ەلتاڭبا وزگەرسە دە، قولدانىستاعى بانكنوتتار ەسكىرگەنشە اينالىمنان شىعارىلمايدى - ۇلتتىق بانك
استانا. KAZINFORM - ۇلتتىق بانكتىڭ باسقارما ءتوراعاسى تيمۋر سۇلەيمەنوۆ ب ا ق وكىلدەرىمەن وتكەن باسپا ءسوز ءماسليحاتىندا ەلتاڭبا وزگەرسە، بانكنوتتار مەن مونەتالار اينالىمىنا قالاي اسەر ەتەتىنىن ايتتى.
«بىرىنشىدەن، ەلتاڭبا اۋىسا ما، دەگەن سۇراققا جاۋاپ تاۋىپ الۋ كەرەك سياقتى. ويتكەنى قازىر سول سالاداعى عالىمدار جۇمىس ىستەپ جاتىر. كەيىن ۇسىنىس ايتاتىن شىعار، ازىرگە ناقتى ۇسىنىس بەرىلگەن جوق. بۇل ماسەلەنى ءبىز ءوز شەڭبەرىمىزدە زەردەلەدىك. قازىر اينالىمدا جۇرگەن بانكنوتتار مەن مونەتالارعا قاتىستى قانداي دا ءبىر وزگەرىس بولمايدى. ولار ەسكىرىپ بىتكەنشە اينالىمدا بولا بەرەدى»، - دەدى ول جۋرناليست ساۋالىنا بەرگەن جاۋابىندا.
ونىڭ ايتۋىنشا، ەلتاڭبا وزگەرگەن كۇننىڭ وزىندە مونەتا شەكىپ، بانكنوت باساتىن جاڭا قوندىرعى الۋدىڭ قاجەتى بولمايدى.
«ال ەلتاڭبانى وزگەرتۋ تۋرالى شەشىم ناقتى قابىلدانسا، ودان كەيىن شىعاتىن مونەتالار مەن بانكنوتتاردىڭ ديزاينى باسقاشا بولاتىنى تۇسىنىكتى. قازاقستان بانكنوت فابريكاسىنداعى قوندىرعى ايتارلىقتاي جاقسى. سوندىقتان ونىڭ تەحنيكالىق باپتاۋلارىن وزگەرتۋدە قانداي دا ءبىر قيىندىقتار بولماۋ كەرەك. سايكەسىنشە، قوسىمشا شىعىندار بولمايدى»، - دەدى تيمۋر سۇلەيمەنوۆ.
