىق بانك بازالىق مولشەرلەمەنى كوتەرگەن بولاتىن.