گۇلنارا كاريموۆانىڭ ءىسى: شۆەيتساريا بانكى ايىپتالۋدا

استانا. KAZINFORM - شۆەيتساريا پروكۋرورلارى جەكە Lombard Odier بانكى مەن ونىڭ بۇرىنعى قىزمەتكەرىن قىلمىستىق جولمەن الىنعان كىرىستەردى جىلىستاتتى دەپ ايىپتادى.

ولار وزبەكستاننىڭ ەكس- پرەزيدەنتى يسلام كاريموۆتىڭ قىزى گۇلنارا كاريموۆانىڭ قىلمىستىق ارەكەتتەرىن جاسىرۋعا كومەكتەسۋدە «شەشۋشى رول» اتقارعانىن اتاپ ءوتتى، دەپ جازدى Gazeta.uz سايتى Financial Times كە سىلتەمە جاساپ.

بۇل ايىپتى شۆەيتساريانىڭ فەدەرالدى پروكۋرورى العا تارتتى. جۇما كۇنى جاريالانعان ايىپتاۋ قورىتىندىسىندا پروكۋرورلار ەلدەگى ەڭ تانىمال قارجى ينستيتۋتتارىنىڭ ءبىرى Lombard Odier- دىڭ گۇلنارا كاريموۆانىڭ جىلدار بويى قىلمىستىق ارەكەتتەرىن جاسىرۋعا كومەكتەسۋدە ماڭىزدى رول اتقارعانىن ايتتى. ءبىراق Lombard Odier بۇل ايىپتاۋلاردى جوققا شىعاردى.
بۇرىنعى بانك قىزمەتكەرى 2008-2012 -جىلدار ارالىعىندا Lombard Odier- ءدىڭ «جەكە كليەنتتەر» بولىمىندە جۇمىس ىستەگەن جانە توعىز بانكتىك شوت اشقان نەمەسە اشۋدى ۇيىمداستىرعان دەگەن كۇدىككە ىلىنگەن.

شۆەيتساريا پروكۋرورلارىنىڭ مالىمەتىنشە، كاريموۆا مەن تاعى ءبىر ادام 2005-2012 -جىلدار ارالىعىندا شۆەيتسارياداعى The Office دەپ اتالاتىن قىلمىستىق ۇيىمعا قاتىستى دەگەن كۇدىككە ىلىنگەن.

- ايىپتاۋ قورىتىندىسىنا سايكەس، تەرگەۋلەر شۆەيتساريادا جىلىستاتىلعان اقشانىڭ ءبىر بولىگى جەنيەۆاداعى Banque Lombard Odier Cie SA بانكتىك بايلانىستارى ارقىلى اۋدارىلعان دەگەن كۇدىكتى راستادى، - دەپ جازدى SWI swissinfo.

ايتا كەتەيىك، بۇعان دەيىن شۆەيتساريا گۇلنارا كاريموۆانىڭ 370 ميلليون دوللار اكتيۆىن تاركىلەگەنىن جازعان ەدىك.

ال، ۇلى بريتانيا بيلىگى گۇلنارا كاريموۆانىڭ مۇلىكتەرىن تاركىلەدى.