ۇلتتىق بانك ۆاليۋتا نارىعىنداعى جاعدايعا قاتىستى تۇسىنىك بەردى
استانا. KAZINFORM – ق ر ۇلتتىق بانكى ءتوراعاسىنىڭ ورىنباسارى ءاليا مولدابەكوۆا ۆاليۋتا نارىعىنداعى جاعدايعا قاتىستى تۇسىنىك بەردى.
— 2025-جىلعى 5-قاڭتاردا تەڭگە باعامى 1 ا ق ش دوللارى ءۇشىن 525 تەڭگە دەڭگەيىندە اشىلىپ، 1 ا ق ش دوللارى ءۇشىن 525-528 تەڭگە ارالىعىندا ساۋدالاندى. كەشەگى ساۋدا-ساتتىق قورىتىندىسى بويىنشا ورتاشا سارالانعان باعام 1 ا ق ش دوللارى ءۇشىن 526,30 تەڭگە دەڭگەيىندە قالىپتاسىپ، %0,2 عا السىرەدى.
حالىقارالىق قارجى نارىقتارى جابىق بولعاندىقتان، ساۋدا-ساتتىقتاعى بەلسەندىلىك تومەن بولىپ، ونىڭ كولەمى نەبارى 119,5 ميلليون ا ق ش دوللارىن قۇرادى. سالىستىرۋ ءۇشىن ايتساق، 2024-جىلعى قاڭتاردا ساۋدا-ساتتىقتىڭ ورتاشا كۇندىك كولەمى 172 ميلليون دوللار بولعان ەدى، ال 2024-جىلعى جەلتوقساندا 254 ميلليون دوللارعا جەتتى. نارىق قاتىسۋشىلارىنىڭ سۇرانىسى نەگىزىنەن دەمالىس كۇندەرى جيناقتالعان دوللار بويىنشا قىسقا پوزيتسيامەن قالىپتاستى، - دەيدى ول.
سونداي-اق ءاليا مولدابەكوۆا تەڭگە باعامىنا قانداي سىرتقى فاكتورلار اسەر ەتىپ جاتقانىن اتاپ ءوتتى.
— كۇشەيىپ تۇرعان ا ق ش دوللارى دامۋشى ەلدەردەگى باسقا ۆاليۋتالار سەكىلدى تەڭگەگە دە قىسىم كورسەتىپ كەلەدى. ا ق ش دوللارىنىڭ يندەكسى 108 تارماققا جەتتى - بۇل ەكى جىلداعى ماكسيمۋم. وسى جاعدايدىڭ ءوزى ينۆەستورلار تاراپىنان امەريكالىق ۆاليۋتاعا قىزىعۋشىلىق ارتقانىن كورسەتەدى، ال ول بۇكىل الەمدەگى ۇلتتىق ۆاليۋتالاردىڭ پوزيتسياسىنا تەرىس اسەر ەتەدى.
تاعى ءبىر فاكتور - رەسەي رۋبلىنىڭ ديناميكاسى. وعان نارىق قاتىسۋشىلارى قازاقستاننىڭ ساۋدا اينالىمىنداعى رەسەيدىڭ ماڭىزدى رولىنە بايلانىستى نازار اۋدارۋعا داعدىلانعان. الايدا، ۇزاققا سوزىلاتىن مەرەكەلىك دەمالىس كەزەڭىندە رەسەي رۋبلىنىڭ ا ق ش دوللارىنا قاتىستى باعامى تومەن وتىمدىلىكپەن بۇرمالانۋى مۇمكىن ەكەنىن ەسكەرۋ قاجەت. مۇنداي كەزەڭدەردە قۇبىلمالىلىق ارتۋى مۇمكىن. ماسەلەن، 2025-جىلعى 3-قاڭتارداعى جاعداي بويىنشا باعام 1 ا ق ش دوللارى ءۇشىن 110,6 رۋبلگە دەيىن السىرەدى، - دەيدى ۇلتتىق بانك ءتوراعاسىنىڭ ورىنباسارى.
سپيكەر تەڭگەگە قاراعاندا رۋبلگە ايرىقشا، سونىڭ ىشىندە سانكتسيالىق سيپاتتاعى فاكتورلار اسەر ەتەتىنىن ايتادى.
— مەنىڭ ويىمشا، قازىرگى جاعدايداعى رەسەي رۋبلىنىڭ ديناميكاسى باعدار بولماۋعا ءتيىس جانە ول نارىقتىڭ شامادان تىس رەاكسياسىنا ىقپال ەتۋى مۇمكىن. ال بۇل جەرگىلىكتى نارىقتا باعامنىڭ قالىپتاسۋىن بۇرمالاپ، ارتىق قۇبىلمالىلىققا اكەلەدى. قازىرگى ۋاقىتتا ءبىزدىڭ ەلدەرىمىزدىڭ نارىقتارى ءارتۇرلى جاعدايدا جۇمىس ىستەيتىنى انىق. سوندىقتان وسى جاعدايلاردا رەسەي رۋبلىنىڭ ا ق ش دوللارىنا قاتىستى كۇرت اۋىتقۋى تەڭگە/دوللار ايىرباستاۋ باعامىندا كورىنبەۋى كەرەك، ويتكەنى ول ىرگەلى ەكونوميكالىق شىندىققا سايكەس كەلمەيدى، - دەپ ءتۇيدى ءسوزىن ول.
ايتا كەتەيىك، بۇعان دەيىن ۇلتتىق بانك قاڭتاردا ۇلتتىق قوردان قانشا دوللار ساتاتىنىن ايتقان ەدى.
