مەملەكەتتىك ورگاننىڭ شەشىمىمەن كەلىسپەگەن ازامات ءوز قۇقىعىن قالاي قورعاي الادى

بۇل تۋرالى استانا قالاسىنىڭ مامانداندىرىلعان اۋدانارالىق اكىمشىلىك سوتىنىڭ سۋدياسى ادينا جاركەنوۆا قالالىق كوممۋنيكاتسيالار قىزمەتىندە وتكەن باسپا ءسوز ماجىلىسىندە ايتتى.

سۋديانىڭ سوزىنشە، قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسى (ا ر پ ك) مەملەكەتتىك ورگاندار قابىلدايتىن شەشىمدەردىڭ زاڭدىلىعىن قامتاماسىز ەتۋگە جانە ازاماتتار مەن مەملەكەتتىك ورگاندار اراسىنداعى داۋلاردى ءادىل شەشۋگە باعىتتالعان.

- اتاپ ايتقاندا، كودەكستىڭ 7-بابىندا زاڭدىلىق قاعيداتى بەكىتىلگەن. وعان سايكەس، مەملەكەتتىك ورگاندار مەن لاۋازىمدى ادامدار ءوز وكىلەتتىكتەرى شەگىندە جانە زاڭ تالاپتارىنا ساي ارەكەت ەتۋگە مىندەتتى. سوندىقتان اكىمشىلىك سوت مەملەكەتتىك ورگاننىڭ بەلگىلى ءبىر شەشىم قابىلداۋعا قۇقىعى بولعانىن عانا ەمەس، ونى قابىلداۋ كەزىندە زاڭدا بەلگىلەنگەن راسىمدەردىڭ ساقتالعانىن دا تەكسەرەدى، - دەدى سپيكەر.

سونىمەن قاتار ول ا ر پ ك- ءنىڭ 8-بابىندا كوزدەلگەن ادىلدىك قاعيداتى اكىمشىلىك ىستەردى جان-جاقتى ءارى بەيتاراپ قاراۋدى تالاپ ەتەتىنىن اتاپ ءوتتى.

- بۇل ازاماتتاردىڭ وتىنىشتەرىن ءۇستىرت قاراۋعا، ءبىر تاراپتىڭ ۇستانىمىنا الدىن الا باسىمدىق بەرۋگە نەمەسە ءىستىڭ ناتيجەسىنە اسەر ەتەتىن ماڭىزدى ءمان-جايلاردى ەلەمەۋگە جول بەرىلمەيتىنىن بىلدىرەدى، - دەدى سۋديا.

ادينا جاركەنوۆانىڭ ايتۋىنشا، مەملەكەتتىك ورگاندار ازاماتتاردىڭ قۇقىقتارىن شەكتەيتىن شەشىم قابىلداعان كەزدە مولشەرلەستىك قاعيداتىن دا ساقتاۋعا ءتيىس. كودەكستىڭ 10-بابىنا سايكەس، قولدانىلاتىن شارالار كوزدەلگەن ماقساتقا ساي بولۋى جانە ازاماتتاردىڭ قۇقىقتارىن شامادان تىس شەكتەمەۋى قاجەت.

- بۇدان بولەك، ا ر پ ك- ءنىڭ 12-بابىندا اكىمشىلىك راسىمدەر تۋرالى زاڭناماداعى كۇماندار، قايشىلىقتار مەن تۇسىنىكسىزدىكتەر اكىمشىلىك راسىمگە قاتىسۋشىنىڭ پايداسىنا تۇسىندىرىلەتىنى كورسەتىلگەن. ال 13-باپ ازاماتتاردىڭ مەملەكەتتىك ورگانداردىڭ زاڭدى شەشىمدەرى مەن ارەكەتتەرىنە دەگەن سەنىمىن قورعاۋدى كوزدەيدى، - دەدى سپيكەر.

ول اكىمشىلىك سوت تورەلىگىنىڭ باستى مىندەتى مەملەكەتتىك ورگاننىڭ شەشىمىن جاي عانا كۇشىندە قالدىرۋ نەمەسە كۇشىن جويۋ ەمەس، داۋدى زاڭ تالاپتارىنا سايكەس ءادىل شەشۋ ەكەنىن اتاپ ءوتتى.

- بۇل رەتتە ازاماتتىڭ سوتقا جۇگىنۋى ونىڭ تالابى مىندەتتى تۇردە قاناعاتتاندىرىلادى دەگەن ءسوز ەمەس. سوت ءىستىڭ بارلىق ءمان-جايىن زەرتتەپ، ازاماتتاردىڭ قۇقىقتارى مەن قوعامدىق مۇددەلەر اراسىنداعى تەپە-تەڭدىكتى ساقتاۋعا ءتيىس، - دەدى ادينا جاركەنوۆا.

سۋديا ازاماتتاردى ءوز قۇقىقتارىن بىلۋگە، مەملەكەتتىك ورگاندار قابىلدايتىن شەشىمدەرگە مۇقيات قاراۋعا جانە قۇقىقتارى بۇزىلعان جاعدايدا زاڭدا كوزدەلگەن سوت ارقىلى قورعاۋ مۇمكىندىكتەرىن پايدالانۋعا شاقىردى.

ايتا كەتەيىك، بۇعان دەيىن استانادا جىل باسىنان بەرى 4 جەكە سوت ورىنداۋشىسى ليسەنزياسىنان ايىرىلعانى حابارلاندى.