ەلەنا رىباكينا اسا تارتىستى ماتچتا ەسە جىبەردى

ورال. KAZINFORM - قازاقستاننىڭ ءبىرىنشى، الەمنىڭ 3-راكەتكاسى ەلەنا رىباكينا اۋستراليا اشىق چەمپيوناتىنىڭ ءۇشىنشى اينالىمىنا شىعا المادى.

قازاقستاندىق تەننيسشى ەكىنشى ماتچىن دۇنيەجۇزىلىك رەيتينگىدە 57-ورىندا تۇرعان رەسەيلىك اننا بلينكوۆامەن وتكىزدى.

وسىعان دەيىن قارسىلاستار 2017-جىلى سانكت-پەتەربۋرگ تۋرنيرىندە كەزدەسىپ، وندا رەسەيلىك سپورتشى 5:7، 6:2، 6:3 ەسەبىمەن جەڭگەن ەدى.

بۇل جولى ءبىرىنشى پارتيادا ەسەپ 1:1 بولعان مەزەتتە بلينكوۆا برەيك جاساپ، سول باسىمدىعىن ساقتاپ قالدى - 6:4.

ەكىنشى سەتتە دە رەسەيلىك تەننيسشى برەيكپەن العا كەتتى - 2:1. دەگەنمەن ءوز ويىنىن تابا باستاعان رىباكينا تارازى باسىن تەڭەستىردى - 2:2. سودان سوڭ تاعى ءبىر برەيكپەن ءتامامدادى - 6:4.

ءۇشىنشى، شەشۋشى پارتيادا رىباكينا بوساڭسىعان ءساتتى قالت جىبەرمەگەن بلينكوۆا تاعى العا شىقتى - 3:1.

قازاقستاندىق تەننيسشى ەسەپتى تەڭەستىرە الدى - 4:4. بلينكوۆا قايىرا برەيك جاساپ، ماتچقا دوپ بەرگەندە، ەسەپ قايتا تەڭەستى - 5:5.

ەسەپ 6:5 بولعان مەزەتتە رەسەيلىك سپورتشى ەكى ماتچبولىن ءمۇلت جىبەردى. ەسەسىنە جارتى ساعاتتان استام ۋاقىتقا سوزىلعان تاي-برەيكتە رىباكينا سەگىز ماتچبولىن پايدالانا المادى - 6:7 (20:22).

ەكى ساعات 46 مينۋتقا سوزىلعان اسا تارتىستى باسەكە بارىسىندا ە. رىباكينا 9 ەيس جاساپ، 8 برەيك-پوينتتىڭ بەسەۋىن ءمۇلت جىبەرگەن جوق.

قارسىلاسى 3 ەيس، 5 برەيكپەن (6 برەيك-پوينت) كوزگە ءتۇستى.

اننا بلينكوۆا ءتورتىنشى اينالىمعا شىعۋ ءۇشىن الەمنىڭ 31-راكەتكاسى، يتاليالىق ياسمينا پاولينيمەن تالاسادى.

ول رەيتينگىدە 42-ساتىداعى گەرمانيالىق تاتيانا ماريانى جولدان تايدىردى - 6:2، 6:3.

ەسكە سالا كەتەيىك، بۇدان بۇرىن اۋستراليا چەمپيوناتىندا اننا دانيلينانىڭ جەڭىلىپ قالعانىن جازعان بولاتىنبىز.