گۇلميرا ساتىبالدى سوتقا قاتىسۋى ءۇشىن الماتىعا جەتكىزىلەدى

استانا. KAZINFORM - گۇلميرا ساتىبالدى سوتقا قاتىسۋى ءۇشىن الماتىعا جەتكىزىلەدى، - دەپ حابارلايدى Massaget.kz ءتىلشىسى.

ءىستىڭ ءمان-جايى

گۇلميرا ساتىبالدىنىڭ ءىسى بويىنشا الدىن الا تىڭداۋدا سۋديا مارتپەك كاكىمجانوۆ قورعاۋشىنىڭ قىلمىستىق ءىستى قىسقارتۋ تۋرالى ءوتىنىشىن قاناعاتتاندىرۋدان باس تارتتى.

سۋديا قورعاۋشىنىڭ ۋاجدەرى ءىس ماتەريالدارىندا بار دالەلدەمەلەردى تالداۋعا نەگىزدەلگەنىن، ءبىراق سوت الدىن الا تىڭداۋ كەزىندە بۇل دالەلدەمەلەرگە باعا بەرە المايتىنىن، سەبەبى ولار نەگىزگى سوت تالقىلاۋى بارىسىندا جابىرلەنۋشىلەردەن، كۋالاردان جاۋاپ الۋ جانە وقۋ ارقىلى زەرتتەلەتىنىن اتاپ ءوتتى. ايىپتاۋ اكتىنىڭ وزىندە ەشقانداي زاڭ بۇزۋشىلىقتار جوق.

سونىمەن قاتار، سۋديا سوت پروتسەسىن جابىق تۇردە جانە ونلاين وتكىزۋ تۋرالى ءوتىنىشتى قاناعاتتاندىرمادى. سۋديانىڭ ايتۋىنشا، بۇعان قىلمىستىق ءىس جۇرگىزۋ كودەكسىندە كوزدەلگەن مەملەكەتتىك قۇپيالاردى قورعاۋ مۇددەسى نەمەسە كامەلەتكە تولماعان ادامعا قاتىستى ءىس سياقتى نەگىز جوق.

سونداي-اق ادۆوكاتتارعا سوت تالقىلاۋى كەزىندەگى دالەلدەمەلەردى زەرتتەۋ ناتيجەلەرى بويىنشا قىلمىستىق ءىستى قىسقارتۋ تۋرالى ءوتىنىشتى قايتا بەرۋگە بولاتىنى ءتۇسىندىرىلدى.

العاشقى سوت وتىرىسى قاشان وتەدى؟

«الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا نەگىزگى سوت تالقىلاۋى اشىق سوت وتىرىسى فورماتىندا ءوتسىن. بۇلتارتپاۋ شاراسى وزگەرىسسىز قالادى. سوتتالۋشى گۇلميرا ساتىبالدى قاۋاس قىزى استانا قالاسىنىڭ مەكەمەسىنەن الماتى قالاسىنىڭ 78-مەكەمەسىنە جەتكىزىلسىن»، - دەپ شەشتى سۋديا.

العاشقى سوت وتىرىسى 30-مامىر كۇنى ساعات 10:00 دە الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا اشىق رەجيمدە وتەدى. سوت وتىرىسى اپتاسىنا ەكى رەت - دۇيسەنبى جانە بەيسەنبى كۇندەرى وتەدى.

بۇعان دەيىن نە بولدى؟

ەسكە سالايىق، بۇعان دەيىن گۇلميرا ساتىبالدى القابيلەر سوتىنان باس تارتقان بولاتىن.

الماتىنىڭ قىلمىستىق ىستەر جونىندەگى سوتىندا گۇلميرا ساتىبالدىنىڭ ءىسى بويىنشا الدىن الا تىڭداۋ ءوتتى. سوتتالۋشى ورنىندا گۇلميرا ساتىبالدىمەن قوسا، ونىڭ جۇرگىزۋشىسى ءمادي باتىرشايەۆ تا وتىر. سوت وتىرىسى ونلاين رەجيمدە ءوتىپ جاتىر، ال ايىپتالۋشىلار استانانىڭ تەرگەۋ يزولياتورىندا.

گۇلميرا ساتىبالدىعا قىلمىستىق كودەكستىڭ 126-بابى «زاڭسىز باس بوستاندىعىنان ايىرۋ» بويىنشا ايىپپەن قوسا، اسا اۋىر قىلمىس جاسادى دەگەن ايىپ تاعىلدى: قىلمىستىق كودەكستىڭ 194-بابىنىڭ 3-بولىگى «ءىرى مولشەردە مۇلىك الۋ ماقساتىندا جاسالعان قورقىتىپ الۋشىلىق». بۇل باپ اسا اۋىر بولىپ ەسەپتەلەدى جانە ول بويىنشا ايىپتالۋشى القابيلەردىڭ قاتىسۋىمەن سوت وتكىزۋدى سۇراۋىنا قۇقىلى.