گۇلميرا ساتىبالدىنىڭ ءىسى: سوتتا جابىرلەنۋشىنىڭ جۇرگىزۋشىسى ءسوز الدى

Гүлмира Сатыбалдының ісі: сотта жәбірленушінің жүргізушісі сөз алды
Фото: Александр Павский / Kazinform

الماتى. KAZINFORM - گۇلميرا ساتىبالدىعا قاتىستى سوت وتىرىسىندا جابىرلەنۋشى اباي جۇنىسوۆكە 12 جىل جۇرگىزۋشى بولعان كۋاگەر ەرنار مۇراتوۆ جاۋاپ بەردى.

باستى كۋاگەرلەردىڭ ءبىرى ە. مۇراتوۆ اباي ءجۇنىسوۆتىڭ قاراماعىندا 2007-2019-جىلدار ارالىعىندا جۇمىس ىستەگەنىن ايتتى.

2019 جىلدىڭ 13-اقپانىندا ا. ءجۇنىسوۆ پەن ع. ساتىبالدى اراسىندا جانجال تۋىنداعان كەزدە ول قىزىلوردا قالاسىندا ءىس ساپارمەن جۇرگەن.

«ءىس ساپاردا جۇرگەنىمدە مەيرام تەلەفون سوعىپ، 13-اقپانعا قاراعان ءتۇنى ۇيگە اباي جۇنىسوۆپەن بىرگە گۇلميرا ساتىبالدى مەن ءمادي باتىرشايەۆ كەلگەنىن ايتتى. ونى ۇيدەن شىعارماۋعا جانە ۇيگە ەشكىمدى كىرگىزبەۋ تۋرالى بۇيرىق بەرگەن. سودان اباي جۇنىسوۆكە حابارلاستىم، ءبىراق تەلەفونى ءوشىرۋلى ەكەن. مەن 15-اقپاندا الماتىعا ورالدىم، سودان كەيىن كولىكتى قايتارىپ، ءبىراز زاتتارىن تاستاپ كەتۋ ءۇشىن اباي ءجۇنىسوۆتىڭ ۇيىنە باردىم. سودان سپورتتىق فورما كيگەن جىگىتتەردى دە، جۇرگىزۋشى ءمادي باتىرشايەۆتى دا كوردىم. ۇيگە جولاتپادى. ەندى ماعان گۇلميرا ساتىبالدى بۇيىرىق بەرەتىنىن جەتكىزدى. سونىمەن قاتار، گۇلميرانىن ايتقانىن بۇلجىتپاي ورىنداۋ كەرەكتىگىمدى باسا ايتتى. سول كۇنى ۇيگە كىرگىزبەدى»، - دەيدى ول.

ول بولاشاقتا ولاردى ۇيگە باتىرشايەۆتىڭ رۇقساتىمەن عانا كىرگىزەتىنىن ايتتى.

كۋاگەردىڭ سوزىنشە، 17-اقپان كۇنى كەشكە گ. ساتىبالدى وعان تەلەفون سوعىپ، قوقان-لوقى كورسەتكەن. استاناعا «كازگەرستروي» ج ش س («بەرەكە استانا گرۋپپ» ج ش س قۇرىلتايشىسى) كەڭسەسىنە كەلۋگە بۇيرىق بەرگەن.

ەرنار مۇراتوۆ «Bereke Astana Group» ج ش س زاڭدى 60 پايىزى وزىنە (30 پايىزى ا. جۇنىسوۆكە، 30 پايىزى گ. ساتىبالدىعا)، تاعى 40 پايىزى باسقا ادامعا تيەسىلى ەكەنىن اتاپ ءوتتى.

«2017-جىلى ا. ءجۇنىسوۆ وسى سەرىكتەستىكتىڭ ءبىر بولىگىن مەنىڭ اتىما ۋاقىتشا تىركەۋىمدى ءوتىندى، ويتكەنى مەن ونىڭ سەنىمدى وكىلى بولدىم. سودان كەلىستىم. بۇل شەشىمدى كەيىن گۇلميرا ساتىبالدى دا قولدادى»، - دەيدى ە. مۇراتوۆ.

ول 18-اقپاندا استاناعا ۇشىپ كەلىپ، «قازگەرستروي» كەڭسەسىنە بارعانىن اتاپ ءوتتى.

«وفيستە گۇلميرا ساتىبالدىنى كوردىم. ول دورەكىلىك تانىتىپ مەنىڭ باستىعىم اقشانى ۇرلاعانىن، سوندىقتان مەن كومپانيانىڭ %60 ول اتاعان ادامعا اۋدارۋىم كەرەك دەدى. سوندا مەن اباي ءجۇنىسوۆ بۇل تۋرالى بىلە مە دەپ سۇرادىم، ءبىراق ول اباي قازىر ەشكىم ەمەس، ءبارى ونىڭ قالاۋىمەن بولاتىنىن ايتىپ، اباي جاقىندا تۇرمەگە تۇسەتىنىن جەتكىزدى. ول: «ەگەر كەلىسپەسەڭ، تۇرمەگە تۇسەسىڭ»، - دەدى. ءبىراز ۋاقىتتان كەيىن كەڭسەگە نوتاريۋستىڭ وكىلدەرى كەلدى، مەن سول جەردە ميرحات قاسىمبايەۆتىڭ اتىنا ۇلەستى جازىپ بەردىم، ونىڭ ورنىنا ەشتەڭە المادىم»، - دەپ قوستى ول.

وسىعان دەيىن Вaur Kazakhstan كومپانياسىنىڭ بۇرىنعى باسشىسى سوتتا كۋالىك ەتكەن بولاتىن.

سونىمەن قاتار جابىرلەنۋشى، اباي ءجۇنىسوۆ ولاردى شىندىق دەتەكتورىمەن تەرگەۋ جۇرگىزگەنىن جەتكىزگەن ەدى.

الدىنعى سوت وتىرىسىندا كاسىپكەر اباي ءجۇنىسوۆتىڭ اعاسى التاي ءجۇنىسوۆ سويلەگەن بولاتىن.

ەسكە سالايىق، الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدىعا قاتىستى سوت وتىرىسى ءوتىپ جاتىر. ونىمەن بىرگە ونىڭ كومەكشىسى ءارى جۇرگىزۋشىسى ءمادي باتىرشايەۆ تا وتىر.

سوڭعى جاڭالىقتار