گۇلميرا ساتىبالدىنىڭ ادۆوكاتى سۋديانى اۋىستىرۋدى تالاپ ەتتى

الماتى. KAZINFORM - الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءوتىپ جاتقان گۇلميرا ساتىبالدىعا قاتىستى پوتسەستە قورعاۋشى سۋديا مارتپەك كاكىمجانوۆقا قارسى شىقتى.

ايىپتالۋشى گۇلميرا ساتىبالدانىڭ ادۆوكاتى دانيلوۆانىڭ سوزىنشە، 19-تامىز كۇنى وتكەن سوت وتىرىسىندا سۋديا كاكىمجانوۆ قارالىپ جاتقان ءىس بويىنشا سوت تەرگەۋىن اياقتاۋ تۋرالى زاڭسىز قاۋلى شىعارعان.

«سوت بارىسىندا گۇلميرا ساتىبالدىنىڭ كىناسىزدىگىن دالەلدەيتىن قۇجاتتار ۇسىنىلعان جوق. سونىمەن قاتار ساراپتاما جۇرگىزىلمەدى، ول تۋرالى قورعاۋشى ءوتىنىش ءبىلدىردى، قوسىمشا كۋاگەرلەر شاقىرىلمادى»، - دەدى گ. ساتىبالدىنىڭ ادۆوكاتى اسەمگۇل دانيالوۆا.

جابىرلەنۋشى اباي ءجۇنىسوۆتىڭ قورعاۋشىسى راشيد تەڭىزبايەۆ ادۆوكات پىكىرىمەن كەلىسپەدى. ول سۋديا كاكىمجانوۆتىڭ وسى ءىس بويىنشا سوت تالقىلاۋى بارىسىندا قىلمىستىق ءىستى جان-جاقتى، وبەكتيۆتى تەكسەرۋدى قامتاماسىز ەتكەنىن اتاپ ءوتتى.

ءىس بويىنشا ءتوراعالىق ەتۋشى سۋديا مارتپەك كاكىمجانوۆقا قارسىلىق ءبىلدىرۋدى وسى سوتتىڭ باسقا سۋدياسى ەركىن مايشينوۆ قارادى.

«سوت سۋديا كاكىمجانوۆقا قارسىلىقتى قاناعاتتاندىرۋعا نەگىز جوق دەگەن قورىتىندىعا كەلەدى. سوت تەرگەۋىن اياقتاۋ ايىپتاۋ ۇكىمىنىڭ بار ەكەنىن كۋالاندىرا المايدى، ويتكەنى سۋديا دالەلدەمەلەردى ءوزىنىڭ ىشكى سەنىمدەرى بويىنشا باعالايدى جانە زاڭدى باسشىلىققا الادى. بۇل ىسكە جەكە قىزىعۋشىلىق تانىتادى دەپ ويلاۋعا نەگىز جوق. باس تارتۋدى قابىلداماۋ تۋرالى قاۋلى ەتەمىن»، - دەدى سۋديا ەركىن مايشينوۆ.

وسىعان دەيىن گۇلميرا ساتىبالدى ءىسى بويىنشا سوت تەرگەۋى اياقتالعانى تۋرالى جازعان بولاتىنبىز.

ەسكە سالايىق، بۇعان دەيىن كاسىپكەر اباي ءجۇنىسوۆ گۇلميرا ساتىبالدى بىرلەسكەن سەرىكتەستىكتە ۇرلىق جاسادى دەگەن كۇدىكپەن كىناسىن مويىنداۋدى تالاپ ەتىپ، 2019 -جىلدىڭ اقپانىنان بەرى ۇيىندە زاڭسىز قاماۋدا ۇستاعانىن ايتقان ەدى.

سوت وتىرىسى كەزىندە گۇلميرا ساتىبالدى وزىنە تاعىلعان ايىپپەن كەلىسپەيتىنىن مالىمدەدى.

بىلتىر گۇلميرا ساتىبالدى بىرەۋدىڭ مۇلكىن يەمدەنۋ جانە جىمقىرۋ قىلمىستىق ءىسى بويىنشا 7 جىلعا باس بوستاندىعىنان ايىرىلدى.

اۆتور
الما مۇقانوۆا