ۇلتارالىق ارازدىق تۋدىرعان ازاماتتىڭ ۇستىنەن قىلمىستىق ءىس قوزعالدى
ۇلتارالىق تاتۋلىققا سىزات تۇسىرگەن جەلى قولدانۋشىسىنا قىلمىستىق ءىس قوزعالىپ، حالىقارالىق ىزدەۋ جاريالاندى، دەپ حابارلايدى Kazinform.
الەۋمەتتىك جەلىدە ەلدەگى ۇلتارالىق تاتۋلىققا سىزات ءتۇسىرىپ وتىرعان ەر جىگىتتىڭ ۆيدەوسى تارادى. ول بالاعات سوزدەر ايتىپ، ەسسىز ارەكەتتەر جاساعان.
پوليتسەيلەر شۇعىل قابىلداعان شارالاردىڭ ناتيجەسىندە بەينەجازبانىڭ اۆتورىن انىقتادى. قازىرگى ۋاقىتتا شەتەلدە جۇرگەن تۇركىستان وبلىسىنىڭ 28 جاستاعى تۇرعىنىنا حالىقارالىق ىزدەۋ جاريالاندى.
«اتالعان فاكت بويىنشا قازاقستان رەسپۋبليكاسى قىلمىستىق كودەكسىنىڭ 174-بابى «الەۋمەتتىك، ۇلتتىق، رۋلىق، ناسىلدىك، تەكتىك-تاپتىق نەمەسە ءدىني الاۋىزدىقتى قوزدىرۋ» بويىنشا قىلمىستىق ءىس قوزعالدى. كۇدىكتىگە حالىقارالىق ىزدەۋ جاريالاندى. سوتقا دەيىنگى تەرگەۋ باستالدى»، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى تاراتقان اقپاراتتا.
ال، بۇگىن كۇدىكتى مەن ونىڭ اتا-اناسى قازاق حالقىنان جانە پرەزيدەنتتەن كەشىرىم سۇرادى.
