ۇلتتىق پاركتەگى فوتوتۇزاقتار قالاي ورناتىلادى
الماتى. KAZINFORM - قازاقستاننىڭ تابيعي ۇلتتىق پاركتەرىندە 400 گە جۋىق فوتوتۇزاق ورناتىلعان.
ەلىمىزدە جابايى جانۋارلاردى زەرتتەۋ مەن باقىلاۋ ءۇشىن ۇلتتىق پاركتەردە فوتوتۇزاقتار ورناتىلادى. جاسىرىن كامەرالاردىڭ ارقاسىندا قىزىل كىتاپقا ەنگەن جانۋارلاردىڭ سيرەك كادرلارى الىنادى. كولساي كولدەرى ۇلتتىق پاركى ديرەكتورىنىڭ ورىنباسارى حاميت احمەتوۆتىڭ ايتۋىنشا، فوتوتۇزاقتاردى پاركتىڭ ارنايى دايىندالعان ينسپەكتورلارى ورناتىپ، شەشىپ الادى.
- بىزدە ۇلتتىق پارك ديرەكتورىنىڭ بۇيرىعىمەن بەينەتۇزاقتاردى ورناتۋ جانە اۋىستىرۋ بويىنشا 2024-2025-جىلدارعا جۇمىس جوسپارى بەكىتىلگەن. سول بويىنشا سيرەك كەزدەسەتىن جانۋارلاردىڭ ءجۇرۋ جولدارى انىقتالعاننان كەيىن فوتوتۇزاقتار ورناتىلادى. ولاردى جانۋارلاردى مولايتۋ جانە قورعاۋ ءبولىمىنىڭ ماماندارىمەن بىرگە ينسپەكتورلار بىرلەسە وتىرىپ بەينەتۇزاقتاردى اۋىستىرىپ وتىرادى. بۇگىنگى كۇنى پارك اۋماعىندا 37 فوتوتۇزاق ورناتىلعان، - دەدى ول.
سونداي-اق ۇلتتىق پارك وكىلى فوتوتۇزاق الىنعاننان كەيىن ىشىندەگى كادرلار وڭدەلىپ، زوولوگيا ينستيتۋتىنا جىبەرىلەتىنىن اتاپ ءوتتى.
- فوتوتۇزاق ونلاين رەجيمدە جۇمىس ىستەمەيدى. ينسپەكتور ونىڭ ىشىندەگى فلەشكانى اكەلگەننەن كەيىن كەڭسەدە كادرلار وڭدەپ، ىرىكتەلەدى. سەبەبى ىشىندە مىڭداعان كادر بولادى. ءبىر قار بارىسى ون رەت ءتۇسۋى مۇمكىن. سوسىن كادرلاردى زوولوگيا ينستيتۋتىنا جىبەرەمىز، - دەدى حاميت احمەتوۆ.
جالپى ورمان شارۋاشىلىعى جانە جانۋارلار دۇنيەسى كوميتەتىنىڭ مالىمەتىنشە، ەلىمىزدىڭ ۇلتتىق پاركتەرىندە 400 گە جۋىق فوتوتۇزاق ورناتىلعان.
ەسكە سالايىق، بۇعان دەيىن كولساي كولدەرىندە كۇشىكتەرىن ەرتكەن قار بارىسى فوتوتۇزاققا ءتۇسىپ قالعانىن جازعانبىز.
وعان دەيىن كولساي كولدەرى ۇلتتىق تابيعي پاركىندە قار بارىسى مەن تۇركىستان سىلەۋسىنى فوتوتۇزاققا ءتۇسىپ قالعان ەدى.
