مەملەكەتتىك كۇزەت قىزمەتىنە ساربازدار قالاي ىرىكتەلەدى

استانا. قازاقپارات – 21-قاراشادا قازاقستان رەسپۋبليكاسى مەملەكەتتىك كۇزەت قىزمەتىنىڭ ايرىقشا ماقساتتاعى كۇشتەرىنىڭ اسكەري بولىمدەرىندە كۇزگى شاقىرىلىم ساربازدارى اسكەري انت قابىلدادى. سالتاناتتى ءراسىم استانا مەن الماتى قالالارىندا ءوتتى.

Мемлекеттік күзет қызметіне сарбаздар қалай іріктеледі
Фото: Мемлекеттік күзет қызметі

«ايبىن» پرەزيدەنتتىك پولكىنىڭ اسكەري قىزمەتشىلەرى اسكەري انتتى استاناداعى «قازاق ەلى» الاڭىندا، تاۋەلسىزدىك سارايىنىڭ الدىندا قابىلدادى. ال «باتىر» پرەزيدەنتتىك پولكىنىڭ ساربازدارى ءۇشىن سالتاناتتى ءراسىم الماتىداعى 28 گۆاردياشى- پانفيلوۆشىلار ساياباعىندا ءوتتى. شاراعا جاس ساربازداردىڭ اتا- انالارى مەن جاقىندارى قاتىستى.

ق ر مەملەكەتتىك كۇزەت قىزمەتىنىڭ 2026 -جىلعى كۇزگى شاقىرىلىم ساربازدارى ەلىمىزدىڭ بارلىق ءوڭىرى مەن رەسپۋبليكالىق ماڭىزى بار قالالارىنان ىرىكتەلگەن. ولار اسكەري بولىمدەردىڭ دالالىق وقۋ ورتالىقتارىندا جاڭا شاقىرىلىم ساربازدارىن دايارلاۋ كۋرسىنان ءوتتى.

Мемлекеттік күзет қызметіне сарбаздар қалай іріктеледі
Фото: Мемлекеттік күзет қызметі

اسكەري انت قابىلداۋ - ەرەكشە جاۋىنگەرلىك راسىمدەردىڭ ءبىرى. انت بەرۋ ارقىلى ساربازدار وتاندى قورعاۋعا ءازىر بولۋعا جانە اسكەري قىزمەت مىندەتتەرىن ادال اتقارۋعا جاۋاپكەرشىلىك الادى.

ق ر مكق اسكەري بولىمدەرىندە مەرزىمدى قىزمەت اتقارۋ كەزىندە جاس ساربازدار تاجىريبەلى نۇسقاۋشىلاردىڭ جەتەكشىلىگىمەن اسكەري ىسكە ۇيرەنىپ، جاۋىنگەرلىك جانە ارنايى دايارلىق ساباقتارىندا اسكەري ماماندىقتاردى مەڭگەرەدى.

اسكەري انت قابىلداعاننان كەيىن مەرزىمدى قىزمەت ساربازدارى ق ر مەملەكەتتىك كۇزەت قىزمەتىنىڭ مىندەتتەرىن اتقارۋعا كىرىسەدى. ولاردىڭ قاتارىندا قازاقستان رەسپۋبليكاسىنىڭ مەملەكەتتىك تۋى مەن مەملەكەتتىك ەلتاڭباسى ەتالوندارىن كۇزەتۋ، مەملەكەت باسشىسىنىڭ قاتىسۋىمەن وتەتىن پروتوكولدىق ءىس-شارالارعا قاتىسۋ، كۇزەتىلەتىن تۇلعالار مەن وبەكتىلەردىڭ قاۋىپسىزدىگىن قامتاماسىز ەتۋ بار.

ق ر مەملەكەتتىك كۇزەت قىزمەتىنىڭ مەرزىمدى اسكەري قىزمەتىنە 18 بەن 27 جاس ارالىعىنداعى، بويى 180 سانتيمەتردەن جوعارى جانە 195 سانتيمەتردەن اسپايتىن، ورتا جانە ودان جوعارى ءبىلىمى بار، دەنساۋلىعى جاقسى ازاماتتار قابىلدانا الادى. جوعارى ءبىلىمى، سپورتتىق جەتىستىكتەرى مەن رازريادتارى بار ۇمىتكەرلەرگە باسىمدىق بەرىلەدى.

Мемлекеттік күзет қызметі
Фото: Мемлекеттік күзет қызметі

مەملەكەتتىك كۇزەت قىزمەتىندە مەرزىمدى اسكەري بورىشىن وتەۋ جاس ازاماتتار ءۇشىن مىقتى ەرلىك مەكتەبى سانالادى. مۇندا ولار ومىرلىك جولىنا قاجەتتى ماڭىزدى داعدىلاردى مەڭگەرەدى. بۇل كەزەڭ جاستاردىڭ بولاشاق مانسابىنا جول اشاتىن الەۋمەتتىك ليفت بولۋى مۇمكىن.

مەرزىمدى اسكەري قىزمەتتى اياقتاعاندار قالاۋى بويىنشا كەلىسىمشارت نەگىزىندە قىزمەتىن جالعاستىرا الادى. كەيىن ارناۋلى مەملەكەتتىك ورگاننىڭ قىزمەتكەرى جانە وفيتسەرى اتانىپ، كۇزەتىلەتىن تۇلعالار مەن وبەكتىلەردىڭ قاۋىپسىزدىگىن قامتاماسىز ەتۋ مىندەتتەرىن اتقارۋعا مۇمكىندىك بار.

سونىمەن قاتار ق ر م ك ق مەرزىمدى قىزمەت ساربازدارىنا قازاقستاندا مەرزىمدى اسكەري قىزمەت وتكەرگەن ازاماتتارعا ارنالعان بارلىق الەۋمەتتىك قولداۋ شارالارى، سونىڭ ىشىندە «سروچنيكي 2.0» باعدارلاماسىنا قاتىسۋ مۇمكىندىگى بەرىلەدى.

ەسكە سالايىق، بۇعان دەيىن ورالداعى 5517 اسكەري بولىمىندە 200 دەن استام جاس سارباز اسكەري انت قابىلداپ، ۇلتتىق ۇلان قاتارىنا قوسىلعانىن حابارلاعان ەدىك.