ۇلەسكەرلەر پروبلەماسىنىڭ تۋىنداۋىنا نە تۇرتكى

استانا. KAZINFORM - «استانا قالاسىنىڭ قالالىق ورتا ساپاسى جانە باقىلاۋ باسقارماسى» م م باسشىسى عاني تاجيەۆ ەلوردادا ۇلەسكەرلەر پروبلەماسىنىڭ تۋىنداۋىنا تۇرتكى بولاتىن جايتتاردى اتادى.

- قۇرىلىس كومپانياسى تۇرعىن ءۇيدى باستاپ سالعان كەزدە كۇشتەرىن دۇرىس ەسكەرمەي، جارتى جولدان تاستاپ كەتەدى. جالپى، ولار قۇرىلىستى باستاعاندا مۇمكىندىكتەرىن، رەسۋرستارىن قاراۋى ءتيىس. ياعني، ەڭ الدىمەن ۇيىمداستىرۋ جاعىنان قاتەلىكتەر كەتىپ جاتادى. ەكىنشىدەن، قازىرگى زاڭداعى ولقىلىقتاردى پايدالانىپ، بولاشاق ۇلەسكەرلەردىڭ قاراجاتتارىن جيناپ الادى دا ونى دۇرىس جاراتپايدى. ۇشىنشىدەن، تەكسەرۋدە كەمشىلىكتەر بار. ءبىزدىڭ تەكسەرۋگە كۇشىمىز جەتكىلىكسىز. مىسالى، ولقىلىق انىقتالعاندا 300 ا ە ك (1107600 تەڭگە) مولشەرىندە ايىپپۇل سالامىز. ولار ونى تولەپ، قۇرىلىستى ارى قاراي جالعاستىرا بەرەدى. مەنىڭشە، وسى ءۇش ماسەلە قيىندىق تۋدىرىپ وتىر. ارينە، وسى باعىتتا جۇمىس ىستەپ جاتىرمىز، - دەدى ول.

ونىڭ اتاپ وتۋىنشە، ەلوردادا 16 مىڭ پروبلەمالى ۇلەسكەر بولدى. ولاردىڭ 15600 ى بۇگىندە 150 نىساندا ورنالاسقان پاتەرلەرىنىڭ كىلتىن الدى. قازىرگى ۋاقىتتا «اقەركە»، «ارابي-2»، «ميرنىي دوم» تۇرعىن ءۇي كەشەندەرى سياقتى پروبلەمالى 7 نىسان قالدى. بۇل نىسانداردىڭ قۇرىلىسى جىلدىڭ سوڭىنا دەيىن تولىق اياقتالادى. مۇنان بولەك، 24 پروبلەمالى نىسان باقىلاۋعا الىندى. الايدا، ولار «ەلوردا قۇرىلىس» كومپانياسىنا كىرمەيدى.

- اتالعان نىسانداردىڭ 9 ىن قۇرىلىس كومپانياسى بىرتىندەپ ءبىتىرىپ جاتىر. كەيبىر نىسانعا بايلانىستى قىلمىستىق ءىس قوزعالىپ، قۇرىلىسشىلاردىڭ قاماۋعا الىنعانى دا بار. كەلەسى جىلعا 6 نىسان قالادى، ونى سوڭىنا دەيىن اياقتايمىز. ەندى ۋاقىتتاعى قالا ساياساتى - مۇنداي پروبلەمالى نىسانداردى الماۋ. سەبەبى، ءۇشىنشى تولقىن بولدى، تۇرعىندارعا جاقسىلاپ ءتۇسىندىرۋىمىز كەرەك. مۇنداي پروبلەما تۋىندىرماۋىمىز قاجەت. وعان قانداي شارا قولدانىپ جاتىرمىز؟ جىلدىڭ باسىندا رۇقسات قاعازسىز سالىنىپ جاتقان 90 نىسان بولدى. ءدال ونى 30 عا دەيىن تومەندەتتىك، جىل سوڭىنا دەيىن بىتىرەمىز. رۇقساتسىز سالىنعان ۇيلەرگە تۇرعىندار تۇرىپ جاتىر. ءبىراق قۇجاتتارىن الا الماي ءجۇر. ەندى رۇقساتسىز تۇرعىن ءۇي سالۋعا جول بەرمەيمىز. اپتا سايىن مونيتورينگ جۇرگىزىلەدى. مونيتورينگ بارىسىندا رۇقساتسىز سالىنىپ جاتقان تۇرعىن ۇيلەر انىقتالسا بىردەن شارا قولدانىپ، توقتاتامىز، - دەدى عاني تاجيەۆ.

اۆتور

مارلان جيەمباي