مەملەكەتتىك ۇيىمدار كيىك ەتى ونىمدەرىن ساتىپ الادى

- كوميتەت اقبوكەن ەتىن قايتا وڭدەۋ كولەمىن ارتتىرۋ ماقساتىندا كيىكتىڭ بۇقتىرىلعان جانە باسقا دا ەت ونىمدەرىن تاۋارلاردىڭ، جۇمىستاردىڭ جانە كورسەتىلەتىن قىزمەتتەردىڭ ءبىرىڭعاي نومەنكلاتۋرالىق انىقتامالىعىنا (تاۋارلار، جۇمىستار مەن كورسەتىلەتىن قىزمەتتەر كاتالوگى) ەنگىزۋ ماسەلەسىن پىسىقتادى، - دەلىنگەن ورمان شارۋاشىلىعى جانە جانۋارلار دۇنيەسى كوميتەتىنىڭ Kazinform اگەنتتىگىنە بەرگەن جاۋابىندا.

اتاپ ايتقاندا، بۇعان دەيىن كاتالوگقا تەك ءبىر پوزيتسيا ەنگىزىلگەن بولاتىن:

- كونسەرۆىلەنگەن كيىك ەتى.

جۇمىس ناتيجەسى بويىنشا كاتالوگقا قوسىمشا تاعى 4 پوزيتسيا ەنگىزىلدى. ونىڭ قاتارىندا:

- كيىك سالقىنداتىلعان جارتى ەتى؛

- كيىكتىڭ سالقىنداتىلعان تۇتاس ەتى؛

- كيىكتىڭ مۇزداتىلعان جارتى ەتى؛

- كيكتىڭ مۇزداتىلعان تۇتاس ەتى بار.

- بۇدان بولەك، 2026 -جىلعى 4-تامىزدا قازاقستان رەسپۋبليكاسى توتەنشە جاعدايلار مينيسترلىگى كيىكتىڭ كونسەرۆىلەنگەن ەتىن مەملەكەتتىڭ ماتەريالدىق رەزەرۆىندەگى ماتەريالدىق قۇندىلىقتارىن ساقتاۋ نورماتيۆتەرىنە قوسۋ نورماسىن بەكىتتى. وسىلايشا، مەملەكەتتىك ۇيىمدار بەلگىلەنگەن تارتىپپەن كيىك ەتى ونىمدەرىن ساتىپ الۋدى جۇزەگە اسىرا الادى، - دەپ اتالىپ وتكەن ۆەدومستۆو اقپاراتىندا.

ەسكە سالساق، اۋىل شارۋاشىلىعى مينيسترلىگى كيىك ەتىنىڭ باعاسىن ۇسىنىلعان مولشەردەن، ياعني 1600 تەڭگەدەن ءتۇسىرۋدى قاراستىرىپ جاتقان جوق.

ەلىمىزدە كيىك ەتىنە دەگەن سۇرانىس تومەندەگەن. وسىعان بايلانىستى اۋىل شارۋاشىلىعى مينيسترلىگى ونى وتكىزۋدىڭ بالاما جولدارىن قاراستىرىپ جاتىر. سونىڭ ءبىرى - كيىك ەتىن مەملەكەتتىك ساتىپ الۋ اياسىندا ساتىپ الىپ، كاسىپورىن قىزمەتكەرلەرىنىڭ تاماقتانۋ راتسيونىنا ەنگىزۋ.

ايتا كەتەيىك، بيولوگيالىق نەگىزدەمەگە سايكەس، 2026 -جىلى 580000 كيىكتى اۋلاۋ ۇسىنىلدى.