ەلتاڭبانى وزگەرتۋگە قارجىلىق مۇمكىندىك بار ما - ءمينيستردىڭ جاۋابى

 استانا. KAZINFORM - قارجى ءمينيسترى ءمادي تاكيەۆ «ەلتاڭبانى وزگەرتۋگە ەل بيۋدجەتىنىڭ قارجىلىق مۇمكىندىگى بار ما؟» دەگەن ساۋالعا جاۋاپ بەردى.

«ارينە، مۇمكىنشىلىك بار. ساراپتاما جۇرگىزۋ قاجەت. بىزدە قانشا ەلتاڭبا بار ەكەندىگىنە ساراپتاما جۇرگىزەتىن بولامىز. ويتكەنى، ولاردىڭ كولەمى ءارتۇرلى، 40 سانتيمەتردەن باستاپ 1 مەترگە دەيىن جەتەدى»، - دەدى مينيستر اگەنتتىك تىلشىسىنە ساۋالىنا وراي.

ونىڭ اتاپ وتۋىنشە، ۇكىمەت باسشىسى قارجى مينيسترلىگىنىڭ الدىنا بيۋدجەتتىڭ ءتيىمسىز شىعىستارىن قىسقارتۋ تۋرالى تاپسىرما بەرگەن.

«تاپسىرما بولدى. ونى بىرنەشە كەزەڭگە بولدىك. ءبىرىنشى كەزەڭدە ورتالىق مەملەكەتتىك ورگاندارمەن جۇمىس ىستەپ، قاراپ شىقتىق. 301 ميلليارد تەڭگەنى قىسقارتامىز. ونىڭ ىشىندە ىشتەگى ءىس-ساپارلاردى، شەتەلدىك ءىس-ساپارلاردى، يگەرىلۋى تومەن جوبالاردى قىسقارتۋ بار. ازىرشە، قىسقارتىلاتىنى وسى سوما. دەگەنمەن، ءالى دە قاراستىرىپ جاتىرمىز. وزدەرىڭىز بىلەسىزدەر، ءبىزدىڭ بيۋدجەتتىڭ شىعىستارى 23,9 تريلليون تەڭگەنى قۇرايدى. ونىڭ ىشىندە 20 تريلليون تەڭگە جالاقىعا، زەينەتاقىعا، شاكىرتاقىعا، جاردەماقىعا تولەنەدى. ياعني، قىسقارتىلمايتىن سوما»، - دەدى ءمادي تاكيەۆ.

سونىمەن قاتار ول قالعان 4 تريلليون تەڭگەگە جۋىق سومادان دا قىسقارتۋ مۇمكىندىكتەرى قاراستىرىلىپ جاتىر.

پرەزيدەنت ۇلتتىق قۇرىلتايدىڭ ءۇشىنشى وتىرىسىنداعى سوزىندە ۇلتتىق بىرەگەيلىگىمىزدىڭ مەملەكەتتىك رامىزدەردە ايقىن كورىنىس تاپقانىن اتاپ وتكەن ەدى.

«ال ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك. ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان-جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى»، - دەگەن بولاتىن قاسىم-جومارت توقايەۆ.

اۆتور

مارلان جيەمباي