گۇلميرا ساتىبالدى ۇلەسكەرلەرگە تيەسىلى 450 ميلليون تەڭگەنى تۋىسقانىنا اۋدارعان

الماتى. KAZINFORM - الماتىدا گۇلميرا ساتىبالدىعا قاتىستى سوت پروتسەسى جالعاسىپ جاتىر.  «Baur Kazakhstan» ا ق باس ەسەپشىسى انار بايداۋلەتوۆادان جاۋاپ الىندى.

كومپانيادا كۋاگەر 2018 -جىلدان 2019 -جىلدىڭ مامىرىنا دەيىن بۋحالتەر بولىپ جۇمىس ىستەگەن.

ال، 2020 -جىلدىڭ قاڭتارىندا گۇلميرا ساتىبالدى ونى «پرەمەر-ن س» ج ش س قارجى ديرەكتورى رەتىندە جۇمىس ىستەۋگە شاقىرعان.

جاۋاپ الۋ كەزىندە پروكۋرور ودان «ت م Engineering Group» ج ش س ەسەپشوتىنان «Galanz Bottlers» ا ق پايداسىنا 600 ميلليون تەڭگە اۋدارىلعانى جايىندا جابىرلەنۋشى اباي ءجۇنىسوۆ ءبىلدى مە؟» دەپ سۇرادى.

«ول جاعىن بىلمەيمىن. ول كەزدە استانادا ىسساپارمەن جۇرگەنمىن. ماعان قابەنوۆ پەن مەكەشەۆا تەلەفون سوعىپ، «ت م Engineering» ج ش س-نەن 450 ميلليون تەڭگە جىبەرىپ، باقىلاۋدى تاپسىردى. سودان كەيىن مەن مەكەشەۆادان «نەگە ۇلەسكەرلەردىڭ اقشاسىن جىبەرۋىم كەرەك؟» دەپ سۇرادىم. ول اقشا قايتارىلاتىنىن جانە گۇلميرا ساتىبالدىنىڭ نۇسقاۋى ەكەنىن جەتكىزدى. 450 ميلليون تەڭگەنى شىمكەنت قالاسىنداعى سەمەنت زاۋىتىنا، گۇلميرا ساتىبالدىنىڭ تۋىسىنا جىبەردىك. بۇل ناقتى ەسىمدە»، - دەدى كۋاگەر.

ايتۋىنشا، اتالعان قوماقتى قارجى استانالىق تۇرعىن ءۇي كەشەندەرىنىڭ ءبىرىنىڭ ۇلەسكەرلەرىنە تيەسىلى.

وسىعان دەيىن كۋاگەرلەردەن جاۋاپ الۋ كەزىندە ايىپتالۋشى تاراپ تۋىستارىنىڭ ءبىرى ۇيىقتاپ كەتىپ، ورىندىقتان قۇلاپ تۇسكەنىن جازعان ەدىك.

سونداي-اق كاسىپكەر اباي ءجۇنىسوۆ گۇلميرا ساتىبالدى بىرلەسكەن سەرىكتەستىكتە ۇرلىق جاسادى دەگەن كۇدىكپەن كىناسىن مويىنداۋدى تالاپ ەتىپ، 2019 -جىلدىڭ اقپانىنان بەرى ۇيىندە زاڭسىز قاماۋدا ۇستاعانىن ايتتى.

بىلتىر گۇلميرا ساتىبالدى بىرەۋدىڭ مۇلكىن يەمدەنۋ جانە جىمقىرۋ قىلمىستىق ءىسى بويىنشا 7 جىلعا باس بوستاندىعىنان ايىرىلعان بولاتىن.

ەسكە سالايىق، الماتىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا گۇلميرا ساتىبالدىعا قاتىستى سوت وتىرىسى ءوتىپ جاتىر.

ونىمەن بىرگە ونىڭ كومەكشىسى ءارى جۇرگىزۋشىسى ءمادي باتىرشايەۆ تا ايىپتالىپ وتىر.

اۆتور
الما مۇقانوۆا